Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 82: Molitekai na Esita

Ngewa ya 82: Molitekai na Esita

EKA tũsyoke ĩtina myaka mĩvũthũ mbee wa Esala kũthi Yelusaleme. Molitekai na Esita nĩmo Aisilaeli ala maĩ anene vyũ ũsumbĩnĩ wa Avelisia. Esita aĩ kĩveti kya mũsumbĩ, nake Molitekai, mwana wa mũndũ wasyaanĩw’e na ĩthe wa Esita, nĩwe watĩĩe mũsumbĩ nthĩnĩ wa ũsumbĩki. Ekai twone ũu weethĩiwe ata.

Asyai ma Esita makw’ie e mũnini mũno, na kwoou Molitekai nĩwe wamũeie. Aasuelo, mũsumbĩ wa Velisia, aĩ na nyũmba ya ũsumbĩ ndũanĩ ya Susani, na Molitekai aĩ ũmwe wa athũkũmi make. Mũthenya ũmwe Vasiti, mũka wa mũsumbĩ, nĩwaleile kũmwĩw’a, kwoou mũsumbĩ anyuva mũndũ mũka ũngĩ atw’ĩke mũka wake. We nĩwĩsĩ anyuvie ũũ? Anyuvie Esita mũndũ mũka mwanake.

Andũ mamũthatĩe Molitekai

We nĩwene mũndũ ũũ wĩ na mĩyono andũ meũmũkumanĩa? Ũũ nĩ Amani. Amani aĩ mũndũ mũnene mũno kũu nthĩ ya Velisia. Amani endaa Molitekai, ũũ ũkwona ekalite vaa nthĩ, o nake amũkumanĩe. Ĩndĩ Molitekai alea. We ndoonaa kwaĩlĩte kũkumanĩa mũndũ mũthũku ta ũsu. Ũndũ ũsu nĩwatumie Amani athilĩka mũno. Na ũũ nĩw’o weekie.

Amani nĩwatavisye mũsumbĩ ũvũngũ ĩũlũ wa Aisilaeli. We aisye: ‘Asu nĩ andũ athũkũ o na mayĩw’aa mĩao yaku. Maĩlĩte kũawa.’ Aasuelo ndeesĩ kana mũka wake Esita aĩ Mũisilaeli. Kwoou amwĩthukĩĩsya Amani, na asya mwĩao nũtuw’e, na mũthenya mũna mũnyuve Aisilaeli onthe mayũawa.

Yĩla Molitekai weewie ĩũlũ wa mwĩao ũsu, eew’a woo mũno. Nake atũmana kwa Esita amwĩa: ‘No nginya ũmũtavye mũsumbĩ, noimwĩsũva atũtaangĩĩe.’ Waĩ ũndũ ũtoosanĩte na mĩao ya Velisia kũthi ũkone mũsumbĩ ate o wĩmũthokye. Ĩndĩ Esita nĩwaendie atemũthokye. Na mũsumbĩ amũkĩlĩlya ndata yake ya thaavu, kwonany’a kana ndeũawa. Esita nĩwathokisye mũsumbĩ na Amani mbokanĩ nene. Na me vau mũsumbĩ akũlya Esita eenda amũnenge kyaũ. Esita amwĩa kana akamũtavya ethĩwa we na Amani makooka mbokanĩ ĩngĩ mũthenya ũla waatĩĩe.

Me mbokanĩ ĩsu Esita nĩwamwĩie mũsumbĩ ũũ: ‘Andũ makwa nakwa nĩtũkũawa.’ Nake Mũsumbĩ athilĩka na akũlya: ‘Nũũ ũsu ũkwenda kwĩka ũndũ ta ũsu?’

Nake Esita asya: ‘Ũ mũndũ, nĩ nthũ ĩno, nĩ Amani ũũ mũthũku!’

Esita Mũka wa Mũsumbĩ aineenea naĩ Amani

Yu ĩndĩ mũsumbĩ athilĩka vyũ. Na eeĩaa Amani oawe. Ĩtina wa ũu, mũsumbĩ nĩwamũtwie Molitekai mũndũ wa kelĩ ũsumbĩnĩ. Na ĩndĩ Molitekai aĩkĩĩthya kana mwĩao mweũ nĩwaseũvw’a wa kũmatonyethya Aisilaeli kwĩtetea mũthenya ũla maaĩlĩte kũawa. Na nũndũ Molitekai aĩ mũndũ mũnene ũsumbĩnĩ, andũ aingĩ nĩmamatetheeisye Aisilaeli, namo Aisilaeli mavonokw’a kuma kwa amaitha moo.

Ĩvuku ya Mbivilia ya Esita.



Makũlyo

  • Molitekai na Esita naaũ?
  • Nĩkĩ Mũsumbĩ Aasuelo wendie kũtwaa kĩveti kĩngĩ, nake anyuvie ũũ?
  • Amani nũũ, na nĩ kyaũ kyamũthatĩtye mũno?
  • Nĩ mwĩao mwaũ waseũviw’e, na Esita eekie ata akwata ũtũmani kuma kwa Molitekai?
  • Kweethĩiwe ata kwa Amani, na kwa Molitekai?
  • Aisilaeli matangĩĩiwe ata kuma kwa amaitha moo?

Makũlyo ma kwongeleela

  • Soma Esita 2:12-18.

    Esita oonanisye ata vata wa kwĩthĩwa na “veva wa wĩnyivyo na ũuu”? (Est. 2:15; 1 Vet. 3:1-5)

  • Soma Esita 4:1-17.

    O tondũ Esita wakwatie mwanya wa kũtetea ũthaithi wa w’o, ithyĩ twĩ na mwanya mwaũ wa kwonany’a kwĩyumya na kwĩkwatany’a na Yeova? (Est. 4:13, 14; Mt. 5:14-16; 24:14)

  • Soma Esita 7:1-6.

    O tondũ Esita weekie, ũmũnthĩ andũ aingĩ ma Ngai mekaa ata yĩla meũthĩnw’a? (Est. 7:4; Mt. 10:16-22; 1 Vet. 2:12)