Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 55: Kamwana Kanini Kaimũthũkũma Ngai

Ngewa ya 55: Kamwana Kanini Kaimũthũkũma Ngai

KAMWANA kaa tyo kombe nesa? Syĩtwa yako nĩ Samueli. Nake mũndũ ũũ wilĩĩle kw’oko kwake ĩũlũ wa mũtwe wa Samueli nĩ mũthembi mũnene wa Isilaeli weetawa Eli. Asu angĩ nĩ ĩthe wa Samueli Elikana na inyia wake Aana. Mamũetete Samueli kũla kwĩ Eli.

Samueli aikomana na mũthembi mũnene Eli

Samueli e na ũkũũ wa ta myaka ĩna kana ĩtano. Ĩndĩ akekalaa vaa ĩeemanĩ ya Yeova e na Eli na athembi ala angĩ. Nĩkĩ Elikana na Aana meũmũnengane mwana mũnini ta Samueli amũthũkũme Yeova ĩeemanĩ yake? Ekai twone.

Myaka o mĩnini mbee wa ũndũ ũũ Aana aĩ na kyeva kingĩ mũno. Kĩtumi nũndũ ndaĩ atonya kũsyaa, na nĩwendaa mũno vyũ asyae kana. Kwoou mũthenya ũmwe yĩla Aana waĩ ĩeemanĩ ya Yeova ya kũmbanĩa, nĩwavoyie: ‘Ame, Yeova ndũkolwe ninyie! Ethĩwa ũkanenga mwana mũũme, nĩngwĩvĩta kana ngamũnengane kwaku nĩ kana akũthũkũmae mĩthenya yonthe ya thayũ wake.’

Yeova nĩwasũngĩie mboya ya Aana, na ĩtina wa myei mĩna asyaa Samueli. Aana nĩwendete kamwana kake mũno, na ambĩlĩlya kũkamanyĩsya ĩũlũ wa Yeova keo kanini. Nake amwĩa mũũme wake ũũ: ‘Yĩla Samueli ũkeananga wĩthĩe ndena vata wa mũndũ wa kũmũea, ngamũtwaa ĩeemanĩ ya kũmbanĩa akathũkũme Yeova kũu.’

Ũu nĩw’o tũkwona Aana na Elikana mayĩka visanĩ ũũ. Na nũndũ Samueli nĩwamanyĩĩtw’e nesa mũno nĩ asyai make, we aĩ na ũtanu kwĩthĩwa atonya kũmũthũkũma Yeova vaa ĩeemanĩ yake. O kĩla mwaka Aana na Elikana nĩmaendaa kũthaitha ĩeemanĩ yĩu ya mwanya, na kwona kamwana kau koo. Na kĩla mwaka Aana nĩwamũtumĩaa na kũmũetee Samueli ngũa ya ĩũlũ ĩte moko.

Myaka nĩyaendeei na kũthela, nake Samueli aendeea na kũthũkũma ĩeemanĩ ya Yeova, na Yeova o vamwe na andũ nĩmamwendete. Ĩndĩ Ovini na Vineasi, ana ma mũthembi mũnene Eli, mayaĩ aseo. Mekaa maũndũ maingĩ mathũku, na maituma andũ angĩ o namo malea kũmwĩw’a Yeova. Eli aĩlĩtwe nĩkũmaumya wĩanĩ wa ũthembi, ĩndĩ ndaaĩka ũu.

Mwanake ũsu Samueli ndaaĩtĩkĩla o na ũmwe wa maũndũ asu mathũku maendee ĩeemanĩ ya kũmbanĩa matume aeka kũmũthũkũma Yeova. Ĩndĩ nũndũ wa kwĩthĩwa no andũ anini mamwendete Yeova kwa w’o, nĩ ĩvinda ĩasa yaĩ ĩvĩtu kuma yĩla Yeova waĩ aĩla kũneena na mũndũ o na wĩva. Samueli eananga ũũ nĩw’o kweethĩiwe:

Samueli akomete too ĩeemanĩ yĩla wasya wamũamũkisye. Nake asũngĩa: ‘Ninyioo.’ Na ookĩla asemba vala ve Eli na amwĩa: ‘Nĩwambĩta na nĩnooka.’

Ĩndĩ Eli asũngĩa: ‘Ndinakwĩta; enda ũkakome.’ Kwoou Samueli athi na akoma

Na ĩndĩ kweetanwa ya kelĩ: ‘Samueli!’ nake Samueli ookĩla na asemba vala ve Eli. Na asya, ‘Ninyioo, nũndũ; nĩwambĩta.’ Ĩndĩ Eli asũngĩa: ‘Ndinetana, mwana wakwa. Koma ĩngĩ.’ Kwoou Samueli asyoka ĩngĩ na akoma.

‘Samweli!’ Ũla wasya weetana ya katatũ. Nake Samueli asemba vala ve Eli na amwĩa, ‘Ninyioo, nũndũ nĩw’o nĩwambĩta yu.’ Eli amanya kana no nginya wĩthĩe Yeova nĩwe ũkwĩtana. Kwoou eea Samueli: ‘Thi ũkakome ĩngĩ, na eethĩwa nũkwĩtana ĩngĩ, no nginya wasye: “Neena, Yeova, nũndũ mũthũkũmi waku nũkwĩw’a.”’

Ũu nĩw’o Samueli waisye yĩla Yeova weetanie ĩngĩ. Nake Yeova amwĩa kana akasilĩla Eli na ana make. Ĩtina Ovini na Vineasi nĩmakw’ĩie kaũnĩ woo na Avilisiti, na yĩla Eli weewie ũndũ kweekĩka avalũka na ngala, atũlĩka ngingo o nake akw’a. Kwoou ndeto ya Yeova yeanĩa.

Samueli eana atw’ĩka mũndũ mũima nĩwatw’ĩkie mũsili wa mũthya wa Isilaeli. Na yĩla wakũie, andũ mamwĩa: ‘Tũnyuvĩe mũsumbĩ atũsumbĩke.’ Samueli ndendaa kwĩka ũu, nũndũ kwa w’o Yeova nĩwe waĩ mũsumbĩ woo. Ĩndĩ Yeova amwĩa amethukĩĩsye.

1 Samueli 1:1-28; 2:11-36; 3:1-18; 4:16-18; 8:4-9.



Makũlyo

  • Kamwana kaa ke vaa visanĩ ketawa ata, na asu angĩ naaũ?
  • Mũthenya ũmwe Aana avoyie ĩũlũ wa kyaũ ĩla waendete ĩeemanĩ ya kũmbanĩa ya Yeova, nake Yeova amũsũngĩie ata?
  • Samueli aĩ na ũkũũ mwaũ yĩla watwaiwe akathũkũme ĩeemanĩ ya Yeova, na inyia wake amwĩkaa ata o kĩla mwaka?
  • Ana ma Eli meetawa ata, namo maĩ aũme ma mũthemba mwaũ
  • Yeova amwĩtie Samueli ata, nake amũnengie ũvoo mwaũ?
  • Samueli atw’ikie kyaũ eana, na kweekĩkie ata akũa?

Makũlyo ma kwongeleela

  • Soma 1 Samueli 1:1-28.

    Nĩ ngelekany’o myaũ nzeo ĩla Elikana waiĩe mĩtwe ya mũsyĩ ĩũlũ wa kũtongoesya nyũmba syoo nthĩnĩ wa ũthaithi wa w’o? (1 Sam. 1:3, 21; Mt. 6:33; Avi. 1:10)

    Nĩ ĩsomo yaũ tũtonya kwĩmanyĩsya kuma kwa Aana ĩũlũ wa kũsindana na thĩna mũnene? (1 Sam. 1:10, 11; Sav. 55:22; Alo. 12:12)

  • Soma 1 Samueli 2:11-36.

    Eli ataĩie ana make kũthonoka Yeova ata, na ũndũ ũsu ũtonya kwĩthĩwa ũkany’o kwitũ ata? (1 Sam. 2:22-24, 27, 29; Kũt. 21:18-21; Mt. 10:36, 37)

  • Soma 1 Samueli 4:16-18.

    Nĩ ũvoo mwaũ ĩũlũ wa mĩisyo ĩna ũla wookie kuma kaũnĩ, naw’o watumie Eli eka ata?

  • Soma 1 Samueli 8:4-9.

    Aisilaeli mathatisye Yeova mũno ata, na tũtonya ata kũlũlũmĩĩlya kwa ũĩkĩĩku Ũsumbĩ wake ũmũnthĩ? (1 Sam. 8:5, 7; Yoa. 17:16; Yak. 4:4)