Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

Ngewa ya 54: Mũndũ Ũla Waĩ Vinya Vyũ

Ngewa ya 54: Mũndũ Ũla Waĩ Vinya Vyũ

WE NĨWĨSĨ syĩtwa ya mũndũ ũla waĩ vinya kwĩ ala angĩ onthe? Nĩ mũsili weetawa Samusoni. Yeova nĩwe wanengae Samusoni vinya wake. O na mbee wa Samusoni atanasyawa, Yeova eeie inyia wake ũũ: ‘O mĩtũkĩ ũkasyaa mwana. Nake akatongosya nthĩnĩ wa kũtangĩĩa Aisilaeli kuma kwa Avilisiti.’

Samusoni aiũkita na mũnyambũ

Avilisiti maĩ andũ athũku matũĩte nthĩ ya Kanaani. Maĩ na aũme aingĩ ma kaũ, na nĩmamathĩnasya Aisilaeli mũno. Ĩvinda yĩmwe, Samusoni aendete kũla Avilisiti mekalaa, mũnyambũ mũnene nĩwookie na kũla ũĩ ũtundumĩte. Ĩndĩ Samusoni ooaa mũnyambũ ũsu na moko mathei. Na ĩngĩ nĩwooaie Avilisiti athũku maana maingĩ.

Ĩtina Samusoni nĩwendanie na mũndũ mũka weetawa Ndelila. Atongoi ma Avilisiti nĩmathanie kana kĩla ũmwe woo akanenga Ndelila ilungu 1,100 sya vetha ethwa akamatavya kĩla kĩtumaa Samusoni ethĩwa na vinya mwingĩ. Ndelila nĩwendaa mbesa isu syonthe. We ndaĩ mũnyanyae wa w’o wa Samusoni, kana wa andũ ma Ngai. Kwoou aendeea na kũkũlya Samusoni kĩla kĩtumaa ethĩwa na vinya mwingĩ ũu.

Ndelila na Samusoni

Ĩtina vyũ, Ndelila nĩwatumie Samusoni amũtavya kĩmbithĩ kya vinya wake ayasya, ‘Nzw’ĩĩ yakwa ndyaaenzwa o na ĩndĩĩ. Kuma kũsyawa kwakwa, Ngai anyuvie nĩtw’ĩke mũthũkũmi wake wa mwanya wĩtawa Mũnasili. Nzw’ĩĩ yakwa ĩkenzwa, no nasye vinya wakwa.’

Kwoou ĩndĩ, Ndelila amanya ũu, akomya Samusoni too maũũnĩ make. Na ĩndĩ eeta mũndũ ooka na eenza nzw’ĩĩ yake. Yĩla Samusoni waamũkie eethĩa ndena vinya. Na ĩndĩ Avilisiti mooka na mamũkwata. Na mavũthũanga metho make elĩ, na mamũtw’a ngombo yoo.

Samusoni aiomboa ituĩ

Mũthenya ũmwe Avilisiti nĩmavokie mboka nene nĩ kana mathaithe ngai yoo Ndakoni, na maete Samusoni kuma kolokolonĩ nĩ kana mamũthekee. Kũvikĩa ĩvinda yĩu, nzw’ĩĩ yake yaĩ ĩneana ĩngĩ. Na Samusoni eea kĩmwana kĩla kyamũtongoesye kĩmũkwete kw’oko: ‘Eka ngwate itũĩ ila iũngamĩtye nyũmba ĩno.’ Na ĩndĩ Samusoni avoya Yeova amunenge vinya, na akwata ila itũĩ. Na aneena na wasya mũnene: ‘Eka nĩkw’e vamwe na Avilisiti.’ Vaĩ na Avilisiti ta 3,000 mbokanĩ ĩsu, na Samusoni asukuma ituĩ isu na vinya wake w’onthe na nyũmba yavalũka na yooaa andũ asu onthe athũku

Asili kĩlungu kya 13 nginya 16.



Makũlyo

  • Mũndũ ũla waĩ vinya vyũ kũthonoka andũ onthe ĩũlũ wa nthĩ eetawa ata, na vinya ũsu wake anengetwe nũũ?
  • Ĩvinda yĩmwe, Samusoni eekanie na mũnyambũ ata, tondũ ũtonya kwona vaa visanĩ?
  • Nĩ kĩmbithi kyaũ Samusoni ũnũũtavya Ndelila vaa visanĩ, na ũndũ ũsu watumie ata akwatwa nĩ Avilisiti?
  • Samusoni amoaie ata amaitha 3,000 Avilisiti mũthenya ũla we wakwie?

Makũlyo ma kwongeleela

  • Soma Asili 13:1-14.

    Manoa na mũka moonanisye ngelekany’o nzeo ata kwa asyai ĩũlũ wa kũea syana syoo? (Asi. 13:8; Sav. 127:3; Aev. 6:4)

  • Soma Asili 14:5-9 na 15:9-16

    Ngewa ya Samusoni ya kũaa mũnyambũ, kũtw’a makanda meũ, kũtũmĩa ũkambu wa ĩng’oi kũaa aũme 1,000 yĩvuany’a kyaũ ĩũlũ wa ũndũ veva Mũtheu wa Yeova ũtethasya wĩa?

    Veva mũtheu ũtũtethasya ithyĩ ata ũmũnthĩ? (Asi. 14:6; 15:14; Nzek. 4:6; Meko 4:31)

  • Soma Asili 16:18-31.

    Samusoni eekiwe ata nĩ itindo nthũku, na tũtonya kwĩmanyĩsya kyaũ kumana na ũndũ ũsu? (Asi. 16:18, 19; 1 Ako. 15:33)