Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 45: Kũinga Ũsĩ wa Yolotani

Ngewa ya 45: Kũinga Ũsĩ wa Yolotani

KWASISYA! Aisilaeli maendee na kũinga Ũsĩ wa Yolotani! Nũndũ mbua mbingĩ yuaa ĩvinda yĩu ya mwaka, o ndakĩka nini nthelu ũsĩ wĩĩ musũu vyũ. Ĩndĩ yu vaiĩ kĩw’ũ! Na Aisilaeli maendee na kũinga ũsĩ makinyĩle nthĩ nyũmũ o tondũ meekie kũya Ũkanganĩ Mũtune! Kĩw’ũ kyu kyonthe kyathi va? Ekai twone.

Aisilaeli mayĩinga ũsĩ wa Yolotani

Yĩla ĩvinda ya Aisilaeli yavikie ya kũinga Ũsĩ wa Yolotani, ũũ nĩw’o Yeova weeie Yosua nĩatavye andũ: ‘No mũvaka athembi makue ĩsandũkũ ya ũtianĩo na maithi mbee witũ. Na yĩla nyaĩĩ syoo ikakinya nthĩ kĩw’ũnĩ kya Ũsĩ wa Yolotani, kĩw’ũ kĩkavingĩwa.’

Kwoou athembi mookĩlya ĩsandũkũ ya ũtianĩo, na mayĩkua na maenda mbee wa andũ. Yĩla mavikie Yolotani, athembi makinya kĩw’ũnĩ ũtee. Nakyo kĩw’ũ kyasembete na vinya mũno na ũsĩ waĩ mũliku. Ĩndĩ nyaĩĩ syoo syamina kũkinya kĩw’ũ oou, kĩw’ũ kyaũngama! Kyu kyaĩ kyama! Ngalĩko ya ĩũlũ ya ũsĩ Yeova asiĩĩie kĩw’ũ ta silanga. Kwoou, o mĩtũkĩ ũsĩ wang’ala!

Athembi ala makuĩte ĩsandũkũ ya ũtianĩo mathi nginya ũsĩnĩ katĩ. We nũmene vaa visanĩ? Na maũngamĩte vau, Aisilaeli onthe mainga Ũsĩ wa Yolotani makinyĩle nthĩ nyũmũ!

Yĩla andũ onthe maminie kũinga, Yeova eea Yosua amatavye ũũ aũme me vinya 12: ‘Likai ũsĩnĩ nginya vala athembi ala makuĩte ĩsandũkũ ya ũtianĩo maũngamĩte. Osai mavia 12, na mũimakua mũkamaie o vala mwĩkoma ũtukũ ũũ. Nĩvo ĩndĩ, ĩvinda yĩla yũkĩte, yĩla syana syenyu ikamũkũlya kĩla mavia asu meonany’a, no nginya mwĩsyĩa kana kĩw’ũ nĩkyaũngamie yĩla ĩsandũkũ ya Yeova ya ũtianĩo yaingie Yolotani. Mavia asu makamũlilikany’a kyama kĩĩ!’ Na ĩngĩ Yosua nĩwaũngamisye mavia 12 ũsĩnĩ katĩ vala athembi maũngamĩte.

Yosua

Na ĩtina vyũ Yosua eea athembi ala makuĩte ĩsandũkũ ya ũtianĩo: ‘Ambatai mume Yolotani.’ Na mamina kwĩka ũu, ũsĩ wambĩĩa kũvĩtya kĩw’ũ ĩngĩ.

Yosua 3:1-17; 4:1-18.



Makũlyo

  • Yeova eekie kyama kĩva nĩ kana Aisilaeli matonye kũinga Ũsĩ wa Yolotani?
  • Aisilaeli maĩlĩtwe nĩkwĩka ũndũ mwaũ wa kwonany’a mũĩkĩĩo woo nĩ kana mainge Ũsĩ wa Yolotani?
  • Nĩkĩ Yeova weeie Yosua nĩombany’e mavia manene 12 kuma ũsĩnĩ katĩ?
  • Kweekĩkie ata athembi mamina kuma Yolotani oou?

Makũlyo ma kwongeleela

  • Soma Yosua 3:1-17.

    O tondũ ngewa ĩno ĩnĩkwonany’a, twaĩlĩtwe nĩkwĩka ata nĩ kana tũkwate ũtethyo na ũathimo wa Yeova? (Yos. 3:13, 15; Nth. 3:5; Yak. 2:22, 26)

    Ũsĩ wa Yolotani wailyĩ ata yĩla Aisilaeli maingie mailika Nthĩ ya Watho, na ũndũ ũsu wakumisye syĩtwa ya Yeova ata? (Yos. 3:15; 4:18; Sav. 66:5-7)

  • Soma Yosua 4:1-18.

    Mavia ala 12 moosiwe kuma Yolotani na maiwa Ngilikali maĩ ma wĩa mwaũ? (Yos. 4:4-7)