Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 42: Ĩng’oi Yĩineena

Ngewa ya 42: Ĩng’oi Yĩineena

WE WAAĨW’A ũvoo wa ĩng’oi yĩineena? Nũtonya kwasya, ‘Aiee, nyamũ iitonya kũneena.’ Ĩndĩ Mbivilia nĩwetaa ũvoo wa ĩng’oi yaneenie. Ekai twone kweethĩiwe ũu ata.

Mũlaĩka

Aisilaeli maĩ vakuvĩ vyũ kũlika nthĩ ya Kanaani. Mbalaki, mũsumbĩ wa Amoavi, nĩwakĩaa Aislaeli. Kwoou atũmana mũndũ mũĩ weetawa Mbalaamu aende akamaumanĩe Aisilaeli. Mbalaki nĩwamwathie Mbalaamu mbesa mbingĩ mũno. Kwoou Mbalaamu alĩsa ĩng’oi yake na ambĩĩa kyalo kya kũthi kwona Mbalaki.

Yeova ndendaa Mbalaamu aumanĩe andũ Make. Kwoou atũma mũlaĩka wĩ na ũvyũ mũasa aũngame nzĩanĩ amũsiĩĩe Mbalaamu. Mbalaamu ndamwene mũlaĩka ũsu, ĩndĩ ĩng’oi nĩyamwene. Kwoou ĩng’oi yatata ĩngĩ na ĩngĩ kwelelũka mũlaĩka, na ĩtina yatindia nzĩanĩ. Mbalaamu nĩwathilĩkile mũno na akũna ĩng’oi yake na ndata.

Ĩndĩ Yeova atuma Mbalaamu ew’a ĩng’oi yake yĩineena nake. Nayo yamũkũlya, ‘Nĩkwĩkie ata, ũndũ ũkwatie ũngũna?’

Mbalaamu e ĩũlũ wa ĩng’oi

Nake Mbalaamu asya, ‘Wĩtuma noneka nĩ mũtumanu. Kethĩwa nĩna ũvyũ nĩũkũaa!’

Nayo ĩng’oĩ yamũkũlya. ‘Nyie naakwĩka ũu ĩngĩ?’

‘Aiee,’ Mbalaamu asũngĩa.

Ĩndĩ Yeova asalukya metho ma Mbalaamu one mũlaĩka ũsu waũngamĩte nzĩanĩ akwete ũvyũ. Mũlaĩka ũsu asya: ‘Wakũna ĩng’oi yaku nĩkĩ? Nũkĩte ũkũsiĩĩa, kĩtumi nũndũ ndwaĩlĩte kũthi kũumanĩa Aisilaeli. Kethĩwa ĩng’oi yaku yĩinathũka mbee wakwa, nĩthĩwa nakũaa, ĩndĩ ndyĩthĩwa nayĩkiita.’

Nake Mbalaamu asya: ‘Nĩnĩvĩtĩtye. Ndyĩĩsĩ kana nĩwĩũngamĩte nzĩanĩ.’ Mũlaĩka nĩwaekie Mbalaamu athi, na Mbalaamu aendeea na mbee akone Mbalaki. O na kũilyĩ ũu no watatie kũumanĩa Aisilaeli, ĩndĩ, vandũ va kũmaumanĩa, Yeova atuma amaathima mavinda atatũ.

Motalo 21:21-35; 22:1-40; 23:1-30; 24:1-25.



Makũlyo

  • Ĩng’oi ya Mbalaamu yatindiie nzĩanĩ nĩkĩ?
  • Mbalaki nũũ, na etũmana Mbalaamu nĩkĩ?
  • Mbalaamu eewie ĩng’oi yake yĩyasya ata?
  • Mũlaĩka eeie Mbalaamu ata?
  • Kwaendie ata yĩla Mbalaamu watatie kũumanĩa Aisilaeli?

Makũlyo ma kwongeleela

  • Soma Motalo 21:21-35.

    Nĩkĩ Aisilaeli masindie Sioni mũsumbĩ wa Aamoli na Oku mũsumbĩ wa Mbasani? (Mot. 21:21, 23, 33, 34)

  • Soma Motalo 22:1-40.

    Nĩ kyaũ kyatumie Mbalaamu atata kũumanĩa Aisilaeli, na nĩ ĩsomo yaũ tũtonya kwĩmanyĩsya kuma ũvoonĩ ũsu? (Mot. 22:16, 17; Nth. 6:16, 18; 2 Vet. 2:15; Yuta 11)

  • Soma Motalo 23:1-30.

    O na kau Mbalaamu aneenaa ta mũthaithi wa Yeova, meko make moonanisye ata kana ũu tiw’o? (Mot. 23:3, 11-14; 1 Sam. 15:22)

  • Soma Motalo 24:1-25.

    Ngewa ĩno ya Mbivilia yĩongeleela mũĩkĩĩo witũ vinya ata ĩũlũ wa kwĩanĩa kwa ĩeleelo sya Yeova? (Mot. 24:10; Isa. 54:17)