Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 39: Ndata ya Aluni Nĩyalaũkile Malaa

Ngewa ya 39: Ndata ya Aluni Nĩyalaũkile Malaa

KWASISYA malaa na malosi aa meu mathongooete ndatanĩ ĩno, kana mũtĩ. Ĩno nĩ ndata ya Aluni. Malaa na matunda asu meu mathongooie ndatanĩ ya Aluni ũtukũ o ũmwe tũ! Ekai twone kĩtumi nĩkĩ.

Mose aimũnenga Aluni ndata ĩmeete malaa

Kwa ĩvinda yĩana ũna, Aislaeli methĩĩtwe mayanganga weũnĩ. Andũ amwe mayoonaa Mose ta we waĩlĩte kwĩthĩwa e mũtongoi, kana Aluni ta we waĩlĩte kwĩthĩwa e mũthembi mũnene. Kola aĩ ũmwe ũla wasũanĩaa ũu, o na Ndathani, Avilamu na atongoi angĩ ma andũ 250. Aa onthe mookie na meea Mose: ‘Nũndũ wa kĩ ũkwĩtũlya ĩũlũ witũ?’

Nake Mose eea Kola na aatĩĩi make: ‘Ũnĩ kĩoko mwĩosa itoeesya sya mwaki na mũyĩkĩa ũvani nthĩnĩ wasyo. Na ĩndĩ mũkyũka ĩeemanĩ ya Yeova. Na tũkoona nũũ ũla Yeova wĩnyuva.’

Na mũthenya ũla watĩĩe Kola na aatĩĩi make 250 mooka ĩeemanĩ ya kũmbanĩa. Andũ angĩ aingĩ nĩmookie nĩ kana mamekĩe vinya aũme asu. Yeova aĩ mũthilĩku mũno. Na Mose asya: ‘Umai maeemanĩ ma andũ aa athũku, mũikakiite kĩndũ o na kĩmwe kyoo.’ Na andũ meew’a na mauma vakuvĩ na maeema ma Kola, Ndathani na Avilamu.

Na ĩndĩ Mose asya: ‘Kwondũ wa ũũ mũkamanya ũla Yeova ũnyuvĩte. Nthĩ ĩkathamya na kũmelya andũ aa athũku.’

Na Mose amina kũneena oou, nthĩ yaathamya. Ĩeema ya Kola na syĩndũ syake na Ndathani na Avilamu na ala maĩ vamwe namo mamelw’a nĩ nthĩ, na yamatumisya. Na yĩla andũ meewie ngayaĩ ya asu matheete nthĩ, maneena na wasya mũnene mayasya: ‘Tũkĩei! Nthĩ ndĩkatũmelye o naitũ!’

Kola na aatĩĩi make 250 maĩ o vakuvĩ na ĩeema ya kũmbanĩa. Kwoou Yeova aete mwaki, na onthe mavya. Na ĩndĩ Yeova eea Eleasali mwana-a-Aluni ose itoeesya sya mwaki sya aũme asu akw’ũ na akĩimanda itw’ĩke ngunĩko mbũthũ ya kũvw’ĩka kĩthembeo. Ngunĩko ĩsu yaĩ ya kũlilikanasya Aisilaeli kana, vaiĩ mũndũ o na ũmwe eka Aluni na ana make waĩlĩte kũtethya wĩa ta mũthembi wa Yeova.

Ĩndĩ Yeova eendaa kũmanyĩke vyũ kana no Aluni na ana make oka ũnyuvĩte methĩwe athembi. Kwoou eea Mose: ‘Ĩa kĩla mũnene wa nyũmba ya Isilaeli aete ndata yake. Na kwondũ wa nyũmba ya Livai, ĩa Aluni aete ndata yake. Na ũkaia kĩla ĩmwe ya ndata isu ĩeemanĩ ya kũmbanĩa ngalĩ ya mbee ya ĩsandũkũ ya ũtianĩo. Na ndata ya mũndũ ũla nĩnyuva ta mũthembi ĩkalaũka malaa.’

Na ũnĩ ũsu kĩoko yĩla Mose wasyaisye, sisya, ndata ya Aluni nĩyalaũkĩte malaa aa na ĩkasyaa malosi aya meu! Kwoou yu we nũkwona nĩkĩ Yeova watumie ndata ya Aluni ĩlaũka malaa?

Motalo 16:1-49; 17:1-11; 26:10.



Makũlyo

  • Naaũ mang’endeie ũnene wa Mose na Aluni, na meeie Mose ata?
  • Mose atavisye Kola na aatĩĩi make 250 meke ata?
  • 3. Mose eeie andũ ata, na kweekĩkie ata amina kũneena oou?
  • Nĩ kyaũ kyakwatie Kola na aatĩĩi make 250?
  • Eleasali mwana wa Aluni, eekanie ata na itoeesya sya mwaki sya andũ ala makwie, na nĩkĩ?
  • Yeova atumie ndata ya Aluni ĩlaũka malaa nĩkĩ? (Sisya visa.)

Makũlyo ma kwongeleela

  • Soma Motalo 16:1-49.

    Kola na aatĩĩi make meekie ata, na nĩkĩ yĩu yaĩ yĩko ya kũmũng’endea Yeova? (Mot. 16:9, 10, 18; Ali. 10:1, 2; Nth. 11:2)

    Nĩ woni mwaũ mũthũku ũla Kola na “anene ma ũmbano” 250 maekie wĩthĩwe ngoonĩ syoo? (Mot. 16:1-3; Nth. 15:33; Isa. 49:7)

  • Soma Motalo 17:1-11 na 26:10.

    Kũthongooa kwa ndata ya Aluni kwoonanisye kyaũ, na nĩkĩ Yeova waisye nĩyiwe ĩsandũkũnĩ ya ũtianĩo? (Mot. 17:5, 8, 10; Aevl. 9:4)

    Nĩ ĩsomo yaũ ya vata tũĩmanyĩsya kumana na wonany’o wa ndata ya Aluni? (Mot. 17:10; Meko 20:28; Avi. 2:14; Aevl. 13:17)