Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 35: Yeova Ainengane Mĩao Yake

Ngewa ya 35: Yeova Ainengane Mĩao Yake

TA MYEI ĩlĩ ũu ĩtina wa kuma Misili, Aisilaeli nĩmavikie Kĩĩmanĩ kya Sinaĩ, kana Olevu. Vau no vo vala Yeova waneeneie na Mose kuma kakuthunĩ kakanĩte mwaki. Aisilaeli mambie maeema vau na mekala vo kwa kavinda.

Na andũ meteele ĩtheo, Mose ambata kĩĩmanĩ. Vau kĩĩmanĩ ĩũlũ, Yeova nĩweeie Mose kana nũkwenda Aisilaeli mamwĩw’e We na maitw’ĩka andũ Make ma mwanya. Yĩla Mose watheeie ĩtheo nĩwatavisye andũ ũndũ Yeova waisye. Namo andũ masya nĩmakamwĩw’aa Yeova, nũndũ nĩmekwenda kũtw’ĩka andũ make.

Yeova ĩndĩ nĩweekie ũndũ ũeni. Nĩwatumie mũthya wa kĩĩma ũtoa syũki, na atuma kwĩthĩwa na kĩtandalĩki kĩnene. Na ĩngĩ aneena na andũ ayasya: ‘Nyie ninyie Yeova Ngai wenyu, ũla wamumisye nthĩ ya Misili.’ Na ĩndĩ ameĩaĩa: ‘Mũikaathaithe Ngai ĩngĩ ate o nyie.’

Masengea elĩ ma mavia

Ngai nĩwanengie Aisilaeli mĩao ĩngĩ kenda. Andũ maĩ na w’ĩa mũno. Na meea Mose: ‘Neena naitũ we, nĩkwĩthĩwa ithyĩ nĩtũũkĩa ethĩwa Ngai akaneena naitũ nĩtũtonya ũkw’a.’

Ĩtina Yeova eea Mose: ‘Ambata vaa nĩĩ kĩĩmanĩ na ngaũnenga masengea ma mavia ala nĩandĩkĩte mĩao ĩla ngwenda andũ makwate.’ Kwoou Mose ambata ĩngĩ kĩĩmanĩ. Na Mose ekala kũu mĩthenya na motukũ 40.

Ngai aĩ na mĩao ĩngĩ mingĩ ya kũmanenga andũ make. Na Mose amĩandĩka. Ĩngĩ Ngai nĩwamũnengie Mose ala masengea elĩ ma mavia. Ĩũlũ wamo, Ngai mwene nĩwaandĩkĩte mĩao 10 ĩla watavĩtye andũ onthe. Nayo yĩtawa Mĩao Ĩkũmi.

Mose e kĩĩmanĩ kya Sinai

Mĩao ĩsu ĩkũmi nĩ ya vata mũno. Na now’o mĩao ĩngĩ mingĩ ĩla Ngai wanengie Aisilaei ĩilyĩ. Ũmwe wa mĩao ĩsu nĩ: ‘No nginya ũmwende Yeova Ngai waku na ngoo yaku yonthe, na kĩlĩko kyaku kyonthe, na thayũ waku w’onthe, na vinya waku w’onthe.’ Na ũngĩ nĩ: ‘No nginya ũmwende mũtũi waku o tondũ wĩyendete.’ Yesũ Klĩsto Mwana wa Ngai, aisye ĩsu nĩyo mĩao ĩlĩ mĩnene vyũ ĩla Yeova wanengie andũ make Isilaeli. Ĩtina tũkeemanyĩsya ĩũlũ wa Mwana wa Ngai na momanyĩsyo make.

Kuma 19:1-25; 20:1-21; 24:12-18; 31:18; Kũtũngĩlĩlwa Kwa Mĩao 6:4-6; Alivai 19:18; Mathayo 22:36-40.



Makũlyo

  • Ta myei ĩlĩ ĩtina wa kuma Misili, Aisilaeli mambie maeema va?
  • Yeova aisye eenda andũ meke ata, na andũ masũngĩie ata?
  • Yeova anengie Mose masengea elĩ ma mavia nĩkĩ?
  • O vamwe na Mĩao Ĩkũmi, nĩ myamũlo ĩngĩ yĩva Yeova wanengie Aisilaeli?
  • Nĩ mĩao ĩlĩ yĩva Yesũ Klĩsto waisye nĩyo mĩnene?

Makũlyo ma kwongeleela

  • Soma Kuma 19:1-25; 20:1-21; 24:12-18; na 31:18.

    Ndeto ila iandĩkĩtwe nthĩnĩ wa Kuma 19:8 itũtetheeasya ata kũelewa kĩla kyendekaa nĩ kana mũndũ eyumye atw’ĩke Mũklĩsto? (Mt. 16:24; 1 Vet. 4:1-3)

  • Soma Kũtũngĩlĩlwa Kwa Mĩao 6:4-6; Alivai 19:18; na Mathayo 22:36-40.

    Aklĩsto monanasya ata wendo woo kwa Ngai na kwa mũtũi? (Mko. 6:34; Meko 4:20; Alo. 15:2)