Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 34: Lĩu wa Mũthemba Mweũ

Ngewa ya 34: Lĩu wa Mũthemba Mweũ

WE NŨTONYA kũweta nĩ kyaũ andũ meũkolany’a nthĩ? Kĩilyĩ ta mavia ma mbalavu. Nĩ kyeũ, na nĩkĩũtilĩkanga tũlungu tũnini. Ĩndĩ ti mavia ma mbalavu, nĩ kĩndũ kya ũya.

Aisilaeli maikolany’a mana

Nĩ ta mwei ũmwe kuma Aisilaeli mauma Misili. Mo me o weũnĩ. Nĩ lĩu mũnini ũĩmawa vaa, na kwoou manyungunyĩsya mayasya: ‘Twenda kethĩwa Yeova anatũaĩe Misili. Yĩla twaĩ kũu twaĩ na lĩu w’onthe ũla twendaa.’

Kwoou Yeova amea: ‘Ngamuĩsya mbua ya lĩu kuma ĩtunĩ.’ Na ũu nĩw’o Yeova weekie. Ũnĩ ũsu kwakya, Aisilaeli nĩmoonie kĩndũ kyeũ kyavalũkĩte nthĩ, namo makũlany’a ene kwa ene: ‘Nĩ kyaũ kĩĩ?’

Nake Mose amea: ‘Nĩ lĩu ũla Yeova ũmũnengete mũye.’ Andũ mawĩtie MANA. Wasamaa ta imũtũ ntheke iuĩtwe na ũkĩ wa nzũkĩ.

Na Mose eea andũ, ‘Kolany’ai kwĩanana na ũndũ kĩla mũndũ ũĩsaa.’ Kwoou meekaa ũu o kĩla kĩoko. Na ĩndĩ syũa yavyũva, mana ĩla yeethĩawa ĩtialĩte ĩũlũ wa nthĩ, nĩyatwekaa.

Na ĩngĩ Mose amea: ‘Mũndũ o na wĩva ndakatialye kũvika kĩoko mũthenya ũla ũatĩĩe.’ Ĩndĩ andũ amwe mayaaĩthukĩĩsya. We nĩwĩsĩ ũndũ kwaendie? Ũnĩ ũsu kĩoko, mana ĩla matialilye nĩyeethĩiwe na iinyũ na yambĩĩa kũnyunga naĩ!

Ĩndĩ kwaĩ mũthenya ũmwe nthĩnĩ wa kyumwa ũla Yeova weeie andũ makolany’e mana ĩsu kũndũ kwĩlĩ. Ũsu waĩ mũthenya wa thanthatũ. Na Yeova asya maie mana ĩmwe kũvika kĩoko mũthenya ũla waatĩĩe, nũndũ ndakamĩete mũthenya wa mũonza. Na yĩla maiie ũtukũ w’onthe kũvika mũthenya wa mũonza, ndyaaĩthĩwa na iinyũ na ndyaanyunga naĩ! Kĩu kyaĩ kyama kĩng

Yeova amanengie Aisilaeli mana myaka yonthe ĩla maĩ weũnĩ.

Kuma 16:1-36; Motalo 11:7-9; Yosua 5:10-12.



Makũlyo

  • Vaa visanĩ, nĩ kyaũ andũ meũkolany’a nthĩ, na kĩtawa ata?
  • Nĩ mwĩao mwaũ Mose wanengie andũ ĩũlũ wa kũkolany’a mana?
  • Yeova eeie andũ nĩmeke ata mũthenya wa thanthatũ, na nĩkĩ?
  • Nĩ kyama kĩva Yeova weekie yĩla mana yaiiwe kũvika mũthenya wa mũonza?
  • Yeova anengie andũ mana ĩvinda yĩana ata?

Makũlyo ma kwongeleela

  • Soma Kuma 16:1-36 na Motalo 11:7-9.

    Ĩandĩko ya Kuma 16:8 yĩonany’a ata vata wa ithyĩ kũnenga ndaĩa andũ ala manyuvĩtwe ta asyaĩĩsya ma kĩkundi kya Kĩklĩsto? (Aevl. 13:17)

    Yĩla maĩ weũnĩ, Aislaeli malilikanaw’a ata kĩla mũthenya kana Yeova nĩwe wamasũvĩaa? (Kuma 16:14-16, 35; Kũt. 8:2, 3)

    Yesũ anenganie ũalyũlo mwaũ wa kĩla mana yaelekanasya, na ithyĩ tũunĩkaa ata kumana na “kĩmũtũ kĩĩ kya kũma ĩtunĩ”? (Yoa. 6:31-35, 40)

  • Soma Yosua 5:10-12.

    Aisilaeli maĩe mana myaka yĩana, na ũu wamatatie ata, naitũ tũtonya kwĩmanyĩsya kyaũ kumana na ngewa ĩsu? (Kuma 16:35; Mot. 11:4-6; 1 Ako. 10:10, 11)