Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 6: Mwana Mũseo na Ũngĩ Mũthũku

Ngewa ya 6: Mwana Mũseo na Ũngĩ Mũthũku

KWAMASISYE Kaini na Aveli. Elĩ maĩ andũ aima. Kaini aĩ mũĩmi. Aĩmaa lĩu wa mbaa ngetha na matunda vamwe na mboka.

Kaini na Aveli maithembea Ngai

Aveli nake aĩ mũĩthi wa malondu. Nĩwendete kũsũvĩa tũtena twa malondu. Nĩtweanie na twatw’ĩka malondu, na ĩndĩ ĩtina wa kavinda kanini Aveli aĩ na ndĩthya nene ya malondu.

Mũthenya ũmwe Kaini na Aveli nĩmaeteie Ngai mũthĩnzĩo. Kaini aetie mosyao amwe ma ngetha. Nake Aveli aete malondu ala maseo vyũ waĩ namo. Yeova nĩwendeeiw’e nĩ Aveli na mũthĩnzĩo wake. Ĩndĩ ndaaendeew’a nĩ Kaini na mũthĩnzĩo wake. We nĩwĩsĩ nĩkĩ?

Ti kwĩthĩwa mũthĩnzĩo wa Aveli waĩ mũseo kwĩ wa Kaini. Ĩndĩ nũndũ Aveli aĩ mũndũ mũseo. We nĩwamwendete Yeova na mwana-a-inyia. Ĩndĩ Kaini aĩ mũthũku na ndamwendete mwana-a-inyia.

Kwoou Ngai amwĩa Kaini nĩalyũle mĩendele yake. Ĩndĩ alea kwĩw’a. Aĩ na woo mwingĩ nũndũ Ngai nĩwendete Aveli mũnango. Kwoou Kaini amwĩa Aveli, ‘Tũthi kĩsesinĩ.’ Kũu me oka, Kaini nĩwamũkũnie mwana-a-inyia Aveli. Amũkũnie mũno nginya amũaa. Ũndũ ũsu Kaini weekie waĩ mũthũku mũno.

Kaini akĩĩte ooaa Aveli

O na vala Aveli nĩwakwie, o na yu Ngai no ũmũlilikanaa. Aveli aĩ mũndũ mũseo na Yeova ndolawa nĩ mũndũ mũseo. Kwoou mũthenya ũmwe Yeova nũkamũthayũũkya Aveli. Ĩvinda yĩu vaikethĩwa na kĩtumi kya Aveli akw’e ĩngĩ. Akeethĩwa atonya kwĩkala vaa nthĩ tene na tene. Ũkeethĩwa wĩ ũndũ mũseo ta kĩ kũmanyana na andũ mailyĩ ta Aveli!

Ĩndĩ Ngai ndendeeaw’a nĩ andũ mailyĩ ta Kaini. Kwoou ĩtina wa Kaini kũaa mwana-a-inyia, Ngai nĩwamũsilĩile kwa kũmũlũngya athi kũasa vyũ na andũ ala angĩ ma mũsyĩ woo. Yĩla Kaini waendie kwĩkala ngalĩko ĩngĩ ya nthĩ nĩwoosie ũmwe wa eĩtu-a-inyia na atw’ĩka mũka.

Ĩvinda o yĩendee Kaini na mũka nĩmambĩĩie kwĩthĩwa na syana. Ana ala angĩ na eĩtu ma Atamu na Eva nĩmatwaanie na o namo meethĩwa na syana. Ĩtina wa ĩvinda ĩkuvĩ nĩkweethĩiwe na andũ aingĩ ĩũlũ wa nthĩ. Ekai twĩmanyĩsye ĩũlũ wa amwe moo.

Mwambĩlĩlyo 4:2-26; 1 Yoana 3:11, 12; Yoana 11:25.



Makũlyo

  • Nĩ mawĩa maũ Kaini na Aveli matethasya?
  • Kaini na Aveli maeteie Yeova nthembo myaũ?
  • Nĩkĩ Yeova wendeeiw’e nĩ nthembo ya Aveli na nĩkĩ ũtaaendeew’a nĩ ya Kaini?
  • Kaini aĩ mũndũ wa mũthemba mwaũ na Yeova atatie ata kwenda kũmũalyũla?
  • Kaini eekie ata yĩla maĩ oka ena mwana-a-inyia kĩsesinĩ?
  • Elesya ũndũ kweekĩkie kwa Kaini amina kũaa mwana-a-inyia?

Makũlyo ma kwongeleela

  • Soma Mwambĩlĩlyo 4:2-26.

    Yeova aeleisye ata ĩũlũ wa mwelekelo wa mũisyo ũla Kaini waatĩĩe? (Mwa. 4:7)

    Kaini oonanisye mwelekelo mwaũ mũthũku wa ngoo yake? (Mwa. 4:9)

    Woni wa Yeova nĩ mwaũ ĩũlũ wa kwĩta nthakame ĩte ĩvĩtyo? (Mwa. 4:10; Isa. 26:21)

  • Soma 1 Yoana 3: 11, 12.

    Nĩkĩ Kaini wathatie mũno na ũndũ ũsu nĩ ũkany’o ata kwitũ ũmũnthĩ? (Mwa. 4:4, 5; Nth. 14:30; 28:22)

    Mbivilia yonanasya ata kana o na ethĩwa andũ ala angĩ onthe ma mũsyĩ nĩmeũmũvĩnga Yeova, no tũendeee kwĩlũmya nthĩnĩ wa wĩanĩu witu kwa Ngai? (Sav. 27:10; Mt. 10:21, 22)

  • Soma Yoana 11:25.

    Nĩ wĩkwatyo mwaũ ũla Yeova ũnengete ala makusaa kwondũ wa ũlũngalu? (Yoa. 5:24)