Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 10: Kĩla Kĩw’ũ Kingĩ

Ngewa ya 10: Kĩla Kĩw’ũ Kingĩ

NZA wa ngalawa, andũ maendeeie na mwĩkalo woo o ta tene. Mayaĩ maaĩsa kũĩkĩĩa kana Kĩw’ũ Kingĩ kĩkooka. No nginya methĩwe mathekeeaa Noa kũthonoka vu mbeenĩ. Ĩndĩ o mĩtũkĩ nĩmaekie kũmũthekeea.

Andũ atelemu na nyamũ mathyũlũlũkĩtwe nĩ kĩw’ũ kingĩ

Kwa kaveny’a kĩw’ũ nĩkyambĩlĩĩilye kwĩtĩka. Kyetĩkie kuma matunĩ o tondũ wĩtaa kĩw’ũ kuma ndoonĩ. Noa awetete w’o! Ĩndĩ yu vaiĩ mũndũ ona wĩva waĩ atonya kũlika ngalawanĩ, nũndũ ĩvinda ya kũlika yaĩ ĩvĩtu. Mũomo waĩ mũvinge ki nĩ Yeova.

O mĩtũkĩ nthĩ yonthe ĩla ndindimalu nĩyavw’ĩkiwe nĩ kĩw’ũ. Kĩw’ũ kyeethĩiwe o tondũ woonaa mbũsĩ nene. Nĩkyasukumie itĩ na kyavingilitya nthũngũ sya mavia, na kyaete kĩuumo kĩnene. Andũ nĩmakwatiwe nĩ w’ĩa. Malĩsile kũla kũtũlangu. Mwa! Keka tyo mamwĩthukĩĩisye Noa na kũlika ngalawanĩ yĩla mũomo waĩ mũvingũe! Ĩndĩ kũvikĩa yu maĩ aselee mũno.

Kĩw’ũ nĩkyaendeeie na kwingĩva na kwambatĩĩa. Kyetĩkie kuma yayayanĩ mĩthenya 40 na motukũ 40. Nĩkyaendeeie kwambata na kyavw’ĩka nguumo wa iĩma, na o mĩtũkĩ ĩima ila ndaasa mũno syavw’ĩkwa. Kwoou o tondũ Ngai waĩtye, andũ onthe ala maĩ nza wa ngalawa nĩmakwie o vamwe na nyamũ. Ĩndĩ kyonthe kĩla kyaĩ nthĩnĩ wa ngalawa kĩyaĩ mũisyonĩ.

Noa na ana make nĩmatethisye wĩa mũseo wa kwaka ngalawa. Kĩw’ũ nĩkyamyũkĩlilye na kyamĩthambalalya. Na ĩndĩ mũthenya ũmwe mbua yakya na syũa yambĩĩa kwaa. Waĩ ũndũ wa ũsengy’o ta kĩ! Kwaĩ ũkanga o ũmwe wausĩe kĩla vandũ. No ngalawa yoka yoonekaa ĩthambalele ũkanganĩ.

Ngalawa ĩthambalalĩte ĩũlũ wa kĩw’ũ

Ala mamũndũ mayaĩ vo ĩngĩ. Mayaĩ vo ĩngĩ kũũmĩsya andũ. Onthe maĩ manakw’a, o vamwe na aainyia moo na andũ ala angĩ athũku. Ĩndĩ kweethĩiwe ata kwa aaĩthe moo?

Aaĩthe ma mamũndũ asu mayaĩ andũ taitũ. Maĩ alaĩka ala mookĩte kwĩkala ta andũ kũũ nthĩ. Na ĩndĩ yĩla Kĩw’ũ Kingĩ kyookie, mo mayaakw’a vamwe na andũ ala angĩ. Nĩmaekie kũtũmĩa ĩla mĩĩ ya kĩmũndũ maĩ maneeseũvĩsya, na ĩndĩ masyoka ĩtunĩ me alaĩka. Ĩndĩ mayaaĩtĩkĩlw’a mavulane na alaĩka ala angĩ ewi ma Ngai. Kwoou nĩ matw’ĩkie alaĩka ma Satani. Nthĩnĩ wa Mbivilia alaĩka asu metawa ndaimoni.

Na Ngai ĩndĩ aete kĩuutani, na kĩla kĩw’ũ kingĩ kyambĩĩa kũng’ala. Myei ĩtano yathela ngalawa nĩyatw’ĩĩkanie kĩĩmanĩ ĩũlũ. Mĩthenya mingĩ nĩyathelile, na ala maĩ ngalawanĩ nĩmaĩ matonya kũlilya nza na kwona mĩthya ya iĩma. Kĩw’ũ nĩkyaendeeie o na kũng’ala.

Na ĩndĩ Noa alekya nyũnyi ĩmwe nziũ yĩtawa ngũngũũ kuma ngalawanĩ. Yaũlũkaa ĩkathi kwa kavinda na ĩisyoka, nũndũ ndyaaona vandũ vaseo va kũvũĩla. Yaendeeie na kwĩka ũu na kĩla ĩvinda yasyoka, yavũĩlaa ĩũlũ wa ngalawa

Ĩvũĩ

Noa nĩwendaa kũmanya kana kĩw’ũ nĩkĩng’alu vyũ, kwoou ivĩnda yĩĩ yĩngĩ atũma ĩvũĩ kuma ngalawanĩ. Na ĩvũĩ o nayo yasyoka nũndũ yĩyaaona vandũ va kwĩkala. Noa asyoka ayĩtũma ĩngĩ ĩvinda ya kelĩ, na yasyoka yĩna ĩtũ ya mũthata. Kwoou Noa amanya kana kĩw’ũ nĩkĩng’alu. Yĩla watũmie ĩvũĩ ĩvinda ya katatũ, yĩyaamũsyokea nĩkwĩthĩwa nĩyoonie vandũ vomũ va kwĩkala.

Yu ĩndĩ Ngai nĩwaneenie na Noa na amwĩa: ‘Uma ngalawanĩ. Umya andũ maku onthe na nyamũ syonthe ila wĩnasyo.’ Mekalĩte ngalawanĩ mwaka mũima na kĩndũ. Kwoou no tũtate kũsũanĩa ũndũ matanie yĩla maumaalile nza ĩngĩ na kwĩthĩwa me thayũ!

Mwambĩlĩlyo 7:10-24; 8:1-17; 1 Vetelo 3:19, 20.



Makũlyo

  • Nĩkĩ kũyaĩ mũndũ waĩ atonya kũlika ngalawanĩ mbua yambĩĩa kua?
  • Yeova auisye mbua mĩthenya na motukũ meana, na kĩw’ũ kĩu kyaĩ na ũliku wĩana ata?
  • Ngalawa yeekie ata kĩw’ũ kyambĩĩa kũvw’ĩka nthĩ?
  • Ala mamũndũ manene nĩmavonokie kĩla Kĩw’ũ Kingĩ, na kweethĩiwe ata ĩũlũ wa aaĩthe moo?
  • Ĩtina wa myei ĩtano ngalawa yeekie ata?
  • Noa alekilye ngũngũũ kuma ngalawanĩ nĩkĩ?
  • Noa amanyie ata kana kĩw’ũ nĩkĩng’alu vyũ?
  • Ngai amwĩie Noa ata ĩtina wa Noa na mũsyĩ wake kwĩkala ngalawanĩ mwaka mũima na kĩndũ?

Makũlyo ma kwongeleela

  • Soma Mwambĩlĩlyo 7:10-24.

    Mathayũ maanangiwe kwa kĩthimo kĩana ata ĩũlũ wa nthĩ? (Mwa. 7:23)

    Kĩla Kĩw’ũ Kingĩ kyakuie ĩvinda yĩana ata kũng’ala? (Mwa. 7:24)

  • Soma Mwambĩlĩlyo 8:1-17.

    Mwambĩlĩlyo 8:17 yonanasya ata kana Yeova ndaaekana na kĩeleelo kyake kũmyelekela nthĩ? (Mwa. 1:22)

  • Soma 1 Vetelo 3:19, 20.

    Alaĩka asu mate ewi masyoka ĩtunĩ, makwatie ũsilĩlo mwaũ? (Yuta 6)

    Ũvoo ũsu wa Noa na mũsyĩ wake ũtwongelaa vinya ata nthĩnĩ wa ũtonyi wa Yeova wa kũtangĩĩa andũ make? (2 Vet. 2:9)