Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 1: Ngai Kwambĩlĩĩlya Kũmba Syĩndũ

Ngewa ya 1: Ngai Kwambĩlĩĩlya Kũmba Syĩndũ

SYĨNDŨ syonthe nzeo ila twĩnasyo syumĩte kwa Ngai. We nĩwoombie syũa yĩtũnengae kyeni mũthenya, na mwei na ndata nĩ kenda twĩthĩawe na kyeni kĩnini ũtukũ. Na Ngai nĩwoombie nthĩ tũtũae vo.

Syũa, mwei, ndata na nthĩ tisyo syĩndũ sya mbee kũmbwa nĩ Ngai. We nĩwĩsĩ kĩla kyoombiwe mbee? Mbee Ngai oombie syũmbe ivw’anene nake. Ithyĩ tũitonya kũsyona, o tondũ tũtatonya kũmwona Ngai. Nthĩnĩ wa Mbivilia syũmbe isu syĩtawa alaĩka. Ngai oombie alaĩka mekalae nake ĩtunĩ.

Mũlaĩka wa mbee ũla Ngai woombie aĩ wa mwanya mũno. We aĩ Mwana wa mbee wa Ngai, na atethasya wĩa vamwe na Ĩthe wake. We atetheeisye Ngai kũmba syĩndũ ila ingĩ syonthe. Nĩwamũtetheeisye kũmba syũa, mwei, ndata o na nthĩ ĩno yaitũ.

Nthĩ yailyĩ ata ĩvinda yĩu? Mwambĩlĩĩlyonĩ vayaĩ ũmwe waĩ atonya kwĩkala ĩũlũ wayo. Vayaĩ kĩndũ o na kĩmwe ate o ũkanga ũmwe mũnene wavw’ĩkĩte nthĩ yonthe. No Ngai endaa andũ matũe ĩ nthĩ. Kwoou nĩwambĩĩie kwalany’a maũndũ kwondũ witũ. We eekie ata?

Mwambĩlĩĩlyonĩ nthĩ nĩyendaa kyeni. Kwoou Ngai nĩwatumie kyeni kya syũa kĩmulĩka nthĩ. Amĩseũvisye nĩ kenda kwĩthĩawe na ũtukũ na mũthenya. Ĩtina wa vau Ngai nĩwatumie nthĩ nyũmũ ĩthambalala ĩũlũ wa ũkanga.

Mbeenĩ vayaĩ kĩndũ o na kĩmwe ĩũlũ wa nthĩ. Yailyĩ ta visa ũũ ũkwona vaa. Vayaĩ malaa kana mĩtĩ o na nyamũ. O na vayaĩ makũyũ maũkanganĩ. Ngai aĩ na wĩa ũngĩ mwingĩ wa kũmĩtw’ĩkĩthya nthĩ vandũ vaseo va kwĩkalwa nĩ nyamũ na andũ.

Yelemia 10:12; Akolosai 1:15-17; Mwambĩlĩlyo 1:1-10.

Nthĩ ĩte kĩndũ


Makũlyo

  • Syĩndũ ila nzeo syonthe syaumie va, na no ũtonye kũweta imwe?
  • Nĩ kyaũ kĩla Ngai wambie kũmba mbee?
  • Nĩkĩ mũlaĩka wa mbee waĩ wa mwanya mũno?
  • Kwaelesya ũndũ nthĩ yailyĩ mwambĩlĩlyonĩ. (Sisya visa.)
  • Ngai ambĩĩie ata kwalany’a nthĩ nĩ kenda yĩkalwe nĩ nyamũ na andũ?

Makũlyo ma kwongeleela

  • Soma Yelemia 10:12.

    Nĩ ndaĩa syĩva sya Ngai syonanĩtw’e kwĩsĩla wũmbinĩ wake? (Isa. 40:26; Alo. 11:33)

  • Soma Akolosai 1:15-17.

    Yesũ aĩ na kĩanda kyaũ nthĩnĩ wa wũmbi, na ũndũ ũsu waĩlĩte ũtuma twĩthĩwa na woni mwaũ ĩũlũ wake? (Ako. 1:15-17)

  • Soma Mwambĩlĩlyo 1:1-10.

    Nthĩ yaumie va? (Mwa. 1:1)

    Nĩ ata kweekĩkie mũthenya wa mbee wa wũmbi? (Mwa. 1:3-5)

    Kwaelesya ũndũ kweethĩiwe mũthenyanĩ wa kelĩ wa wũmbi. (Mwa. 1:7, 8)