Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 115: Valatiso Nzaũ Ĩũlũ wa Nthĩ

Ngewa ya 115: Valatiso Nzaũ Ĩũlũ wa Nthĩ

KWASISYA mĩtĩ ĩya mĩasa, malaa manake, na iĩma ndũlu. Vaa tyo vandũ vanake? Kwoona ndaatai ĩya ĩkũya kuma kw’okonĩ kwa kamwana. Na kwasisya mĩnyambũ na ũisisya mbalasi iiya iũngamĩte kĩsesinĩ kĩ vuvĩ. We tyo wendeew’e nĩkwĩkala nthĩnĩ wa nyũmba yĩ vandũ vailyĩ ta vaa?

Ngai eenda wĩĩkala tene na tene ĩũlũ wa nthĩ ya valatiso. Na ndekwenda we wĩthĩwe na kyalya kana woo o na wĩva ila ithĩnasya andũ ũmũnthĩ. Mbivilia yathaana ũũ kwa ala metũa nthĩnĩ wa valatiso ĩsu nzaũ: ‘Ngai akeethĩwa e vamwe nao. Na kĩkw’ũ kĩikethĩwa vo ĩngĩ kana kũĩa kana woo. Maũndũ ma mbee nĩ mavĩtu.’

Yesũ akaĩkĩĩthya kana ũalyũko ũsu mũseo nĩweethĩwa. We nĩwĩsĩ nĩ ĩndĩĩ? Nĩ ĩtina wa Yesũ kũvetanga mothũku onthe na andũ athũku ĩũlũ wa nthĩ. Lilikana, yĩla Yesũ waĩ ĩũlũ wa nthĩ nĩwavoasya andũ mowau ma mĩthemba yonthe, o na nĩwathayũũkasya andũ. Yesũ eekaa ũu nĩ kana onany’e ũndũ wĩĩthĩwa atonya kwĩka ĩũlũ wa nthĩ yonthe yĩla wĩtw’ĩka Mũsumbĩ wa ũsumbĩ wa Ngai.

Kwatata kũsũanĩa kũkeethĩwa kũseũvĩte ta kĩ nthĩnĩ wa valatiso ĩsu nzaũ ĩũlũ wa nthĩ! Yesũ, vamwe na amwe ma ala ũnyuvĩte, makeethĩwa masumbĩkĩte ĩtunĩ. Asumbĩ asu makasũvĩa kĩla mũndũ ĩũlũ wa nthĩ na kũĩkĩĩthya kana e na ũtanu. Ekai twone ũndũ twaĩlĩtwe nĩkwĩka nĩ kana twĩthĩwe na w’o ki kana Ngai akatũnenga thayũ wa tene na tene nthĩnĩ wa valatiso ĩsu nzaũ.

Ũvuan’yo 21:3, 4; 5:9, 10; 14:1-3.

Visa wa ũndũ valatiso yĩkethĩwe


Makũlyo

  • Nĩ maũndũ mailyĩ ata Mbivilia yonanĩtye kana tũkatanĩa nthĩnĩ wa Valatiso kũũ nthĩ?
  • Mbivilia yathanĩte kyaũ kwa ala makekala Valatisonĩ?
  • Yesũ akaĩkĩĩthya ĩndĩĩ kana moalyũku asu maseo nĩmeanĩw’a?
  • Yĩla Yesũ waĩ ĩũlũ wa nthĩ, eekie ata nĩ kana onany’e ũndũ ũkeka e Mũsumbĩ wa Ũsumbĩ wa Ngai?
  • Nĩ maũndũ maũ Yesu na ala ũkasumbĩka namo makaĩkĩĩthya kana nĩmeekwa yĩla makasumbĩka ĩũlũ wa nthĩ kuma ĩtunĩ?

Makũlyo ma kwongeleela

  • Soma Ũvuan’yo 5:9, 10.

    Nĩkĩ tũtonya kwĩthĩwa na mũĩkĩĩo kana ala makasumbĩka ĩũlũ wa nthĩ ĩvinda ya Ũsumbĩ wa Myaka Ngili makeethĩwa me asumbĩ na athembi me tei na ĩnee? (Aev. 4:20-24; 1 Vet. 1:7; 3:8; 5:6-10)

  • Soma Ũvuan’yo 14:1-3.

    Kũandĩkwa kwa syĩtwa ya Ĩthe na syĩtwa ya Katena ka Ĩlondu itulyanĩ sya ala 144,000 kwĩonany’a ata? (1 Ako. 3:23; 2 Tim. 2:19; Ũvu. 3:12)