Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 111: Mwanake Wakomie Too

Ngewa ya 111: Mwanake Wakomie Too

ASI-ISI! Nĩ kyaũ kyeekĩka vaa? Mwanake ũũ ũkomete vaa nthĩ nĩ mũũmĩu mũno? Kwasisya! Ũmwe wa andũ aa maumaalĩte kuma nyũmba nĩ Vaulo! Nũtonya kwona Timotheo vau o nake? Mwanake ũsu avalũka kuma ndĩlĩsyanĩ?

Vaulo okĩte kũthayũũkya Eutikusi

Ĩĩ, ũu nĩw’o kwamina kwĩkĩka. Vaulo amatavasya ũvoo amanyĩw’a vaa Teloa. Nĩweesĩ kana ndakamona ĩngĩ kwa ĩvinda ĩasa nũndũ aĩ athi na ngalawa ũnĩ ũsu. Kwoou aendeea na kũneena nginya ũtukũ katĩ.

Mwanake ũũ weetawa Eutikusi ekalĩte ndĩlĩsyanĩ, nake akoma too. Na ĩndĩ avalũka kwĩsĩla ndĩlĩsyanĩ, kuma ngolovanĩ ya katatũ nginya nthĩ! Kwoou nũtonya kwona nĩkĩ andũ aa mamakĩte mũno. Andũ asu mookĩlya mwanake ũsu, kaĩ ũndũ masũanĩaa now’o. Aĩ mũkw’ũ!

Yĩla Vaulo woonie kana mwanake nĩ mũkw’ũ, amũmamĩa na amũkũmbatĩlya na moko. Na ĩndĩ asya: ‘Mũikamake. Ndena ũndũ!’ Na nĩw’o! Nĩ kyama! Vaulo nĩwamũthayũũkya! Na andũ onthe matana.

Na onthe mambata ĩngĩ ngolovanĩ na maya lĩu. Nake Vaulo aendeea na kũneena nginya kwakya. Ĩndĩ nũtonya kwĩthĩwa na w’o kana Eutikusi ndaakoma ĩngĩ! Ĩndĩno Vaulo, Timotheo na ala maendanĩtye namo malĩsa ngalawanĩ. We nĩwĩsĩ maendie va?

Vaulo eethĩiwe amina kyalo kyake kya katatũ kya kũtavany’a, na yu nĩwenũkĩte. Kyalonĩ kĩĩ Vaulo ekalile myaka ĩtatũ ndũanĩ ya Eveso yoka. Kwoou kyalo kĩu kyaĩ kĩasa mũno kũthonoka kĩla kyake kya kelĩ.

Ĩtina wa kuma Teloa, ngalawa nĩyaũngamie Mileto kwa kavinda kanini. Na nũndũ ndũa ya Eveso yaĩ o kĩlomita nini kuma vau, Vaulo atũmana atumĩa ma kĩkundi moke nginya Mileto nĩ kana aneene namo ĩvinda ya mũthya. Ĩtina, ĩvinda ya ngalawa ya kũkũsya yavika, mo meewie kyeva ta kĩ kwona Vaulo aithi!

Ĩtina vyũ ngalawa nĩyookie ĩngĩ Kaisalea. Na Vaulo o ekalĩte vaa nyũmbanĩ ya mũmanyĩw’a Vilivu, mwathani Akavo amũkany’a Vaulo. Na asya kana Vaulo akoovwa avika Yelusaleme. Na kwa w’o, ũu nĩw’o kweethĩiwe. Ĩtina wa kyovo kya myaka ĩlĩ kũu Kaisalea, Vaulo nĩwatwaiwe Lomi akasilĩlwe mbee wa Kaisali, mũsumbĩ wa Alomi. Ekai twone ũndũ kweethĩiwe e kyalonĩ kya kũthi Lomi.

Meko kĩlungu kya 19 nginya 26.



Makũlyo

  • Mwanake ũũ ũkomete nthĩ visanĩ nũũ, na eeka ata?
  • Vaulo eekie ata eethĩa mwanake nĩ wakw’a
  • Vaulo, Timotheo, na ala maendanĩtye vamwe namo maendie va, na kweethĩiwe ata maũngama Melita?
  • Nĩ ũkany’o mwaũ mwathani Akavo wanengie Vaulo, na kweethĩiwe ata o tondũ mwathani ũsu waĩtye?

Makũlyo ma kwongeleela

  • Soma Meko 20:7-38.

    Kwĩanana na ndeto sya Vaulo ila iandĩkĩtwe nthĩnĩ wa Meko 20:26, 27, tũtonya kwĩthĩwa “tũtakakũlw’a nthakame ya mũndũ o na wĩva” ata? (Esek. 33:8; Meko 18:6, 7)

    Nĩkĩ atumĩa ma kĩkundi maĩlĩte kwĩthĩwa “malũmĩtye ndeto ĩla ya kĩthito” yĩla meũmanyĩsya? (Meko 20:17, 29, 30; Tito 1:7-9; 2 Tim. 1:13)

  • Soma Meko 26:24-32.

    Nũndũ Vaulo aĩ Mũlomi atũmĩie ũndũ ũsu ata kwĩanĩsya wĩa wa kũtavany’a ũla wanengetwe nĩ Yesũ? (Meko 9:15; 16:37, 38; 25:11, 12; 26:32; Lk. 21:12, 13)