Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 108: Me Nzĩanĩ Maendete Ndamasiku

Ngewa ya 108: Me Nzĩanĩ Maendete Ndamasiku

WE NĨWĨSĨ ũya ũkomete vaya nthĩ nũũ? Nĩ Saulo. Lilikana kana nĩwe wasiĩĩsye ngũa sya ĩũlũ sya aũme ala makimangie Sitivini na mavia. Kwasisya kyeni kĩĩ kĩkenete mũno! Nĩ kyaũ kĩendee?

Ĩtina wa Sitivini kũawa, Saulo nĩwe watongoesye nthĩnĩ wa kũmamantha aatĩĩi ma Yesũ na kũmathĩny’a. Avotaa kĩla nyũmba akamakusũlany’a na kũmekya kolokolonĩ. Amanyĩw’a aingĩ nĩmakĩĩie ndũanĩ ingĩ na mambĩĩa kũtavany’a “ũvoo mũseo” kũu. Ĩndĩ Saulo athi ndũanĩ ingĩ akamanthe amanyĩw’a ma Yesũ. We aĩ nzĩanĩ aendete Ndamasiku. Ĩndĩ, e nzĩanĩ ũũ nĩw’o ũndũ wa ũsengy’a ũla weekĩkie:

Kwa mĩtũkĩ, kyeni kuma ĩtunĩ nĩkyakenie ngalĩ syonthe kũmũthyũlũlũka Saulo. Nake avalũka nthĩ o tondũ ũkwona vaa. Na ĩndĩ wasya wamwĩa: ‘Saulo, Saulo! Nĩkĩ ũũnthĩny’a?’ Aũme aa me vamwe na Saulo nĩmonie ĩ kyeni na meew’a ũ wasya, ĩndĩ mayaaelewa nĩ kĩla kyaneenawa.

Saulo aitw’ĩkĩthw’a kĩlalinda nĩ kyeni

Na Saulo akũlya: ‘Nue ũũ, Mwĩaĩi?’

Na wasya ũsu wasya: ‘Ninyie Yesũ ũla ũũthĩny’a.’ Aisye ũu nũndũ yĩla Saulo wathĩnasya aatĩĩi ma Yesũ, Yesũ ew’aa tawe mwene ũnũũthĩnw’a.

Saulo ĩndĩ akũlya: ‘Nĩĩka ata, Mwĩaĩi?’

Nake Yesũ amwĩa: ‘Ũkĩla ũlike Ndamasiku. Kũu nũũtavw’a ũndũ waĩlĩte kwĩka.’ Saulo ookĩla na asalukya metho make, ndaĩ atonya kwona kĩndũ. Aĩ kĩlalinda! Kwoou aũme ala waĩ namo mamũkwata kw’oko na mamũtwaa Ndamasiku.

Yesũ nĩwaneenie na ũmwe wa amanyĩw’a make kũu Ndamasiku na amwĩa: ‘Ũkĩla Anania. Thi nzĩanĩ ĩla yĩtawa Ndũngalu. Na wavika nyũmbanĩ ya Yutasi, ũikũlya mũndũ wĩtawa Saulo. Nĩnĩmũnyuvĩte atw’ĩke mũthũkũmi wakwa wa mwanya.’

Anania nĩweekie ũu. Na yĩla wamwonie Saulo, amwilĩĩla moko na asya: ‘Mwĩaĩi nĩwandũma nĩ kana ũtonye kwona ĩngĩ na kusũwa nĩ veva mũtheu.’ Na o vau kwa vau syĩndũ iilyĩ ta makwaũ syavalũka kuma methonĩ ma Saulo, nake ambĩĩa kwona ĩngĩ.

Saulo atũmĩiwe kwa nzĩa nene mũno kũmatavya andũ ma mbaĩ mbingĩ. Eesĩkĩe ta mũtũmwa Vaulo, ũla twĩĩmanyĩsya maũndũ maingĩ mũno ĩũlũ wake. Ĩndĩ ekai, twambe twone ũndũ Ngai watũmie Vetelo akeke.

Meko 8:1-4; 9:1-20; 22:6-16; 26:8-20.



Makũlyo

  • Saulo eekie ata ĩtina wa Sitivini kũawa?
  • Nĩ ũndũ mwaũ wa ũsengy’a weekĩkie yĩla Saulo waĩ nzĩanĩ aendete Ndamasiku?
  • Yesũ eeie Saulo eke ata?
  • Nĩ mawatho maũ Yesũ wamũnengie Anania, na Saulo atonyie ata kwona ĩngĩ?
  • Saulo eetiwe syĩtwa yĩva, nake atũmĩiwe ata?

Makũlyo ma kwongeleela

  • Soma Meko 8:1-4.

    Mathĩna ala makwatie kĩkundi kĩu kyeũ kya Aklĩsto matumie mũĩkĩĩo wa Ũklĩsto ũnyaĩĩka ata, na nĩ ũndũ mwaũ ũvw’anene na ũsu ũminĩte kwĩkĩka mavindanĩ maitũ? (Meko 8:4; Isa. 54:17)

  • Soma Meko 9:1-20.

    Yesũ avuanisye kana avangĩte kũnenga Saulo wĩa mwaũ wĩ na ilungu itatũ? (Meko 9:15; 13:5; 26:1; 27:24; Alo. 11:13)

  • Soma Meko 22:6-16.

    Tũtonya kwĩthĩwa tũilyĩ ta Anania ata, na nĩkĩ ũndũ ũsu nĩ wa vata? (Meko 22:12; 1 Tim. 3:7; 1 Vet. 1:14-16; 2:12)

  • Soma Meko 26:8-20.

    Kũalyũka kwa Saulo na kũtw’ĩka Mũklĩsto kũtonya kũmekĩa vinya ata ala aa mũũme kana aa mũka mate aĩkĩĩi? (Meko 26:11; 1 Tim. 1:14-16; 2 Tim. 4:2; 1 Vet. 3:1-3)