Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 106: Kũthaw’a Kuma Kolokolonĩ

Ngewa ya 106: Kũthaw’a Kuma Kolokolonĩ

KWASISYA mũlaĩka ũũ wĩ vaa ũvingũĩte na akakwatĩĩa mũomo wa kolokolo. Aũme asu ũkũvingũĩa nĩ atũmwa ma Yesũ. Ekai twone kĩla kyatumie mekw’a kolokolonĩ.

Mũlaĩka aithasya atũmwa kuma kolokolonĩ

No ĩvinda ĩkuvĩ ĩthelu kuma yĩla veva mũtheu woonoiw’e ĩũlũ wa amanyĩw’a ma Yesũ. Na ũũ nĩw’o kweekĩkie: Vetelo na Yoana nĩmaendete ĩkalũnĩ Yelusaleme mũthenya ũmwe syũa yeeka. Vau vakuvĩ na mũomo vaĩ mũndũ weethĩĩtwe e kyonze ĩvinda yonthe ya thayũ wake. Andũ mamũkuaa makamwia vau kĩla mũthenya nĩ kana avoye mbesa kuma kwa ala meũlika ĩkalũnĩ. Na yĩla woonie Vetelo na Yoana, amavoya mamũnenge o kĩndũ. Atũmwa meekie ata?

Nĩmaũngamie na mamũketeea mũndũ ũsũ ngya. Na Vetelo amwĩa: ‘Nyie ndina mbesa, ĩndĩ nĩngũũnenga kĩla nĩ nakyo. Syĩtwanĩ ya Yesũ, ũkĩla na ũithi!’ Vetelo ĩndĩ amũkwata kw’oko kwa aũme, na vau kwa vau atũũlĩla aũngama na ambĩĩa kũthi. Yĩla andũ moonie ũu, maseng’a mũno na meew’a mũyo nũndũ wa kyama kĩu kĩseo.

Na Vetelo asya: ‘Nĩ kwa vinya wa Ngai, ũla wathayũũkisye Yesũ kuma kwa akw’ũ, twĩkie kyama kĩĩ.’ Na we na Yoana maendee o na kũneena, atongoi amwe ma ndĩni mooka. Maĩ na woo nũndũ Vetelo na Yoana matavasya andũ ĩũlũ wa kũthayũũkw’a kwa Yesũ. Kwoou mamakwata na mamekĩa kolokolonĩ.

Ũnĩ ũsu atongoi asu ma ndĩni nĩmeethĩiwe na ũmbano mũnene. Na Vetelo na Yoana, vamwe na mũndũ ũla mavoetye, maetwe. Na atongoi asu mamakũlya: ‘Mũneekie kyama kĩu kwa vinya waũ?’

Nake Vetelo amea nĩ kwa vinya wa Ngai, ũla wamũthayũũkisye Yesũ kuma kwa akw’ũ. Athembi asu mayeesĩ ũndũ matonya kwĩka, nũndũ mayaĩ matonya kũkaĩa kana kyama kĩu kya ũsengy’a kwa w’o nĩkĩneekĩkie. Kwoou mamatĩsya atũmwa asu maikasyoke kũneena ĩngĩ ĩũlũ wa Yesũ na ĩndĩ mamalekya.

O ũndũ mĩthenya yaendeeie na kũvĩta, now’o atũmwa maendeeie na kũtavany’a ĩũlũ wa Yesũ na kũvosya awau. Ũvoo wa syama isu nĩwanyaĩĩkie. Kwoou nguthu nene ya andũ kuma ndũa ila syathyũlũlũkĩte Yelusaleme maete andũ ala awau nĩ kana atũmwa mamavosye. Ũndũ ũsu watumie atongoi ma ndĩni mew’a kĩwĩu, kwoou mamakwata atũmwa na mamekĩa kolokolonĩ. Ĩndĩ mayaaĩkala vo ĩvinda ĩasa.

Ũtukũ mũlaĩka wa Ngai nĩwavingũie mũomo wa kolokolo, o tondũ ũtonya kwona vaa. Nake asya: ‘Endai, mũkaũngame ĩkalũnĩ, na mũiendeea na kũtavya andũ.’ Ũnĩ ũsu kwakya, Atongoi ma ndĩni nĩmatũmie andũ kolokolonĩ makaete atũmwa, namo meethĩa nĩmaendie. Ĩtina andũ asu mamethĩa maimanyĩsya ĩkalũnĩ, na mamaete nyũmbanĩ ya Nzama Nene.

Nĩvo ĩndĩ atongoi asu maisye: ‘Tũtineemũvata mũno na vinya mũikasyoke kũmanyĩsya ĩngĩ ĩũlũ wa Yesũ. Ĩndĩ nĩmusũĩtye Yelusaleme momanyĩsyo menyu.’ Atũmwa ĩndĩ masũngĩa: ‘Mũvaka tũmwĩw’e Ngai mbee wa kũmew’a andũ.’ Kwoou maendeea na kũmanyĩsya “ũvoo mũseo.” Ĩsu yo tyo ngelekany’o nzeo ithyĩ twaĩlĩtwe nĩkũatĩĩa?

Meko kĩlungu kya 3 nginya 5.



Makũlyo

  • Kweethĩiwe ata kwa Vetelo na Yoana mũthenya ũmwe yĩla maendete ĩkalũnĩ syũa yĩneeeka?
  • Vetelo amwĩie ata mũndũ kyonze, na amũnengie kyaũ kyaĩ kya vata mũno kwĩ mbesa?
  • Atongoi ma ndĩni mathilĩkĩtw’e nĩ kyaũ, namo mamekie ata Vetelo na Yoana?
  • Vetelo eeie atongoi ma ndĩni ata, na nĩ ũkany’o mwaũ atũmwa manengiwe?
  • Nĩkĩ Atongoi ma ndĩni maĩ na kĩwĩu, ĩndĩ kweethĩiwe ata yĩla atũmwa meekĩiwe kolokolonĩ ĩvinda ya kelĩ?
  • Atũmwa masũngĩie ata maetwe nyũmbanĩ ya Nzama Nene?

Makũlyo ma kwongeleela

  • Soma Meko 3:1-10.

    O na kau tũinengetwe ũtonyi wa kwĩka syama ũmũnthĩ, ndeto sya Vetelo ila iandĩkĩtwe nthĩnĩ wa Meko 3:6 syĩtũtetheesya ata kwona vata wa ũvoo wa Ũsumbĩ? (Yoa. 17:3; 2 Ako. 5:18-20; Avi. 3:8)

  • Soma Meko 4:1-31

    Yĩla twavinganĩw’a twĩ wĩanĩ wa kũtavany’a, nĩ kwa nzĩa yĩva tũtonya kwĩyĩelekany’a na ana-a-asa maitũ Aklĩsto ma mbee? (Meko 4:29, 31; Aev. 6:18-20; 1 Ath. 2:2)

  • Soma Meko 5:17-42.

    Andũ amwe mate Ngũsĩ ma ĩvinda ya tene na ya ũmũnthĩ, monanasya ata kũelewa nesanga ĩũlũ wa wĩa wa kũtavany’a? (Meko 5:34-39)