Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 104: Yesũ Aisyoka Ĩtunĩ

Ngewa ya 104: Yesũ Aisyoka Ĩtunĩ

OMĨTHENYA ĩendee na kũvĩta, Yesũ nĩweeyonanisye kwa aatĩĩi make mavinda maingĩ. Ĩvinda yĩmwe amanyĩw’a ta 500 nĩmamwonie. Amaumĩlĩĩla, we nĩwĩsĩ Yesũ aneenie namo ĩũlũ wa kyaũ? Ĩũlũ wa ũsumbĩ wa Ngai. Yeova atũmie Yesũ kũũ nthĩ kũmanyĩsya ĩũlũ wa Ũsumbĩ ũsu. Na nĩwaendeeie na kwĩka ũu o na ĩtina wa kũthayũũkw’a.

Yesũ asyokete ĩtunĩ

We nũũlilikana ũsumbĩ wa Ngai nĩ kyaũ? Ũsumbĩ nĩ silikalĩ ya w’o ya Ngai yĩ ĩtunĩ, na Yesũ nĩwe Ngai ũnyũvĩte ethĩwe mũsumbĩ. O tondũ tũminĩte kwĩmanyĩsya, Yesũ nĩwoonanisye ũndũ ũkethĩwa e mũsumbĩ mũseo kwa kũmanenga lĩu andũ me na nzaa, kũvosya awau, o na kũthayũũkya akw’ũ!

Kwoou yĩla Yesũ wĩsumbĩka ĩtunĩ kwa myaka ngili, nthĩ ĩkeethĩwa ĩilyĩ ata? Nthĩ yonthe ĩkatw’ĩkĩthw’a Valatiso mbanake. Kũikethĩwa ĩngĩ makaũ, ũtũli wa mĩao, ũwau, kana o na kĩkw’ũ. Nĩtwĩsĩ ũu nũndũ Ngai oombie nthĩ yĩthĩwe yĩ Valatiso ya andũ matanĩae. Kĩu nĩkyo kĩtumi mwambĩlĩlyonĩ waseũvisye mũũnda wa Eteni. Na Yesũ akaĩkĩĩthya kana ũndũ Ngai ũnũkwenda wĩkwe nĩweanĩw’a vyũ.

Ĩvinda nĩyavikie ĩndĩ Yesũ asyoke ĩtunĩ. Kwa mĩthenya 40 Yesũ eethĩĩtwe ayĩyonany’a kwa amanyĩw’a make. Kwoou mena w’o ki kana we e thayũ ĩngĩ. Ĩndĩ mbee wa kũmatia amanyĩw’a make Yesũ ameie: ‘Ĩkalai Yelusaleme nginya yĩla mũkosa veva mũtheu.’ Veva mũtheu nĩ vinya wa Ngai, ũilyĩ ta kĩseve kĩuutanĩte, naw’o ũtetheeasya aatĩĩi make kwĩka kwenda kwa Ngai. Ĩtina vyũ, Yesũ nĩwaisye: ‘Mũkatavany’a ĩũlũ wakwa kũvika ilungu syĩ vaasa sya nthĩ.’

Ĩtina wa kwasya ũu, ũndũ wa ũsengy’a nĩweekĩkie. Yesũ nĩwambĩĩie kwambata ĩtunĩ, o tondũ ũkwona vaa. Na ĩtu yamũvw’ĩka aeka kwoneka, na amanyĩw’a mayaamwona ĩngĩ. Yĩla Yesũ waendie ĩtunĩ nĩwambĩlĩĩilye kũsumbĩka aatĩĩi make ala me ĩũlũ wa nthĩ kuma kũu.

Amanyĩw’a masiĩtye yayayanĩ

1 Akolintho 15:3-8; Ũvuan’yo 21:3, 4; Meko 1:1-11.



Makũlyo

  • Nĩ amanyĩw’a meana mamwonie Yesũ ĩvinda yĩmwe, nake aneenie namo ĩũlũ wa kyaũ?
  • Ũsumbĩ wa Ngai nĩ kyaũ, na thayũ ũkeethĩwa ũilyĩ ata ĩũlũ wa nthĩ yĩla Yesũ ũkasumbĩka kwa myaka ngili?
  • Yesũ ethĩĩtwe ayumĩlĩla amanyĩw’a make kwa mĩthenya yĩana, ĩndĩ yu nĩ ĩvinda yake ya kwĩka ata?
  • Kavinda kanini mbee wa kũtia amanyĩw’a make, Yesũ ameie nĩmeke ata?
  • Nĩ kyaũ kĩĩkĩka vaa visanĩ, na Yesũ evithwa ata aeke kwoneka?

Makũlyo ma kwongeleela

  • Soma 1 Akolintho 15:3-8.

    Nĩkĩ mũtũmwa Vaulo waneenie na ũĩkĩĩku vyũ ĩũlũ wa kũthayũũkw’a kwa Yesũ, naitũ ũmũnthĩ tũtonya kũneena na ũĩkĩĩku ĩũlũ wa maũndũ meva? (1 Ako. 15:4, 7, 8; Isa. 2:2, 3; Mt. 24:14; 2 Tim. 3:1-5)

  • Soma Meko 1:1-11.

    O tondũ ĩandĩko ya Meko 1:8 yonanĩtye, wĩa wa kũtavany’a wanyaĩĩkie nginya va? (Meko 6:7; 9:31; 11:19-21; Ako. 1:23)