Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 97: Yesũ Okĩte ta Mũsumbĩ

Ngewa ya 97: Yesũ Okĩte ta Mũsumbĩ

O ĨVINDA ĩvũthũ ĩtina wa kũvosya ilalinda ila ilĩ syavoyaa syĩndũ, Yesũ nĩwavikie ndũanĩ nini yaĩ vakuvĩ na Yelusaleme. Nake amea amanyĩw’a make elĩ atĩĩ: ‘Endai ndũanĩ na nĩmũkwona ndena ya ĩng’oi. Mĩthasyei mũndetee.’

Ndena ĩsu yaetwe vala ũĩ, Yesũ nĩwamĩkalĩile. Na akuwa nĩyo athi ndũanĩ ya Yelusaleme, ĩla yaĩ o vakuvĩ. Na athengeea ĩ ndũa, nguthu nene ya andũ yooka kũmũthaũa. Aingĩ moo nĩmaumisye ngũa syoo sya ĩũlũ malany’a nzĩanĩ. Namo angĩ matema mbonge sya makĩndũ. Na masiia nzĩanĩ o nasyo, na mookĩlya wasya mayasya: ‘Ngai athima mũsumbĩ ũla ũkĩte syĩtwanĩ ya Yeova!’

Andũ maimũthokya Yesũ

Ĩvinda ya tene nthĩnĩ wa Isilaeli asumbĩ eũ nĩmakuawa nĩ ndena ya ĩng’oi na mailika Yelusaleme meyonany’e kwa andũ. Ũu nĩw’o Yesũ ũnũkwĩka. Namo andũ aa meonany’a kana nĩmekwenda Yesũ atw’ĩke mũsumbĩ woo. Ĩndĩ ti andũ onthe mekwenda ũu. Nĩtũtonya kũmanya kumana na ũndũ kweethĩiwe Yesũ athi ĩkalũnĩ.

E ĩkalũnĩ Yesũ nĩwavoisye ilalinda na syonze. Yĩla syana nini syoonie ũu, nĩsyamũkumisye na wasya mũnene. Ĩndĩ ũndũ ũsu nĩwathilĩkilye athembi, namo mamwĩa Yesũ: ‘We nũkwĩw’a ũndũ syana ii ikwasya?’

‘Ĩĩ, nĩngwĩw’a,’ Yesũ amasũngĩa. ‘Mũyaasoma Mbivilianĩ vala yaĩtye: “Kuma makany’wanĩ ma syana nini Ngai akaumya ndaĩa?”’ Kwoou syana syaendeea na kũtaĩa mũsumbĩ ũla wiĩtwe nĩ Ngai.

Twĩenda twĩthĩwe tũilyĩ ta syana isu, kana tiw’o? Andũ amwe nĩmatonya kũtata kũtũsiĩĩa tũeke kũneena ĩũlũ wa ũsumbĩ wa Ngai. Ĩndĩ ithyĩ twĩendeea na kũtavya ala angĩ ĩũlũ wa maũndũ maseo ala Yesũ ũkeka kwondũ wa andũ.

Yĩla Yesũ waĩ kũũ nthĩ yu yĩyaĩ ĩvinda yake ya kwambĩlĩĩlya kũsumbĩka. Ĩvinda yĩu yĩkavika ĩndĩĩ? Amanyĩw’a ma Yesũ nĩmeendaa kũmanya. Nĩtũũsoma ĩũlũ wa ũndũ ũsu ngewanĩ ĩla ĩatĩĩe.

Mathayo 21:1-17; Yoana 12:12-16.



Makũlyo

  • Yesũ eeie amanyĩw’a make meke ata yĩla wavikie ndũanĩ nini yaĩ vakuvĩ na Yelusaleme?
  • Nthĩnĩ wa visa ũũ, nata kweethĩiwe yĩla Yesũ wathengeeie ndũa ya Yelusaleme?
  • Syana nini syeekie ata yĩla syoonie Yesũ aivosya ilalinda na syonze?
  • Yesũ eeie athembi asu athatu ata?
  • Tũtonya ata kwĩthĩwa tũilyĩ ta syana ii siũmũtaĩa Yesũ?
  • Amanyĩw’a mendaa kũmanya kyaũ?

Makũlyo ma kwongeleela

  • Soma Mathayo 21:1-17.

    Kũlika kwa Yesũ Yelusaleme ta Mũsumbĩ kwaĩ na kĩvathũkany’o ata na kwa anene ma asikalĩ ala masinda ĩvinda ya Alomi? (Mt. 21:4, 5; Nzek. 9:9; Avi. 2:5-8; Ako. 2:15)

    Nĩ ĩsomo yaũ andũ ma mũika matonya kwĩmanyĩsya kũmana na imwana sya Isilaeli ila syawetie ndeto kuma Savulĩ 118 yĩla Yesũ walikaa ĩkalũnĩ? (Mt. 21:9, 15; Sav. 118:25, 26; 2 Tim. 3:15; 2 Vet. 3:18)

  • Soma Yoana 12:12-16.

    Kũtũmĩwa kwa mbonge sya makĩndũ nĩ andũ ala mamũkumasya Yesũ nĩ wonany’o wa kyaũ? (Yoa. 12:13; Avi. 2:10; Ũvu. 7:9, 10)