Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 91: Yesũ Aimanyĩsya e Kĩĩmanĩ Ĩũlũ

Ngewa ya 91: Yesũ Aimanyĩsya e Kĩĩmanĩ Ĩũlũ

KWASISYA Yesũ ekalĩte nthĩ vaa. Emanyĩsya andũ aa onthe e Kĩĩmanĩ kya Kalilii. Asu mailyĩ vakuvĩ nake nĩ amanyĩw’a make. Anyuvĩte 12 matw’ĩke atũmwa make. Atũmwa maĩ amanyĩw’a ma mwanya ma Yesũ. We nĩwĩsĩ masyĩtwa moo?

Yesũ aimanyĩsya

Vaĩ Simoni Vetelo na mwana-a-inyia Andalea. Na ĩndĩ vaĩ Yakovo na Yoana, na o namo nĩmasyaanĩw’e. Vaĩ mũtũmwa ũngĩ o nake weetawa Yakovo, o na ũngĩ weetawa Simoni. Na vaĩ atũmwa elĩ meetawa Yutasi. Ũmwe aĩ Yutasi Isikalioti, na Yutasi ũla ũngĩ eetawa syĩtwa yĩngĩ Thatayo. Na ĩndĩ vaĩ Vilivũ na Nathanaeli (kana Valitholomayo), na Mathayo na Thoma.

Itina wa kũsyoka kuma Samalia, Yesũ nĩwambĩĩie kũtavany’a ĩvinda ya mbee ayasya: ‘Ũsumbĩ wa ĩtu nĩmũthengeeu.’ We nĩwĩsĩ ũsumbĩ ũsu nĩ kyaũ? Nĩ silikalĩ ya w’o ya Ngai. Yesũ nĩwe mũsumbĩ wayo. Akasumbĩka kuma ĩtunĩ na ayĩete mũuo ĩũlũ wa nthĩ. Ũsumbĩ wa Ngai ũkatw’ĩkĩthya nthĩ yonthe valatiso mbanake.

Yesũ e vaa aimanyĩsya andũ ĩũlũ wa ũsumbĩ wa Ngai. We eelesya: ‘Voyaai atĩĩ: Asa waitũ ũla wĩ ĩtunĩ, syĩtwa yaku yĩtaĩwe. Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.’ Andũ aingĩ meetaa ĩsu ‘Mboya ya Mwĩaĩi.’ Angĩ mamĩtaa ‘Asa Waitũ.’ We nũtonya kũmĩweta ĩ mboya yonthe?

O na ĩngĩ Yesũ nĩwamanyĩisye andũ ũndũ maĩlĩte kwĩkanaa. Aisye: ‘Ĩka ala angĩ o ũndũ we wendaa mo makwĩke.’ We tyo wĩw’aa mũyo yĩla ala angĩ makwĩka nesa? Kwoou, Yesũ easya, nĩtwaĩlĩte kwĩkaa andũ ala angĩ nesa. Ũkeethĩwa wĩ ũndũ mũseo mũno nthĩnĩ wa nthĩ ya valatiso yĩla kĩla mũndũ wĩĩka ũu.

Mathayo kĩlungu kya 5 nginya 7; 10:1-4.



Makũlyo

  • Vaa visanĩ Yesũ emanyĩsya e va, na asu mailyĩ nthĩ vakuvĩ nake naaũ?
  • Atũmwa ala 12 ma Yesũ meetawa ata?
  • Ũsumbĩ ũla Yesũ watavanasya ĩũlũ waw’o nĩ mwaũ?
  • Yesũ amanyĩasya andũ mavoyae ĩũlũ wa kyaũ?
  • Yesũ aisye ata ĩũlũ wa ũndũ andũ maĩle kwĩkanaa?

Makũlyo ma kwongeleela

  • Soma Mathayo 5:1-12.

    Tũtonya kwonany’a kwa nzĩa syĩva kana nĩtũũmanya vata witũ wa kĩveva? (Mt. 5:3; Alo. 10:13-15; 1 Tim. 4:13, 15, 16)

  • Soma Mathayo 5:21-26.

    Ĩandĩko ya Mathayo 5:23, 24 yĩkindĩlĩĩlaa ata kana ethĩwa mũamba witũ na ana-asa maitũ ti mũseo w’o nũtonya kũthũkya mũamba witũ na Yeova? (Mt. 6:14, 15; Sav. 133:1; Ako. 3:13; 1 Yoa. 4:20)

  • Soma Mathayo 6:1-8.

    Nĩ nzĩa imwe myaũ sya kwĩtalĩla ũlũngalu ila Aklĩsto maĩlĩtwe nĩ kwĩvathana nasyo? (Lk. 18:11, 12; 1 Ako. 4:6, 7; 2 Ako. 9:7)

  • Soma Mathayo 6:25-34.

    Yesũ amanyĩisye ata ĩũlũ wa vata wa kũmũĩkĩĩa Yeova atũnenge syĩndũ sya kwĩanĩsya mavata maitũ ma mwĩĩ? (Kuma 16:4; Sav. 37:25; Avi. 4:6)

  • Soma Mathayo 7:1-11.

    Ngelekany’o nzeo ĩla yĩ nthĩnĩ wa Mathayo 7:5 yĩtũmanyĩsya kyaũ? (Nth. 26:12; Alo. 2:1; 14:10; Yak. 4:11, 12)