Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 88: Yoana Aivatisa Yesũ

Ngewa ya 88: Yoana Aivatisa Yesũ

KWASISYA ĩvũĩ yĩtheete yĩvũĩle mũtwenĩ wa mũndũ ũũ. Ũ mũndũ nĩ Yesũ. E na ũkũũ wa ta myaka 30 yu. Na mũndũ ũsu wĩ nake nĩ Yoana. Nĩtũminĩte kwĩmanyĩsya ũndũ mũna ĩũlũ wake. Nũũlilikana yĩla Meli waendie kũthokea Elisavethi mũndũ wa mbaĩ yoo, na kana kala kaĩ ĩvunĩ yake kathaka nĩ mũyo? Kana kau kaĩ Yoana. Ĩndĩ Yoana na Yesũ meĩka ata vaa?

Ũvatiso wa Yesũ

Yoana eethĩiwe amina kũinda Yesũ kĩw’ũnĩ kya Ũsĩ wa Yolotani. Ũu nĩw’o mũndũ ũvatisawa. Mbee, athikawa kĩw’ũnĩ na ĩndĩ ayumĩlw’a ĩngĩ. Na nũndũ ũũ nĩw’o Yoana weekaa andũ, we eetawa Yoana Mũvatisi. Ĩndĩ Yoana avatisie Yesũ nĩkĩ?

Kĩtumi nũndũ Yesũ ookie na amũkũlya amũvatise. Yoana avatisaa andũ ala mekwenda kwonany’a kana nĩmekwĩlila nũndũ wa maũndũ mathũku ala meekĩte. Ĩndĩ Yesũ aaĩka ũndũ mũthũku ũla waaĩlĩte kwĩlila ĩũlũ waw’o? Aiee, kĩtumi nũndũ Yesũ nĩ Mwana wa Ngai mwene kuma ĩtunĩ. Kwoou akũlilye Yoana amũvatise nũndũ wa kĩtumi kĩ kĩvathũkany’o. Ekai twone kĩtumi.

Mbee wa Yesũ kũka vaa ve Yoana, Yesu aĩ mũseũvya wa syĩndũ sya mbwaũ, ta mesa na ivĩla. Mũũme wa Meli Yosevu aĩ mũseũvya wa syĩndũ isu, nake amũmanyĩsya Yesũ wĩa ũsu. Ĩndĩ Yeova ndaatũma Mwana wake oke kũũ nthĩ kũseũvya syĩndũ sya mbwaũ. Nĩwamũnengete wĩa wa mwanya, na ĩvinda yaĩ ĩviku ya Yesũ kwambĩĩa wĩa ũsu. Kwoou nĩ kana onany’e kana ookĩte kwĩka kwenda kwa Ngai, Yesũ nĩwamũkũlilye Yoana amũvatise. Ngai nĩweendeeiw’e nĩ ũndũ ũsu?

Ĩĩ, kĩtumi nũndũ, Yesũ ambata kuma kĩw’ũnĩ, wasya nĩwaumie ĩtunĩ na wasya: ‘Ũũ nĩ mwana wakwa, ũla nendeeaw’a nĩwe.’ Na ĩngĩ, ĩtu nĩyoonekie ta yavingũka na ĩvũĩ yatheea yavũĩla ĩũlũ wa Yesũ. Yĩĩ ti ĩvũĩ ya w’o. Yĩkĩta kwoneka yĩilyĩ ta ĩvũĩ. Ĩndĩ kwa w’o nĩ veva mũtheu wa Ngai.

Yu Yesũ aĩ na maũndũ maingĩ ma kũsũanĩa ĩũlũ wamo, kwoou athi vandũ vate andũ angĩ kwa mĩthenya 40. Na e kũu Satani ooka vala ũĩ. Nake amũtata mavinda atatũ eke ũndũ ũleanĩte na mĩao ya Ngai. Ĩndĩ Yesũ alea.

Ĩtina wa ũu, Yesũ nĩwasyokie na akomana na aũme amwe ala matw’ĩkie aatĩĩi make ma mbee, kana amanyĩw’a. Masyĩtwa amwe moo nĩ Vetelo (kana Simoni), Vilivu na Nathanaeli (kana Valitholomayo). Yesũ na amanyĩw’a asu eũ nĩmakũisye mathi nthĩ ya Kalilii. Mavika kũu nĩmaũngamie ndũanĩ ya Kena kũla Nathanaeli waumĩte. Me kũu Yesũ nĩwaendie mbokanĩ nene ya mũtwaano, na eeka kyama kyake kya mbee. We nĩwĩsĩ kyama kĩu kyailyĩ ata? Aalyũlile kĩw’ũ kyatw’ĩka mbinyu.

Mathayo 3:13-17; 4:1-11; 13:55; Maliko 6:3; Yoana 1:29-51; 2:1-12.



Makũlyo

  • Aũme aa elĩ me vaa visanĩ naaũ?
  • Mũndũ avatisawa ata?
  • Yoana avatisaa aaũ?
  • Nĩ kwa kĩtumi kyaũ kya mwanya Yesũ wamũkũlilye Yoana amũvatise?
  • Ngai oonanisye ata kana nĩwendeeiw’e nĩ ũvatiso wa Yesũ?
  • Kweethĩiwe ata yĩla Yesũ waendie vandũ vate na andũ angĩ kwa ĩvinda ya mĩthenya 40?
  • Aatĩĩi kana amanyĩw’a ma Yesũ ma mbee maĩ aaũ, na kyama kyake kya mbee nĩ kĩva?

Makũlyo ma kwongeleela

  • Soma Mathayo 3:13-17.

    Nĩ ngelekany’o myaũ Yesũ waiie ya ũndũ amanyĩw’a make maĩlĩte kũvatiswa? (Sav. 40:7, 8; Mt. 28:19, 20; Lk. 3:21, 22)

  • Soma Mathayo 4:1-11.

    Nzĩa ya Yesũ ya kũtũmĩa Maandĩko na ũĩ yĩtwĩkĩa vinya ata twĩmanyĩasye Mbivilia tũteũtĩĩa? (Mt. 4:5-7; 2 Vet. 3:17, 18; 1 Yoa. 4:1)

  • Soma Yoana 1:29-51.

    Yoana Mũvatisi eelekelye amanyĩw’a make kũla kwĩ ũũ, na tũtonya kwĩyĩelekany’a nake ata ũmũnthĩ? (Yoa. 1:29, 35, 36; 3:30; Mt. 23:10)

  • Soma Yoana 2:1-12.

    Kyama kya mbee kya Yesũ kĩonany’a ata kana Yeova ndavataa athũkũmi Make kĩndũ o na kĩva kĩseo? (Yoa. 2:9, 10; Sav. 84:11; Yak. 1:17)