Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 101: Kũawa kwa Yesũ

Ngewa ya 101: Kũawa kwa Yesũ

KWASISYA ũndũ ũũ mũthũku ũkwĩkĩka! Yesũ nũnũkũawa. Nĩmamũsũĩtye mũtĩnĩ. Mĩsumaa nĩathĩĩwe mokonĩ na maaũnĩ make. Nĩkĩ mekwenda kũmwĩka Yesũ ũu?

Yesũ aikw’a

Kĩtumi nũndũ andũ amwe nĩmamũmenete Yesũ. We nĩwĩsĩ mo naaũ? Ũmwe woo nĩ mũlaĩka mũthũku Satani ũla Ndevili. Nĩwe watumie Atamu na Eva malea kũmwĩw’a Yeova. Na nowe watumie amaitha ma Yesũ meka ũndũ ũũ mũthũku.

O na mbee wa Yesũ kũathĩĩwa na mĩsumaa mũtĩnĩ ũũ, amaitha make nĩmamwĩkie maũndũ mathũku. Lilikana ũndũ mookie mũũndanĩ wa Ngesemanii na mamũkwata. Amaitha asu maĩ aaũ? Maĩ atongoi ma ndĩni. Ekai twone ũndũ kwasyokie kwĩthĩwa.

Yĩla Yesũ wakwatiwe nĩ atongoi ma ndĩni, atũmwa make nĩmasembie makĩa. Matianĩsya Yesũ na amaitha make nũndũ nĩmeew’aa w’ĩa. Ĩndĩ atũmwa elĩ, Vetelo na Yoana, mayaathi kũasa mũno. Nĩmatĩĩie mone ũndũ Yesũ ũnũkwĩkwa.

Athembi nĩmamũtwaie Yesũ kwa mũtumĩa wĩtawa Anasi, ũla waĩ mũthembi mũnene vu mbee. Ĩndĩ ĩkomano yĩu yĩyaaĩkala vau mũno. Nĩyasyokie yamũtwaa nyũmba kwa Kaiava, ũla waĩ mũthembi mũnene ĩvinda yĩu. Atongoi aingĩ ma ndĩni nĩmombanĩe nyũmbanĩ kwake.

Vau nyũmbanĩ kwa Kaiava nĩmamũsilĩile Yesũ. Na andũ nĩmaetiwe vo maneene ũvũngũ ĩũlũ wa Yesũ. Atongoi onthe ma ndĩni nĩmaisye: ‘Yesũ aĩle kũawa.’ Na ĩndĩ mamũtw’ĩlanga mata ũthyũnĩ wake, na mamũkũna na ngundi.

Maũndũ asu onthe o maendee na kwĩkĩka, Vetelo aĩ o vau nza. Waĩ ũtukũ wĩ mbevo, na kwoou andũ mavuva mwaki. Na maendee na kwota mwaki, mũthũkũmi ũmwe wa mwĩĩtu asisya Vetelo, na asya: ‘Mũndũ ũũ o nake anaĩ vamwe na Yesũ.’

Nake Vetelo asũngĩa, ‘Aiee, ndinaĩ nake.’

Andũ nĩmamwĩie Vetelo mavinda atatũ kana anaĩ vamwe na Yesũ. Ĩndĩ kĩla ĩvinda Vetelo aasya ũu ti w’o. Ĩvinda ya katatũ Vetelo amina kwasya ũu, Yesũ eethyũũa na amũsiya. Vetelo nĩweewie woo mũno nũndũ wa kũkengana, nake athi na aĩa.

Syũa yambĩlĩĩlya kuma, mũthenya wa Katano kĩoko, athembi nĩmamũtwaie Yesũ nyũmbanĩ yoo ya Nzama Nene. Na vau masũanĩa vamwe ũndũ mekwĩkana nake. Na ĩndĩ mamũtwaa kwa Vondio Vilato, ngavana wa kĩvalo kya Yutia.

Na athembi asu mamwĩa Vilato, ‘Mũndũ ũũ nĩ mũthũku. Ailĩte kũawa.’ Ĩtina wa kũkũlya Yesũ makũlyo, Vilato asya: ‘Nyie ndikwona ekĩte ũndũ o na wĩva mũthũku.’ Na ĩndĩ Vilato anengane Yesũ atwawe kwa Elote Andiva. Elote nĩwe mũsumbĩ wa Kalilii, ĩndĩ ekalaa Yelusaleme. Elote o nake ndaaona ũndũ o na ũmwe mũthũku Yesũ weekĩte, kwoou amũtũnga ĩngĩ kwa Vilato.

Vilato nĩweendaa kũmũthasya Yesũ. Ĩndĩ amaitha ma Yesũ meendaa mwovwa ũngĩ athaw’e vandũ vake. Mũndũ ũsu aĩ kĩng’ei kyeetawa Valava. Kwaĩ ta mũthenya katĩ yĩla Vilato wamumaalilye Yesũ nza. Nake eea andũ: ‘Sisyai! Mũsumbĩ Wenyu!’ Ĩndĩ athembi anene mookĩlya wasya mayasya: ‘Mũvete! Mũae! Mũae!’ Kwoou Vilato athasya Valava, namo makua Yesũ akoawe.

Syũa yeeka vanini wa Katano, Yesũ nĩwaathĩĩiwe na mĩsumaa mũtĩnĩ ĩũlũ. Andũ elĩ athe, tũtatonya kũmona vaa visanĩ, o namo nĩmasũiw’e mũtĩnĩ makw’e. Mo maĩ ngalĩko ya kw’oko kwa aũme na kw’oko kwa aka kwa Yesũ. Kavinda kanini mbee wa Yesũ kũkw’a, ũmwe wa andũ asu athe nĩwamwĩie: ‘Wĩndilikana yĩla wĩlika ũsumbĩnĩ waku.’ Nake Yesũ amũsũngĩa: ‘Nĩngũkwatha kana ũkeethĩwa vamwe nakwa Valatisonĩ.’

Ũsu tyo watho mũseo? We nĩwĩsĩ nĩ Valatiso yĩva Yesũ waneenaa ĩũlũ wayo? Valatiso ĩla Ngai waseũvisye mwambĩlĩlyonĩ yaĩ va? Yaĩ kũũ nthĩ. Yĩla Yesũ ũkasumbĩka ĩtunĩ, akathayũũkya mũndũ ũsu atanĩe Valatiso ĩsu nzaũ kũũ nthĩ. Ũsu tyo ũndũ waĩlĩte kũtũtanĩthya?

Mathayo 26:57-75; 27:1-50; Luka 22:54-71; 23:1-49; Yoana 18:12-40; 19:1-30.



Makũlyo

  • Nũũ waĩlĩte kũtalĩlwa mavĩtyo nũndũ wa kĩkw’ũ kya Yesũ?
  • Atũmwa meekie ata yĩla Yesũ wakwatiwe nĩ atongoi ma ndĩni?
  • Nĩ ũndũ mwaũ weekĩkie nyũmbanĩ ya Kaiava, mũthembi mũnene?
  • Nĩkĩ Vetelo waaumaalile na aĩa?
  • Ĩtina wa Yesũ kũtũngwa kwa Vilato, athembi anene mauisye ũkemi mayasya ata?
  • Yesũ eekiwe ata mũthenya wa Katano syũa yeeka, na nũndũ mwaũ wamwathie mũndũ mwathe ũla wasũĩtw’e mũtĩnĩ ũtee wake?
  • Valatiso isu Yesũ waneenie ĩũlũ wayo ĩkeethĩwa va?

Makũlyo ma kwongeleela

  • Soma Mathayo 26:57-75.

    Nĩ kwa nzĩa myaũ asami ma nzama nene ya Ayuti moonanisye kana ngoo syoo syaĩ nthũku? (Mt. 26:59, 67, 68)

  • Soma Mathayo 27:1-50.

    Nĩkĩ tũtonya kwasya kana kwĩlila kwa Yutasi kũyaĩ kwa kuma ngoonĩ? (Mt. 27:3, 4; Mko. 3:29; 14:21; 2 Ako. 7:10, 11)

  • Soma Luka 22:54-71.

    Nĩ ĩsomo yaũ tũtonya kwĩmanyĩsya kũmana na Vetelo kũmũkaĩa Yesũ ũtukũ ũla wavũnyanĩiwe na akwatwa? (Lk. 22:60-62; Mt. 26:31-35; 1 Ako. 10:12)

  • Soma Luka 23:1-49.

    Yesũ eekie ata eekwa maũndũ mate ma ũlũngalu, na nĩ ĩsomo yaũ tũtonya kwĩmanyĩsya kuma ũndũnĩ ũsu? (Lk. 23:33, 34; Alo. 12:17-19; 1 Vet. 2:23)

  • Soma Yoana 18:12-40.

    O na kau Vetelo nĩwatelemile ĩvinda ĩvũthũ nũndũ wa ũkĩa andũ na ĩtina asyoka kũtw’ĩka mũtũmwa wa mwanya, ũndũ ũsu wĩonany’a ata? (Yoa. 18:25-27; 1 Ako. 4:2; 1 Vet. 3:14, 15; 5:8, 9)

  • Soma Yoana 19:1-30.

    Yesũ aĩ na woni mwaũ mũseo ĩũlũ wa syĩndũ sya kĩmwĩĩ? (Yoa. 2:1, 2, 9, 10; 19:23, 24; Mt. 6:31, 32; 8:20)

    Ndeto ila Yesũ waneenie kavinda kanini mbee wa kũkw’a syoonanisye ata kana aĩ mũsindi nthĩnĩ wa kũlũlũmĩĩlya ũsumbĩki mũnene wa Yeova nginya mũminũkĩlyo? (Yoa. 16:33; 19:30; 2 Vet. 3:14; 1 Yoa. 5:4)