Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 100: Yesũ e Mũũndanĩ

Ngewa ya 100: Yesũ e Mũũndanĩ

ĨTINA wa kuma nyũmbanĩ ya ĩũlũ ngolovanĩ, Yesũ na atũmwa make nĩmaendie mũũndanĩ wa Ngesemanii. Nĩmookĩte mũũndanĩ ũsu mavinda maingĩ vu mbee. Yesũ nĩwameie amanyĩw’a mekale masyaĩĩsye na kũvoya. Na ĩndĩ aendanga mbee vanini, na ainamya ũthyũ wake nginya nthĩ avoye.

Ĩtina Yesũ nĩwookie ĩngĩ vala atũmwa make maĩ. We wĩsũanĩa mekaa ata? Nĩmakomete! Yesũ nĩwamatavisye mavinda atatũ kana nĩmaĩlĩte kwĩkala masyaĩĩsye, ĩndĩ kĩla ĩvinda asyoka eethĩaa o makomete. Yesũ asyoka ĩvinda ya mũthya nĩwameie: ‘Mũtonya kũkoma ĩvinda ta yĩĩ ata? Saa nĩwavika wa nyie kũnenganwe kwa amaitha makwa.’

O ĩvindanĩ yĩu nĩmeewie kĩlonzo kya nguthu nene ya andũ. Kwasisya! Andũ asu mookĩte na mbyũ na mathimbũ! Na nĩmakuĩte mũĩ sya kũmanenga kyeni. Yĩla mathengeeie vakuvĩ, mũndũ ũmwe nĩwaumĩlile kuma nguthunĩ ĩsu na ooka nginya vala ve Yesũ. Na amũmumunya, o tondũ ũtonya kwona vaa. Mũndũ ũsu nĩ Yutasi Isikalioti! Amũmumunyie Yesũ nĩkĩ?

Yutasi aimũvũnyanĩa Yesũ

Yesũ nĩwamũkũlilye: ‘Yutasi wĩmbũnyania na kũmumunya?’ Kũmũmumunya kũu kwaĩ wonany’o. Eekie ũu nĩ kana andũ asu maĩ vamwe nake matonye kũmũmanya Yesũ, mũndũ ũla mamanthaa. Kwoou amaitha ma Yesũ mooka mamũkwata. Ĩndĩ Vetelo ndendaa mamũkwate vate kaũ. Kwoou akũa ũvyũ ũla wookĩte naw’o na atema mũndũ ũla waĩ vakuvĩ nake. Ũvyũ ũsu nĩwavĩtisye mũtwe wa mũndũ ũsu na watila kũtũ kwake kwa aũme. Ĩndĩ Yesũ akiita kũtũ kwa mũndũ ũsu na akũvosya.

Ĩndĩno Yesũ amwĩa Vetelo: ‘Tũngĩa ũvyũ waku vandũ vaw’o. Kana wĩasya nditonya kũmũvoya Asa wakwa nake aindetee alaĩka ngili mbingĩ mambonokye?’ Ĩĩ, Yesũ nũtonya kwĩka ũu! Ĩndĩ we ndaavoya Ngai atũme alaĩka o na amwe nũndũ nĩweesĩ kana ĩvinda yaĩ ĩviku ya kũkwatwa nĩ amaitha make. Kwoou aeka mamũkwate. Ekai yu twone ũndũ ũla wamũkwatie Yesũ.

Mathayo 26:36-56; Luka 22:39-53; Yoana 18:1-12.



Makũlyo

  • Yesũ na atũmwa make maendie va ĩtina wa kuma nyũmbanĩ ya ĩũlũ ngolovanĩ, nake ameie nĩmeke ata?
  • Yesũ eethĩie ata asyoka vala ve atũmwa make, na ũndũ ũsu weekĩkie mavinda meana?
  • O tondũ visa ũkwonany’a, naaũ malikile mũũndanĩ, na Yutasi Isikalioti eekie ata?
  • Yutasi amũmumunyie Yesũ nĩkĩ, nake Vetelo eekie ata?
  • Yesũ eeie Vetelo ata, ĩndĩ nĩkĩ Yesũ ũtaavoya Ngai atũme alaĩka o na amwe?

Makũlyo ma kwongeleela

  • Soma Mathayo 26:36-56.

    Nĩkĩ nzĩa ĩla Yesũ watũmĩie kũtaa amanyĩwa make nĩ ngelekany’o nzeo kwa atumĩa ma Kĩkundi ũmũnthĩ? (Mt. 20:25-28; 26:40, 41; Aka. 5:17; Aev. 4:29, 31, 32)

    Yesũ awonie ata ũtũmĩi wa mĩio ya kaũ kũkita na andũ ala angĩ? (Mt. 26:52; Lk. 6:27, 28; Yoa. 18:36)

  • Soma Luka 22:39-53.

    Yĩla mũlaĩka waumĩlĩĩile Yesũ mũũndanĩ wa Ngesemanii amũlũlũmĩĩlye, ũndũ ũsu woonanasya kana Yesũ aĩ anakwatwa nĩ nzika mũĩkĩĩonĩ wake? Elesya. (Lk. 22:41-43; Isa. 49:8; Mt. 4:10, 11; Aevl. 5:7)

  • Soma Yoana 18:1-12.

    Yesũ amasũvĩie amanyĩw’a make ata kumana na avinganĩsya make, na tũtonya kwĩmanyĩsya kyaũ kumana na ngelekany’o ĩsu? (Yoa. 10:11, 12; 18:1, 6-9; Aevl. 13:6; Yak. 2:25)