Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 73: Mũsumbĩ Mũseo wa Mũthya wa Isilaeli

Ngewa ya 73: Mũsumbĩ Mũseo wa Mũthya wa Isilaeli

YOSIA aĩ na ũkũũ o wa myaka nyanya yĩla watw’ĩkie mũsumbĩ wa mbaĩ ila ilĩ sya ĩtheo sya Isilaeli. Ĩsu yaĩ myaka mĩnini mũno kwa mũndũ kũtw’ĩka mũsumbĩ. Kwoou ambĩĩa kũsumbĩka nĩwatetheeiw’e nĩ andũ amwe aima kũsumbĩka ĩ nthĩ.

Ĩtina wa kũsumbĩka myaka mũonza, Yosia nĩwambĩĩie kũmũmantha Yeova. Atĩĩie ngelekany’o ya asumbĩ aseo ta Ndaviti, Yeosavati, na Esekia. Na ĩndĩ e o mwanake, Yosia eekaa ũndũ wa ũkũmbaũ.

Mũsumbĩ Yosia na andũ make mayananga mĩvyw’anano

Kwa ĩvinda yĩasa Aisilaeli aingĩ meethĩĩtwe me athũku. Mathaithaa ngai sya ũvũngũ na kũkumanĩa mĩvw’anano. Kwoou Yosia na aũme make maumaala na mambĩĩa kũvetanga ũthaithi wa ũvũngũ kuma ĩ nthĩ. Ũsu waĩ wĩa mũnene mũno nũndũ andũ aingĩ mũno mathaithaa ngai sya ũvũngũ. Nũtonya kwona Yosia vaa na aũme make mayananga mĩvw’anano

Ĩtina wa ũu Yosia nĩwaiie aũme atatũ maũngamĩe wĩa wa kũseũvya ĩkalũ ya Yeova. Mbesa nĩsyoombaniwe kuma kwĩ andũ na syanewa aũme asu nĩ kana maĩve atethya ma wĩa ũsu. Namo maendee na kũthũkũma ĩkalũnĩ, mũthembi mũnene Ilikia nĩwoonie kĩndũ kya vata mũno vau. Oonie ĩvuku ya mĩao yĩla Yeova weeie Mose aandĩke ĩvinda yĩasa mũno ĩthelu. Yo yaaĩte myaka mingĩ.

Ĩvuku yĩu nĩyatwaĩwe Yosia nake asya asomewe. Yĩla Yosia weethukĩĩisye, nĩwoonie kana andũ nĩmaekete kũatĩĩa mĩao ya Yeova. Nĩweewie kyeva mũno nĩ ũndũ ũsu, na atembũanga ngũa syake o tondũ ũtonya kwona vaa. Na asya: ‘Yeova nĩ mũthilĩku nũndũ witũ, kĩtumi nũndũ aaĩthe maitũ mayaakwata mĩao ĩla ĩandĩkĩtwe ĩvukunĩ yĩĩ.’

Savani na Mũsumbĩ Yosia

Na Yosia amwĩĩaĩa mũthembi mũnene Ilikia amũkũlye Yeova ũndũ we Yeova ũkwĩkana na andũ asu. Nake Ilikia athi kũkũlya mwathani mũndũ mũka weetawa Ulita. Ulita amũnengie Ilikia ũtũmani ũũ kuma kwa Yeova amũtwaĩe Yosia: ‘Yelusaleme na andũ onthe nĩmeũsilĩlwa nũndũ nĩmathaithĩte ngai sya ũvũngũ na ĩ nthĩ ĩkausũwa nĩ ũthũku. Ĩndĩ nũndũ, we Yosia, nĩwĩkĩte ũla ũseo, ũsilĩlo ũũ ũkooka ĩtina wa kĩkw’ũ kyaku.’

2 Mavinda 34:1-28.



Makũlyo

  • Yosia aĩ na ũkũũ mwaũ yĩla watw’ĩkie mũsumbĩ, na ambĩĩie kwĩka ata ĩtina wa myaka mũonza ya ũsumbĩ wake?
  • We wĩona Yosia aeendee na kwĩka ata vaa visanĩ?
  • Mũthembi mũnene oonie kyaũ ĩkalũ yĩendee na kũseũvw’a?
  • Yosia atembũangie ngũa syake nĩkĩ?
  • Nĩ ũtũmani mwaũ kuma kwa Yeova ũla Ulita, mwathani mũndũ mũka, wamũtwaĩe Yosia?

Makũlyo ma kwongeleela

  • Soma 2 Mavinda 34:1-28

    Yosia enengane ngelekany’o myaũ kwa ala matonya kwĩthĩwa momĩĩisye thĩna ĩvinda ya kwĩana kwoo? (2 Mav. 33:21-25; 34:1, 2; Sav. 27:10)

    Yosia eekie maũndũ maũ manene makũendeesya na mbee ũthaithi wa w’o ĩvindanĩ ya mwaka wa 8, 12, 18 ya ũsumbĩ wake? (2 Mav. 34:3, 8)

    Nĩ ĩsomo yaũ ya kwĩkalya kũndũ kwitũ kwa kũthaithĩa kwĩ kũseo tũtonya kwĩmanyĩsya kumana na ngelekany’o ĩla yaiiwe nĩ Mũsumbĩ Yosia na Mũthembi Mũnene Ilikia? (2 Mav. 34:9-13; Nth. 11:14; 1 Ako. 10:31)