Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 72: Nĩwamũtetheeisye Mũsumbĩ Esekia

Ngewa ya 72: Nĩwamũtetheeisye Mũsumbĩ Esekia

WE NĨWĨSĨ nĩkĩ mũndũ ũũ ũkũvoya Yeova? We aiĩte valũa ii itambũũkĩte mbee wa kĩthembeo kya Yeova nĩ kĩ? Ũ mũndũ nĩ Esekia. We nĩ mũsumbĩ wa mbaĩ ilĩ sya ĩtheo sya Isilaeli. Nake e thĩnanĩ mũnene. Nĩkĩ?

Mũsumbĩ Esekia aivoya

Kĩtumi nũndũ ita sya Asuli nĩsyaminĩte kwananga ũsumbĩ wa ĩũlũ wa mbaĩ 10. Yeova aekie ũndũ ũsu wĩkĩke nũndũ andũ asu maĩ athũku mũno. Na yu ita isu nĩsyookĩte kũkita na ũsumbĩ ũla wa ila mbaĩ ilĩ.

Mũsumbĩ wa Asuli nĩwatũmanie valũa kwa Mũsumbĩ Esekia. Valũa isu nĩsyo ii Esekia wiĩte vaa mbee wa Ngai. Nĩ valũa sya kũmũthekeea Yeova, na kũmwĩa Esekia etĩkĩle nĩmũsinde. Kwoou kĩu nĩkyo kĩtumi Esekia ũkũvoya ayasya: ‘Ame Yeova, tũtangĩĩe kuma kwa mũsumbĩ wa Asuli. Nĩvo ĩndĩ mbaĩ syonthe ikamanya kana we wĩ weka nue Ngai.’ Yeova nũkũmwĩthukĩĩsya Esekia?

Esekia aĩ mũsumbĩ mũseo. We ndailyĩ ta asumbĩ athũku ma ũsumbĩ ũla wa mbaĩ 10 sya Isilaeli, kana ĩthe wake mũthũku Aasi. We aĩ na kĩthito nthĩnĩ wa kũkwata mĩao ya Yeova yonthe. Kwoou, Esekia amina kũvoya, mwathani Isaia nĩwanenganie ũtũmani ũũ kuma kwa Yeova: ‘Mũsumbĩ wa Asuli ndakalika Yelusaleme. O na vaiĩ ũmwe wa asikalĩ make ũkathengeea Yelusaleme. Na maikekya mũsyĩ o na ũmwe ĩ ndũanĩ.’

Kwasisya visa ũũ wĩ vaa. We nĩwĩsĩ asikalĩ aa onthe akw’ũ naaũ? Nĩ Asuli. Yeova atũmie mũlaika wake, na nthĩnĩ wa ũtukũ ũmwe mũlaĩka ũsu ooaa asikalĩ 185,000 ma Asuli. Kwoou mũsumbĩ wa Asuli eeyĩtũka na asyoka kwoo.

Asikali ma Asuli me akw’ũ

Ũsumbĩ wa ila mbaĩ ilĩ nĩwavonokiw’e, na andũ meethĩwa na mũuo kwa ĩvinda ĩna. Ĩndĩ ĩtina wa Esekia kũkw’a mwana wake Manase nĩwatw’ĩkie mũsumbĩ. Manase na mwana wake Amoni ũla wasumbĩkie ĩtina wake, elĩ maĩ asumbĩ athũku. Kwoou nthĩ yausũwa ĩngĩ nĩ ũtũli wa mĩao na ũng’endu. Mũsumbĩ Amoni ooawa nĩ athũkũmi make mwene, mwana wake Yosia nĩwatwiwe mũsumbĩ wa ũsumbĩ ũla wa mbaĩ ilĩ.

2 Asumbĩ 18:1-36; 19:1-37; 21:1-25.



Makũlyo

  • Mũndũ ũũ wĩ visanĩ nũũ, na nĩkĩ wĩ thĩnanĩ mũnene?
  • Nĩ valũa sya mũthemba mwaũ ii Esekia waia mbee wa Ngai, na Esekia evoya ata?
  • Esekia aĩ mũsumbĩ ũilyĩ ata, na nĩ ũtũmani wa mũthemba mwaũ ũla Yeova wamũtũmĩie kwĩsĩla mwathani Isaia?
  • Mũlaĩka wa Yeova eekanie ata na Asuli, o tondũ kwonanĩtw’e vaa visanĩ?
  • O na kau ũsumbĩ wa mbaĩ ilĩ waĩ na mũuo kwa ĩvinda ĩna, kweethĩiwe ata ĩtina wa kũkw’a kwa Esekia?

Makũlyo ma kwongeleela

  • Soma 2 Asumbĩ 18:1-36.

    Mũneeni wa Asuli Lavi-sake atatie ata kuleelya mũĩkĩĩo wa Aisilaeli? (2 Asu. 18:19, 21; Kuma 5:2; Sav. 64:3)

    Yĩla Ngũsĩ sya Yeova iũthĩnany’a na amaitha moo, syo iatĩĩaa ata ngelekany’o ya Esekia? (2 Asu. 18:36; Sav. 39:1; Nth. 26:4; 2 Tim. 2:24)

  • Soma 2 Asumbĩ 19:1-37

    Andũ ma Yeova ũmũnthĩ meyĩelekanasya na Esekia ata ĩvinda ya mathĩna? (2 Asu. 19:1, 2; Nth. 3:5, 6; Aevl. 10:24, 25; Yak. 5:14, 15)

    Mũsumbĩ Senakelivu asindiwe ata kwa nzĩa itatũ, nake eelekany’a ũũ kwa nzĩa ya wathani? (2 Asu. 19:32, 35, 37; Ũvu. 20:2, 3)

  • Soma 2 Asumbĩ 21:1-6, 16.

    Nĩkĩ tũtonya kwasya kana Manase aĩ ũmwe wa asumbĩ athũku vyũ ala maasumbĩka nthĩnĩ wa Yelusaleme? (2 Mav. 33:4-6, 9)