Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 70: Yona na Ĩkũyũ Ĩnene

Ngewa ya 70: Yona na Ĩkũyũ Ĩnene

KWASISYA mũndũ ũũ wĩ kĩw’ũnĩ nthĩnĩ. E thĩnanĩ mũnene mũno, kana ti w’o? Ĩkũyũ yĩĩ yĩkilye kũmũmelya! We nĩwĩsĩ mũndũ ũũ nũũ? Syĩtwa yake nĩ Yona. Ekai twone alikile thĩnanĩ ũnenevete ũu ata.

Yona aĩ mwathani wa Yeova. Ĩvinda yĩte ĩasa ĩtina wa mwathani Elisa kũkw’a Yeova nĩweeie Yona ũũ: ‘Enda ndũanĩ nene ya Nineva. Ũthũku wa andũ nĩ mũnene mũno kũu, na nĩngwenda kũneena namo ĩũlũ wa w’o.’

Yona na ĩkũyũ ĩnene

Ĩndĩ Yona ndendaa kũthi. Kwoou alĩsa ngalawa yaendete ngalĩko ĩngĩ eka Nineva. Yeova ndaaendeew’a nĩ kĩko kĩu kya Yona kya kũtoloka. Kwoou Aete kĩuutani kĩnene ũkanganĩ. Kyaĩ na vinya mwingĩ mũno, nakyo kyaĩ vakuvĩ kũthika ngalawa kĩw’ũnĩ. Atwai ma ngalawa nĩmeewie w’ĩa mũno, na meekaĩla ngai syoo imatethye.

Ĩndĩno Yona amea: ‘Nyie nĩthaithaa Yeova, Ngai ũla woombie matu na nthĩ. Nakwa ngĩĩte ndikeke ũndũ Yeova ũmbĩie nĩke.’ Kwoou atwai asu ma ngalawa mamũkũlya: ‘Twĩkwĩka ata nĩ kana ũkanga ũusye?’

Nake Yona amea: ‘Mbĩkyai ũkanganĩ, na ũkanga nũkũusya ĩngĩ.’ Atwai ma ngalawa mayeendaa kwĩka ũu, ĩndĩ yĩla kĩuutani kyaendeeie na kwingĩva, mamwĩkya Yona ũkanganĩ. Na vau kwa vau kĩuutani kyathela, naw’o ũkanga wausya ĩngĩ.

Yona alika kĩw’ũnĩ, ĩkũyũ yĩĩ ĩnene nĩyamũmelilye. Ĩndĩ ndaakw’a. Yona ekalile mĩthenya ĩtatũ na motukũ atatũ ĩvunĩ ya ĩkũyũ yĩu. Nĩweelilile mũno nũndũ wa kũlea kũmwĩw’a Yeova na kũthi Nineva. We nĩwĩsĩ ũndũ weekie?

Yona nĩwavoyie Yeova amũtethye. Na ĩndĩ Yeova atuma ĩkũyũ yĩu yĩmũtavĩka nthĩ nyũmũ. Ĩtina wa ũu Yona nĩwaendie Nineva. Ũndũ ũũ wĩtũmanyĩsya kana nĩ ũndũ wa vata ithyĩ kwĩka maũndũ onthe ala Yeova ũnũkwasya twĩke.

Ĩvuku ya Mbivilia ya Yona.



Makũlyo

  • Yona nũũ, na Yeova amwĩie nĩeke ata?
  • Yona eekie ata nũndũ ndendaa kũthi kũla Yeova wamwie athi?
  • Yona ameie andũ ma ngalawa nĩmeke ata nĩ kana ũkanga ũusye?
  • O tondũ we ũtonya kwona vaa visanĩ, kweethĩiwe ata kwa Yona amina kũlika kĩw’ũnĩ nthĩnĩ?
  • Yona ekalile ĩvinda yĩana ata ĩvunĩ ya ĩkũyũ yĩu ĩnene, na eekie ata yĩla waĩ vo?
  • Yona aendie va ĩtina wa kuma nthĩnĩ wa ĩkũyũ yĩu ĩnene, na ũndũ ũsu wĩtũmanyĩsya kyaũ?

Makũlyo ma kwongeleela

  • Soma Yona 1:1-17.

    Kwa w’o, Yona aĩ na mawoni maũ ĩũlũ wa wĩa ũla wanengiwe wa kũthi kũtavya Anineva? (Yona 1:2, 3; Nth. 3:7; Mũta. 8:12)

  • Soma Yona 2:1, 2, 10.

    Ũndũ ũsu wamũkwatie Yona ũtũĩkĩĩthasya ata kana Yeova akasũngĩa mboya sitũ? (Sav. 22:24; 34:6; 1 Yoa. 5:14)

  • Soma Yona 3:1-10.

    Twĩkĩawa vinya ata nĩkũmanya kana Yeova nĩwaendeeie na kũmũtũmĩa Yona o na kau nĩwaleile kũtethya wĩa ũla wanengetwe mbee? (Sav. 103:14; 1 Vet. 5:10)

    Maũndũ ala Yona woonie makonanĩtye na andũ ma Nineva metũmanyĩsya kyaũ ĩũlũ wa kũtw’ĩĩa andũ kana nĩmekwĩthukĩĩsya kana maiĩthukĩĩsya kĩsionĩ kĩla tũaĩwe kũtavany’a? (Yona 3:6-9; Mũta. 11:6; Meko 13:48)