Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 67: Yeosavati Nĩwamũĩkĩĩie Yeova

Ngewa ya 67: Yeosavati Nĩwamũĩkĩĩie Yeova

WE NĨWĨSĨ aũme aa naaũ namo meĩka ata? Maendete kaũnĩ, namo aũme asu matongoetye nĩmekwina. Ĩndĩ no ũkũlye: ‘Nĩkĩ aini mate na mbyũ na matumo ma kũkita namo?’ Ekai tw’one.

Aisilaeli maendete kaũnĩ

Yeosavati aĩ mũsumbĩ wa ũsumbĩ wa mbaĩ ilĩ sya Isilaeli. Aĩ kw’o ĩvinda yĩmwe na Mũsumbĩ Aavu na Yeseveli ma ũsumbĩ wa ĩũlũ wa mbaĩ 10. Ĩndĩ Yeosavati aĩ mũsumbĩ mũseo, na ĩthe wake Asa o nake aĩ mũsumbĩ mũseo. Kwoou kwa myaka mingĩ andũ ma ũsumbĩ wa ĩtheo wa mbaĩ ilĩ nĩmatanĩie thayũ mũseo.

Ĩndĩ ũndũ mũna wakũtelemya andũ nĩweekĩkie. Atũmwa nĩmamũeteie Yeosavati ũtũmani ũũ: ‘Nguthu nene ya ita kuma nthĩ sya Moavi, Amimoni, na Kĩĩma kya Seili nĩmokĩte kũkita naku.’ Nĩw’o ĩndĩ Aisilaeli aingĩ moombanĩie Yelusaleme nĩ kana mamanthe ũtethyo wa Yeova. Namo mathi ĩkalũnĩ na vau Yeosavati avoya ayasya: ‘Ame Yeova Ngai witũ ithyĩ tũyĩsĩ ũndũ tũkwĩka. Tũi na ũtonyi wa kũkita na nguthu ĩno nene ya ita. Metho maitũ me vala ũĩ ũtũtethye.’

Yeova nĩweewie mboya yoo, na eea ũmwe wa athũkũmi make atavye andũ ũũ: ‘Kaũ ti wenyu, ĩndĩ nĩ wa Ngai. Mũi na vata wa kũkita. Syaĩĩsyai, mwone ũndũ Yeova ũkũmũvonokya.’

Na kwoou kĩoko kĩla kyaatĩĩe Yeosavati atavya andũ amea: ‘Ĩkĩĩai Yeova!’ Na ĩndĩ aia aini mbee wa asikalĩ make, na maendete mainaa mbathi sya kũmũtaĩa Yeova. We nĩwĩsĩ ũndũ kweekĩkie yĩla mathengeeie kaũnĩ? Yeova atumie asikalĩ ma amaitha mambĩĩa kũkita mo ene kwa ene. Na yĩla Aisilaeli mavikie, sisya, kĩla mũsikalĩ mũmaitha aĩ mũkw’ũ!

Yeosavati nĩweekie ũndũ wa ũĩ kũmũĩkĩĩa Yeova. Ũkeethĩwa wĩ ũndũ wa ũĩ ethĩwa o naitũ tukamũĩkĩĩa.

1 Asumbĩ 22:41-53; 2 Mavinda 20:1-30.


Makũlyo

  • Yeosavati nũũ, na aĩ thayũ ĩvinda yĩva?
  • Nĩkĩ Aisilaeli mena kĩmako, na aingĩ moo meekie ata?
  • Yeova anenganie ũsũngĩo mwaũ kwa mboya ya Yeosavati?
  • Yeova atumie kwĩkĩka ata mbee wa kaũ kũkitwa?
  • Nĩ ĩsomo yaũ tũtonya kwĩmanyĩsya kuma kwa Yeosavati?

Makũlyo ma kwongeleela

  • Soma 2 Mavinda 20:1-30.

    Yeosavati eonany’a ata kĩla athũkũmi aĩkĩĩku ma Ngai maĩlĩtwe nĩkwĩka makwatwa nĩ ũndũ wa ũtelemya? (2 Mav. 20:12; Sav. 25:15; 62:1)

    Tondũ Yeova ĩvinda yonthe eethĩtwe aitũmĩa nzĩa ya mwanya yĩla ũkũneena na andũ make, ũmũnthĩ atũmĩaa nzĩa yĩva? (2 Mav. 20:14, 15; Mt. 24:45-47; Yoa. 15:15)

    Yĩla Ngai ũkambĩlĩĩlya “kaũ wa mũthenya mũnene wa Ngai Mwene Vinya W’onthe,” ũvoo witũ ũkethĩwa ũvw’anene ata na ũla wa Yeosavati? Mav. 20:15, 17; 32:8; Ũvu. 16:14, 16)

    Ta Alivai, mavainia na amisonalĩ matetheeasya ata wĩa wa kũtavany’a nthĩ yonthe ũmũnthĩ? (2 Mav. 20:19, 21; Alo. 10:13-15; 2 Tim. 4:2)