Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 66: Yeseveli—Kĩveti Kĩthũku kya Mũsumbĩ

Ngewa ya 66: Yeseveli—Kĩveti Kĩthũku kya Mũsumbĩ

ASUMBĨ onthe ala masumbĩkie mbaĩ 10 sya Isilaeli ĩtina wa Yelovoamu kũkw’a, maĩ athũku. Mũsumbĩ Aavu nĩwe waĩ mũthũku vyũ. Nĩwĩsĩ nĩkĩ? Kĩtumi kĩmwe kĩnene nĩ mũka wake Yeseveli, kĩveti kĩthũku.

Yeseveli ndaĩ Mũisilaeli. Aĩ mwĩĩtu wa mũsumbĩ wa Sitoni. We athaithaa ngai ya ũvũngũ Mbaali, na nĩwatumĩte Aavu na andũ angĩ aingĩ ma Isilaeli o namo maambĩĩa kũthaitha Mbaali. Yeseveli nĩwamenete Yeova na nĩwoaie athani make aingĩ. Yaĩ no nginya amwe mevithe ngunganĩ nĩ kana maikoawe. Yeseveli enda kĩndũ, aĩ atonya kũaa mũndũ nĩ kana akĩkwate.

Mũthenya ũmwe Aavu aĩ na kyeva mũno. Na Yeseveli amũkũlya: ‘Nĩkĩ wĩna kyeva ũmũnthĩ?’

Aavu amũsũngĩa: ‘Nũndũ wa ndeto ila Navothi ũndavisye. Nĩendaa kũthooa mũũnda wake wa mĩsavivũ. Ĩndĩ ambĩa mũũnda ũsu ndũtonya kũtw’ĩka wakwa.’

Yeseveli nake amwĩa: ‘Ndũkethĩwe na kyeva, nyie nĩngũkwosea mũũnda ũsu.’

Kwoou Yeseveli amaandĩkĩa mavalũa anene ma ndũa ĩla Navothi wekalaa. Na amea: ‘Osai andũ athe na mũimea masye kana Navothi nũumĩte Ngai na mũsumbĩ. Na ĩndĩ mũimumaalya nza wa ndũa na mũimũkimanga na mavia akw’e.’

Yeseveli amina kũmanya kana Navothi nĩ mũkw’ũ, amwĩa Aavu: ‘Ũkĩla yu wose mũũnda wake wa mĩsavivũ.’ We ndũkwĩtĩkĩla kana Yeseveli nĩwaĩlĩte kũsilĩlwa nũndũ wa kwĩka ũndũ ũsu mũthũku?

Kĩveti kya Mũsumbĩ

Kwoou, ĩtina wa ĩvinda ĩna, Yeova nĩwatũmie mũndũ wĩtawa Yeu akamũsilĩle. Yĩla Yeseveli weewie kana Yeu nĩwũkĩte, avaka metho make langi na atata kwĩyanakavya. Ĩndĩ ĩla Yeu wookie na amwona ndĩlĩsyanĩ, amea aũme ala maĩ nyũmbanĩ ya mũsumbĩ: ‘Mwĩkyei nthĩ!’ Na o tondũ ũtonya kwona vaa visanĩ, aũme asu nĩmwakisye nthĩ akw’a. Ũsu nĩw’o waĩ mũminũkĩlyo wa Yeseveli, kĩveti kĩthũku kya mũsumbĩ.

1 Asumbĩ 16:29-33; 18:1-4; 21:1-16; 2 Asumbĩ 9:30-37.



Makũlyo

  • Yeseveli nũũ?
  • Mũthenya ũmwe Mũsumbĩ Aavu aĩ na kyeva nĩkĩ?
  • Yeseveli eekie ata akwate mũũnda wa Navothi nĩ kana aũnenge mũũme wake, Aavu?
  • Yeova atũmie ũũ akasilĩle Yeseveli?
  • Tondũ ũtonya kwona vaa visanĩ, kwaendie ata Yeu avika nyũmbanĩ ya ũsumbĩ ya Yeseveli?

Makũlyo ma kwongeleela

  • Soma 1 Asumbĩ 16:29-33 na 18:3, 4.

    Mĩkalĩle nthĩnĩ wa Isilaeli yathũkĩte ata ĩvinda ya Mũsumbĩ Aavu? (1 Asu. 16:33)

  • Soma 1 Asumbĩ 21:1-16.

    Navothi onanisye ata ũkũmbaũ na kũmũĩkĩĩa Yeova? (1 Asu. 21:1-3; Ali. 25:23-28)

    Kumana na ngelekany’o ya Aavu, tũtonya kwĩmanyĩsya kyaũ ĩũlũ wa kũmĩĩsya ĩvinda ya kũtũlika ngoo? (1 Asu. 21:4; Alo. 5:3-5)

  • Soma 2 Asumbĩ 9:30-37.

    Tũtonya kwĩmanyĩsya kyaũ kumana na kĩthito kya Yeu kya kwĩka kwenda kwa Yeova? (2 Asu. 9:4-10; 2 Ako. 9:1, 2; 2 Tim. 4:2)