Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 64: Solomoni Ayaka Ĩkalũ

Ngewa ya 64: Solomoni Ayaka Ĩkalũ

MBEE wa Ndaviti atanakw’a, nĩwanengie Solomoni ngelekany’o yaumĩte kwa Ngai ya kwaka ĩkalũ. Nthĩnĩ wa mwaka wa kana wa ũsumbĩ wake, Solomoni nĩwambĩĩie kwaka ĩkalũ, nayo yathela ĩtina wa myaka mũonza na nyusu. Ĩkalũ yĩu yaakiwe nĩ aũme ngili mbingĩ, na mwako ũsu watũmĩie mbesa mbingĩ mũno. Kĩtumi nũndũ thaavu na vetha mwingĩ mũno nĩsyatũmĩiwe.

Ĩkalũ yaĩ na nyũmba ilĩ nene, o tondũ ĩeema ya kũmbanĩa yailyĩ. Ĩndĩ nyũmba isu syaĩ nene kũndũ kwĩlĩ kwa ila syaĩ ĩeemanĩ ya kũmbanĩa. Solomoni nĩwaisye ĩsandũkũ ya ũtianĩo yiwe nyũmbanĩ ya nthĩnĩ vyũ ya ĩkalũ, na syĩndũ ila ingĩ syaiĩtwe ĩeemanĩ ya kũmbanĩa asya siwe nyũmbanĩ ĩsu ĩngĩ.

Ĩkalũ yaakwa yathela, kwaĩ na mboka nene mũno. Na Solomoni atulya ndu ĩkalũnĩ vau mbee na avoya, o tondũ ũtonya kwona vaa visanĩ. Nake amwĩa Yeova, ‘Ethĩwa o na ĩtu yonthe yĩitonya ũkwĩanĩa, nyũmba ĩno ĩtonya ata? Ĩndĩ, ame Ngai, nĩngũkwĩsũva ĩthukĩĩsye andũ maku yĩla meũvoya melekele vandũ vaa.’

Mũsumbĩ Solomoni aivoya

Solomoni amina kũvoya, mwaki nĩwatheeie kuma ĩtunĩ. Na wavĩvya nthembo sya nyamũ ila syathĩnzĩtwe. Na ũtheu mũtisu kuma kwa Yeova wausũa ĩkalũnĩ. Ũu wĩonany’a kana Yeova nĩweethukĩĩisye, na kana nĩwendeeiw’e nĩ ĩkalũ na mboya ya Solomoni. Vandũ va kũthi kũthaithia ĩeemanĩ ya kũmbanĩa andũ nĩmambĩĩe kũthi ĩkalũnĩ.

Solomoni asumbĩkie kwa nzĩa ya ũĩ ĩvinda yĩasa, na andũ maĩ atanũ. Ĩndĩ Solomoni atwaa iveti mbingĩ kũma nthĩ ingĩ ila itathaithaa Yeova. We nũtonya kwona kĩmwe kyasyo kĩithaitha mbee wa mũvw’anano? Ĩtina vyũ iveti sya Solomoni nĩsyamũvĩndũie ambĩĩa kũthaitha ngai ingĩ. We nĩwĩsĩ ũndũ kweekĩkie yĩla Solomoni weekie ũu? We nĩwaekie kwĩka andũ nesa. Nĩwatw’ĩkie mũndũ mũthũku mũno, na andũ maeka kwĩthĩwa na ũtanu.

Mũsumbĩ Solomoni aithaitha mũvw’anano

Ũndũ ũũ nĩwatumie Yeova athilĩkĩla Solomoni, na amwĩa: ‘Ngaũvena ũsumbĩ na ngĩũnenga mũndũ ũngĩ, no ndikeka ũu ĩvinda ya thayũ waku, ĩndĩ ĩvinda ya ũsumbĩ wa mwana waku. Ĩndĩ ndikavenana andũ onthe ma ũsumbĩ ũsu kuma kwa mwana waku.’ Ekai twone ũu weethĩiwe ata.

1 Mavinda 28:9-21; 29:1-9; 1 Asumbĩ 5:1-18; 2 Mavinda 6:12-42; 7:1-5; 1 Asumbĩ 11:9-13.



Makũlyo

  • Solomoni akuie ĩvinda yĩana ata kũmina kwaka ĩkalũ ya Yeova, na nĩkĩ yatũmĩie mbesa mbingĩ mũno?
  • Ĩkalũnĩ vaĩ na nyũmba siana nene, na nĩ kyaũ kyaiiwe nyũmbanĩ ya nthĩnĩ?
  • Solomoni aisye ata mboyanĩ yake ĩkalũ yamina kwakwa?
  • Yeova oonanisye ata kana nĩwendeeiw’e nĩ mboya ya Solomoni?
  • Iveti sya Solomoni syamũvĩndũie ambĩĩa kwĩka ata, nake Solomoni akwatiwe nĩ kyaũ?
  • Nĩkĩ Yeova wathilĩkilw’e nĩ Solomoni mũno, nake amwĩie Solomoni ata?

Makũlyo ma kwongeleela

  • Soma 1 Mavinda 28:9, 10.

    Kwa kũsũanĩa ndeto sya Ndaviti ila iandĩkĩtwe nthĩnĩ wa 1 Mavinda 28:9, 10, twaĩlĩte kũtata kwĩkaa ata kĩla mũthenya? (Sav. 19:14; Avi. 4:8, 9)

  • Soma 2 Mavinda 6:12-21, 32-42.

    Solomoni oonanisye ata kana vaiĩ nyũmba yakĩtwe nĩ mũndũ ĩtonya kwĩanĩa Ngai Ũla Wĩ Ĩũlũ wa Onthe? (2 Mav. 6:18; Meko 17:24, 25)

    Ndeto sya Solomoni ila syĩ nthĩnĩ wa 2 Mavinda 6:32, 33 syonanasya ata ĩũlũ wa Yeova? (Meko 10:34, 35; Aka. 2:6)

  • Soma 2 Mavinda 7:1-5.

    O ta ũndũ Aisilaeli masukumiwe mamũkumye Yeova nũndũ wa kwona ũtheu wake mũtisu, naitũ twaĩle kwĩw’aa ata yĩla tũũsũanĩa moathimo ma Yeova kwa andũ make ũmũnthĩ? (2 Mav. 7:3; Sav. 22:22; 34:1; 96:2)

  • Soma 1 Asumbĩ 11:9-13.

    O ta ũndũ Aisilaeli masukumiwe mamũkumye Yeova nũndũ wa kwona ũtheu wake mũtisu, naitũ twaĩle kwĩw’aa ata yĩla tũũsũanĩa moathimo ma Yeova kwa andũ make ũmũnthĩ? (2 Mav. 7:3; Sav. 22:22; 34:1; 96:2)