Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 63: Solomoni Mũsumbĩ Mũĩ

Ngewa ya 63: Solomoni Mũsumbĩ Mũĩ

SOLOMONI aĩ mwanake mũnini yĩla watw’ĩkie mũsumbĩ. Nĩwendete Yeova, nake nĩwaatĩĩaa ũtao mũseo ũla wanengiwe nĩ ĩthe Ndaviti. Yeova nĩwendeeaw’a nĩ Solomoni, na kwoou ũtukũ ũmwe amwĩa nthĩnĩ wa ndoto: ‘Solomoni, we wĩenda ngũnenge kyaũ?’

Nake Solomoni asũngĩa: ‘Yeova Ngai wakwa, nyie nĩ o mwanake mũnini na ndyĩsĩ kũsumbĩka. Kwoou nenga ũĩ wa kũsumbĩka andũ maku kwa nzĩa nzeo.’

Yeova nĩwendeeiw’e mũno nĩ kĩla Solomoni weetisye. Kwoou we asya: ‘Nũndũ wa kwĩthĩwa weetya ũĩ na ti ũthwii kana kwĩkala matukũ maingĩ, nyie nĩngũũnenga ũĩ mwingĩ mũno kũthonoka mũndũ ũngĩ o na wĩva waaĩthĩwa thayũ. O na ĩngĩ nĩngũũnenga kĩla ũtanetya, ũthwii o na ndaĩa.’

Na o ĩvinda ĩkuvĩ ĩtina, aka elĩ mooka vala ve Solomoni mena thĩna mũito. Na ũmwe woo asya: ‘Nyie na mũndũ mũka ũũ twĩkalaa nyũmba ĩmwe. Na nĩnasyaie kana ka kavĩsĩ, na kweethĩwa mĩthenya mĩna ĩtina, o nake anasyaa kana ka kavĩsĩ. Na ũtukũ ũmwe kana kake kakw’a. Na ĩndĩ ngomete, aia kana kake ke kakw’ũ ũtee wakwa na oosa kala kakwa. Yĩla naamũkie na nasisya kana kau kakw’ũ, neethĩa ti kakwa.’

Nake mũndũ mũka ũla ũngĩ asya: ‘Aiee! Kana kala ke thayũ nĩko kakwa, na kala kakw’ũ nĩko kake!’ Nake mũndũ mũka ũla wa mbee asũngĩa: ‘Aiee! Kana kala kakw’ũ nĩko kaku, na kala ke thayũ nĩko kakwa!’ Ũu nĩw’o aka asu makananĩaa. Solomoni eekie ata?

Atũmanie ũvyũ na yĩla waetiwe asya: ‘Atũany’a kana kala ke thayũ ilungu ilĩ, na ũinenga kĩla mũndũ mũka nyusu ĩmwe.’

Nake inyia waw’o wa kana kala kaĩ thayũ akaya ayasya: ‘Aiee! Nĩngũkwĩsuva ndũkoae kana. Mũnenge ko!’ Ĩndĩ mũndũ mũka ũla ũngĩ asya: ‘Ndũkakanengane o na kwa ũmwe witũ; katũany’e.’

Mũsumbĩ Solomoni aisila ĩkoani yũmũ

Na ĩtina vyũ Solomoni aneena na asya: ‘Ndũkoae kana kau! Kanenge mũndũ mũka ũla wa mbee. Nĩwe inyia wako.’ Solomoni amanyie ũu nũndũ inyia wako waw’o nĩwendete kana kake mũno nginya eetĩkĩla kũkanenga mũndũ mũka ũsu ũngĩ nĩ kana kaikoawe. Yĩla andũ meewie ũndũ Solomoni waminie thĩna ũsu, matana nũndũ wa kwĩthĩwa na mũsumbĩ mũĩ take.

Ĩvinda ya ũsumbĩ wa Solomoni, Ngai nĩwaathimie andũ kwa kũtuma mũthanga ũsyaa kwa wingĩ nganũ, mbaale, nzavivu, makũyũ na malĩu angĩ. Andũ meekĩaa ngũa nzeo na mekalaa nyũmba nzeo. Kĩla mũndũ aĩ na syĩndũ mbingĩ nzeo.

1 Asumbĩ 3:3-28; 4:29-34.



Makũlyo

  • Yeova akũlilye Solomoni ata, nake asũngĩie ata?
  • Nũndũ nĩwendeeiw’e nĩ kĩla Solomoni weetisye, Yeova athanie akamũnenga kyaũ?
  • Nĩ thĩna mwaũ mũito aka elĩ maetie kwa Solomoni?
  • Tondũ ũtonya kwona vaa visanĩ, Solomoni aminie thĩna ũsu ata?
  • Ũsumbĩki wa Solomoni ũilyĩ ata, na nĩkĩ?

Makũlyo ma kwongeleela

  • Soma 1 Asumbĩ 3:3-28.

    Aũme ala manengetwe wĩa wa ũsyaĩĩsya nthĩnĩ wa ũseũvyo wa Ngai ũmũnthĩ, matonya kwĩmanyĩsya kyaũ kumana na ndeto sya kuma ngoonĩ sya Solomoni nthĩnĩ wa 1 Asumbĩ 3:7? (Sav. 119:105; Nth. 3:5, 6)

    Kĩla Solomoni weetisye nĩ ngelekany’o nzeo ata ya maũndũ ala twaĩlĩtwe nĩkũvoya? (1 Asu. 3:9, 11; Nth. 30:8, 9; 1 Yoa. 5:14)

    Nzĩa ĩla Solomoni watũmĩie kũmina thĩna katĩ wa ala aka elĩ yĩtunenga ũĩkĩĩthyo mwaũ wa ngoo ĩũlũ wa ũsumbĩki wa ĩvinda yũkĩte wa Solomoni Mũnene, Yesũ Klĩsto? (1 Asu. 3:28; Isa. 9:6, 7; 11:2-4)

  • Soma 1 Asumbĩ 4:29-34.

    Yeova asũngĩie Solomoni ata yĩla wavoyie anengwe ngoo yĩ ũmanyi? (1 Asu. 4:29)

    Kwa kũsũanĩa ũndũ andũ meekĩaa kĩthito nĩ kana mew’e ũĩ wa Solomoni, woni witũ waĩle kwĩthĩwa wĩ mwaũ kwelekela kwĩmanyĩsya Ndeto ya Ngai? (1 Asu. 4:29, 34; Yoa. 17:3; 2 Tim. 3:16)