Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 32: Ala Mothĩny’o 10

Ngewa ya 32: Ala Mothĩny’o 10

KWASISYA visa ii. Kĩla ĩmwe yasyo yĩonany’a ũthĩny’o ũla Yeova waetie ĩũlũ wa nthĩ ya Misili. Visanĩ wa mbee nũtonya kwona Aluni aikũna Ũsĩ wa Naelo na ndata yake. Yĩla weekie ũu, kĩw’ũ kĩla kyaĩ ũsĩnĩ kyaalyũkile kyatw’ĩka nthakame. Makũyũ nĩmakwie naw’o ũsĩ wambĩĩa kũnyunga naĩ.

Mothĩny’o kwa Amisili

Ĩtina wa ũu, Yeova atuma syoa syambata kuma Ũsĩnĩ wa Naelo. Nasyo syaĩ kĩla vandũ—maikonĩ, ikaangĩonĩ, itandanĩ—kĩla vandũ. Yĩla syoa isu syakwie Amisili masyũmbanisye mavumbu manene, na nthĩ yanyunga naĩ nũndũ wasyo.

Na ĩndĩ Aluni akũna kĩtoo kya nthĩ na ndata yake, nakyo kyaalyũka kyatw’ĩka tũsamũ tũnini tũũmanaa. Ũthĩny’o wa katatũ ĩũlũ wa nthĩ ya Misili waĩ tũsamũ tũu tũnini.

Mothĩny’o ala angĩ maũmĩisye o Amisili oka, na ti Aisilaeli. Ũthĩny’o wa kana waĩ wa ngi mbingĩ nene, ila syetavĩĩie nyũmbanĩ sya Amisili onthe. Na ũthĩny’o wa katano waĩ ĩũlũ wa indo. Ng’ombe, na malondu, na mbũi mbingĩ sya Amisili nĩsyakwie.

Na ĩngĩ, Mose na Aluni moosa mũu na maũũlũkya nzevenĩ. Naw’o waetee andũ na nyamũ itau nthũku. Ũsu nĩw’o waĩ ũthĩny’o wa thanthatũ.

Ĩtina wa ũu Mose ookĩlya kw’oko kwake kwelekela ĩtunĩ, na Yeova aete kĩtundumo na mbua nene ya mavia. Nayo nĩyo yaĩ mbua nthũku vyũ ya mavia kua nthĩ ya Misili.

Ũthĩny’o wa nyanya waĩ nguthu nene ya ngie. Mbee o na ĩtina wa ĩvinda yĩu kũyaaĩthĩwa na ngie mbingĩ ta isu. Syaĩe mĩtĩ yonthe ĩla mbua ya mavia yatialĩtye.

Ũthĩny’o wa keenda waĩ kĩvindu. Kwa mĩthenya ĩtatũ nthĩ yaĩ na kĩvindu kingĩ mũno, ĩndĩ Aisilaeli maĩ na kyeni kũla matũĩte.

Ĩtina vyũ, Ngai atavya andũ make mavake nthakame ya katena ka mbũi kana ka ĩlondu mĩtĩnĩ ĩlĩ ĩla yĩ ndee sya mũomo. Na ĩndĩ mũlaĩka wa Ngai avĩtĩla ĩũlũ wa nthĩ ya Misili. Mũlaĩka oona nthakame ĩsu, ndoaa mũndũ o na ũmwe nyũmbanĩ ĩsu. Ĩndĩ nyũmba syonthe ila itaĩ na nthakame mĩtĩnĩ ĩlĩ ĩla yĩ ndee sya mĩomo, mũlaĩka wa Ngai nĩwoaa makithathi na nyamũ ila syasyaĩtwe mbee. Ũsu nĩw’o waĩ ũthĩny’o wa 10.

Ĩtina wa ũthĩny’o ũsu wa mũthya, Valao eea Aisilaeli mathi. Andũ ma Ngai onthe nĩmeeyũmbanĩtye kũthi, na o ũtukũ ũsu mambĩĩa kyalo kyoo kya kuma Misili.

Kuma kĩlungu kya 7 nginya 12.



Makũlyo

  • Ũitũmĩa visa ii syonanĩtw’e vaa, elesya mothĩny’o atatũ ma mbee ala Yeova waetie ĩũlũ wa nthĩ ya Misili.
  • Kwaĩ na kĩvathũkany’o kyaũ katĩ wa mothĩny’o atatũ ma mbee na mothĩny’o ala angĩ?
  • Ũthĩny’o wa kana, wa katano na wa thanthatũ waĩ mwaũ?
  • Elesya mothĩny’o ma mũonza, nyaanya na kenda.
  • Yeova eeie Aisilaeli nĩmeke ata mbee wa ũthĩny’o wa ĩkũmi?
  • Ũthiny’o wa ĩkũmi waĩ kyaũ, na kweekĩkie ata ĩtina wa w’o?

Makũlyo ma kwongeleela

  • Soma Kuma 7:19-8:23.

    O na kau andũ oĩ na aoi ma Misili nĩmeekie syama ivw’anene na mothĩny’o ma mbee elĩ kuma kwa Yeova, mo maĩ no nginya metĩkĩle kyaũ ĩtina wa ũthĩny’o wa katatũ? (Kuma 8:18, 19; Mt. 12:24-28)

    Ũthĩny’o wa kana woonanisye ata ũtonyi wa Yeova wa kũsũvĩa andũ make, na kũmanya ũu kũtumaa andũ ma Ngai mew’a ata mathengee “thĩna mũnene” ũla wathanĩtwe? (Kuma 8:22, 23; Ũvu. 7:13, 14; 2 Mav. 16:9)

  • Soma Kuma 8:24; 9:3, 6, 10, 11, 14, 16, 23-25; na 10:13-15, 21-23.

    Nĩ ikundi syĩva ilĩ ila syavathũkaniw’e nĩ mothĩny’o ala ĩkũmi, na kũmanya ũu kwaĩle ũtuma twĩthĩwa na woni mwaũ ĩũlũ wa ikundi isu syelĩ ũmũnthĩ? (Kuma 8:10, 18, 19; 9:14)

    Ĩandĩko ya Kuma 9:16 yĩtũtetheesya ata kũmanya kĩla kĩtumĩte Yeova amũeka Satani ekale nginya yu? (Alo. 9:21, 22)

  • Soma Kuma 12:21-32.

    Vasaka yatumie ũvonokyo ũtonyeka ata kwa andũ aingĩ, nayo yoonanasya kyaũ? (Kuma 12:21-23; Yoa. 1:29; Alo. 5:18, 19, 21; 1 Ako. 5:7)