Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 22: Yosevu Kwĩkw’a Kolokolonĩ

Ngewa ya 22: Yosevu Kwĩkw’a Kolokolonĩ

YOSEVU aĩ o na ũkũũ wa myaka 17 yĩla watheeiw’e Misili. Kũu athooiw’e kwa mũndũũme weetawa Votivali. Votivali athũkũmaa kwa mũsumbĩ wa Misili weetawa Valao.

Yosevu e kolokolonĩ

Yosevu nĩwathũkũmie kwa Votivali vwana wake na kĩthito. Kwoou Yosevu eananga, Votivali amũtw’a mũũngamĩi wa nyũmba yake yonthe. Nĩkĩ, ĩndĩ, Yosevu wĩvaa kolokolonĩ? Kĩtumi nũndũ wa mũka wa Votivali.

Yosevu nĩweanie atw’ĩka mũndũũme mwanake mũno, na mũka wa Votivali nĩwendaa akome nake. Ĩndĩ Yosevu nĩweesĩ ũu nĩ ũndũ mũthũku, na ndaaĩtĩkĩla kwĩka ũu. Mũka wa Votivali nĩweewie woo mũno. Na yĩla mũũme wookie mũsyĩ, amũkenga aimwĩa: ‘Yosevu ũya mũthũku nũtatie ũkoma nakwa!’ Votivali nĩwaĩkĩĩie mũka wake, na athata mũno nũndũ wa Yosevu. Na kwa kĩtumi kĩu amwĩkya kolokolonĩ.

Na o mĩtũkĩ mũũngamĩi wa kolokolo oona kana Yosevu nĩ mũndũ mũseo. Kwoou aia mokonĩ make ovw’a ala angĩ onthe. Ĩtina wa maũndũ asu Valao nĩwathilĩkĩile mũnengani wake wa mbinyu na mũui wake wa mĩkate na amekya kolokoloni. Ũtukũ ũmwe kĩla ũmwe woo nĩwaotie ndoto ya mwanya, ĩndĩ mayeesĩ ũalyũlo wa ndoto syoo. Ũnĩ ũsu Yosevu amea, ‘Ndavyai ndoto syenyu.’ Na mamũtavya, Yosevu amaalyũlĩla ndoto syoo kwa ũtethyo wa Ngai.

Yosevu eeie mũnengani wa mbinyu atĩĩ: ‘Ĩtina wa mĩthenya ĩtatũ ũkaumw’a kolokolonĩ, na ũkatw’ĩka ĩngĩ mũnengani wa mbinyu wa Valao.’ Na Yosevu ongela kwasya: ‘Yĩla wĩuma kolokolonĩ ũkatavya Valao ũvoo wakwa, nĩ kana ũndetheesye kuma vandũ vaa.’ Ĩndĩ Yosevu amwĩa mũui wa mĩkate: ‘Ĩtina wa matukũ atatũ Valao akeeĩaa mũtwe waku ũtilwe.’

Ĩtina wa matukũ atatũ kweekĩkie o tondũ Yosevu waĩtye. Valao nĩweeĩaie mũtwe wa mũui wa mĩkate ũtilwe. Ĩndĩ, mũnengani wa mbinyu nĩwathaiw’e kuma kolokolonĩ na ambĩĩa kũthũkũma Valao ĩngĩ! Ĩndĩ we oolwa nĩ Yosevu vyũ! Ndaatavya Valao ũvoo wake, na Yosevu aĩ no nginya aendee kwĩkala kolokolonĩ.

Mwambĩlĩlyo 39:1-23; 40:1-23.



Makũlyo

  • Yosevu aĩ na ũkũũ mwaũ yĩla watwaiwe Misili, na kweekĩkie ata yĩla wavikie kũu?
  • Yosevu esie kwĩkw’a kolokolonĩ ata?
  • Yosevu anengiwe wĩa mwaũ kolokolonĩ?
  • E kolokolonĩ, Yosevu eekie ata kwa mũnengani wa mbinyu wa Valao na mũui wake?
  • Kweethĩiwe ata mũnengani wa mbinyu wa Valao athaw’a kuma kolokolonĩ?

Makũlyo ma kwongeleela

  • Soma Mwambĩlĩlyo 39:1-23.

    O na vala kũyaĩ mwĩao mũandĩke kuma kwa Ngai wavatanĩte ũlaalai ĩvinda ya Yosevu, nĩ kyaũ kyatumie akuthũka akĩe mũka wa Votivali? (Mwa. 2:24; 20:3; 39:9)

  • Soma Mwambĩlĩlyo 40:1-23.

    Elesya kwa ũkuvĩ ndoto ya mũnengani wa mbinyu wa Valao, na ũalyũlo ũla Yeova wanengie Yosevu. (Mwa. 40: 9-13)

    Mũui aotie ndoto myaũ, na ũalyũlo wayo waĩ mwaũ? (Mwa. 40:16-19)

    Ũmũnthĩ ngombo mbũĩ na yĩ kĩthito ĩatĩĩaa ata mwelekelo wa ngoonĩ wa Yosevu? (Mwa. 40:8; Sav. 36:9; Yoa. 17:17; Meko 17:2, 3)

    Ĩandĩko ya Mwambĩlĩlyo 40:20, 22 yĩtũtetheeasya ata kũelewa ũndũ Mũklĩsto waĩle kwona mboka sya kũtanĩa mũthenya wa kũsyawa? (Mũta. 7:1; Mko. 6: 21-28)