Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 19: Yakovo e na Mũsyĩ Mũnene

Ngewa ya 19: Yakovo e na Mũsyĩ Mũnene
Yakovo na ana make

KWASISYA nyũmba ĩno ũndũ yĩany’a andũ. Aa nĩ ana 12 ma Yakovo. Na aĩ o na eĩtu. We nĩwĩsĩ masyĩtwa ma syana imwe? Ekai twĩmanyĩsye masyĩtwa ma amwe moo.

Lea asyaie Leũveni, Simeoni, Livai, na Yuta. Yĩla Lakeli woonie kana ndeũsyaa syana, nĩwamakie mũno vyũ. Kwondũ wa ũu amũnenga Yakovo mũthũkũmi wake wa mwĩĩtu weetawa Mbila, nake Mbila asyaa ana elĩ meetawa Ndani na Navitali. O nake Lea amũnenga Yakovo mũthũkũmi wake wa mwĩĩtu weetawa Nziliva, na Nziliva asyaa Ngati na Aseli. Ĩtina Lea nĩwasyokie asyaa ana angĩ, Isakali na Nzevuluni.

Na ĩndĩ ĩtina wa kũmĩĩsya ĩvinda yĩasa Lakeli nĩwakwatie mwana. Na amwĩta syĩtwa yake Yosevu. Ĩtina tũkeemanyĩsya mũnango ĩũlũ wa Yosevu, nũndũ nĩwesie kũtw’ĩka mũndũ wa vata mũno. Aa nĩmo ana 11 ala Yakovo wasyaĩwe yĩla wekalaa na ĩthe wa Lakeli Lavani.

Na ĩngĩ Yakovo aĩ o na eĩtu, ĩndĩ Mbivilia ĩwetete syĩtwa ya ũmwe tũ. Syĩtwa yake eetawa Ndina.

Ĩvinda nĩyavikie yĩla Yakovo watwie kũmũtia Lavani na kũsyoka Kanaani. Kwoou oombany’a andũ ma mũsyĩ wake mũnene na ndĩthya syake nene sya malondu na ng’ombe na ambĩĩa kyalo kĩu kĩasa.

Ĩtina wa Yakovo na andũ ma mũsyĩ wake kũsyoka na kwĩkalanga Kanaani kwa ĩvinda, Lakeli nĩwasyaie mwana ũngĩ. Ũu weethĩiwe me kyalonĩ. Lakeli nĩwaũnyie na vinya na esa o kũkw’a aisyaa. Ĩndĩ kana kanini ka kavĩsĩ kala kasyaiwe kaĩ o kaseo. Yakovo aketie Mbenyamini.

Nĩtũkwenda tũlilikane masyĩtwa ma ana 12 ma Yakovo nũndũ mbaĩ syonthe sya Isilaeli syaumie nthĩnĩ woo. Mbaĩ 12 sya Isilaeli syatw’ĩĩwe masyĩtwa kwĩanana na ana 10 ma Yakovo na ana elĩ ma Yosevu. Isaka ekalile myaka mingĩ ĩtina wa imwana ii kũsyawa, na no mũvaka ethĩwe atanie mũno kwĩthĩwa na esũkũũe aingĩ mũno. Ĩndĩ ekai twone ũndũ kweekĩkie kwa Ndina mwĩsũkũũe wake wa mwĩĩtu.

Mwambĩlĩlyo 29:32-35; 30:1-26; 35:16-19; 37:35.



Makũlyo

  • Masyĩtwa ma ana thanthatũ ala Yakovo wasyaie na kĩveti kyake kya mbee Lea nĩ meva?
  • Nĩ ana meva elĩ ala Nziliva mũthũkũmi wa mũndũ mũka wa Lea wamũsyaĩe Yakovo?
  • Ana elĩ ala Mbila mũthũkũmi wa mũndũ mũka wa Lakeli wamũsyaĩe Yakovo meetawa ata?
  • Nĩ ana meva elĩ ala Lakeli wasyaie, ĩndĩ kweekĩkie ata yĩla mwana wa kelĩ wasyaiwe?
  • Kwosana na visa, Yakovo ena ana meana, na nĩ kyaũ kyaumie nthĩnĩ woo?

Makũlyo ma kwongeleela

  • Soma Mwambĩlĩlyo 29:32-35; 30:1-26; na 35:16-19.

    Tondũ ũvoo wa ana 12 ma Yakovo ũkwonany’a, mavinda maingĩ imwana sya Aevelania syatw’ĩĩawa masyĩtwa ata?

  • Soma Mwambĩlĩlyo 37:35.

    O na kũtw’ĩka Ndina nĩwe ũwetetwe nthĩnĩ wa Mbivilia, twĩsĩ ata kana Yakovo aĩ na eĩtu aingĩ? (Mwa. 37:34, 35)