Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 15: Mũka wa Loto Nĩwasiisye Ĩtina

Ngewa ya 15: Mũka wa Loto Nĩwasiisye Ĩtina

LOTO na mũsyĩ wake matũaa vamwe na Avalaamu nthĩ ya Kanaani. Mũthenya ũmwe Avalaamu nĩwamwĩie Loto: ‘Vai nthĩ ĩtonya kwĩanĩa ndĩthya sitũ. Nĩngũkwĩsũva tũtaanĩsye. Wathi ngalĩko ĩmwe nakwa ngathi ĩla ĩngĩ.’

Loto nĩwasiisye ĩ nthĩ. Nake oona kĩlungu kĩmwe kyayo kĩla kyaĩ na kĩw’ũ na nyeki mbingĩ nzeo kwondũ wa indo syake. Kĩu kyaĩ Kĩvalo kya Yolotani. Kwoou ĩndĩ Loto nĩwathamĩĩisye mũsyĩ wake vamwe na indo kũu. Ĩtina vyũ nĩmatũie ndũanĩ ya Sotomo.

Andũ ma Sotomo maĩ athũku na athe mũno. Ũndũ ũsu nĩwamũthatisye Loto nũndũ we aĩ mũndũ mũseo. Ngai o nake nĩwathatie. Ĩtina vyũ, Ngai nĩwatũmie alaĩka elĩ mamũelesye Loto kana nũkwananga Sotomo na ndũa ĩngĩ ĩla yaĩ vakuvĩ yeetewa Ngomola nũndũ wa mawathavu moo.

Alaĩka asu meeie Loto ũũ: ‘Ũkĩla mĩtũkĩ! Wose mũka waku na eĩtu maku elĩ na ũyuma vaa!’ Loto na mũsyĩ wake maĩ na kavola ka kuma, na ĩndĩ alaĩka mamakwata moko na mamaumaalũkya nza wa ndũa. Na ĩndĩ ũmwe wa alaĩka asya: ‘Sembai mũvonokye mathayũ menyu! Mũikasisye ĩtina. Sembai mũthi iĩmanĩ nĩ kana mũikoawe.’

Loto na eĩtu make nĩmeewie na masemba kuma Sotomo. Mayaaũngama o na vanini kana kũsisya ĩtina. Ĩndĩ mũka wa Loto ndaaĩw’a. Ĩtina wa maendanga vanini kuma Sotomo, nĩwaũngamie na asisya ĩtina. Na ĩndĩ atw’ĩka kĩtuĩ kya mũnyũ. We nũũmwona vaa visanĩ?

Nĩ tũtonya kwĩmanyĩsya ĩsomo ĩseo kuma ũndũnĩ ũsu. Wĩtwony’a kana Ngai nũtangĩĩaa ala mamwĩw’aa, ĩndĩ ala matamwĩw’aa makaasya mathayũ moo.

Mwambĩlĩlyo 13:5-13; 18:20-33; 19:1-29; Luka 17:28-32; 2 Vetelo 2:6-8.

Loto asembete aume Sotomo


Makũlyo

  • Nĩkĩ Avalaamu na Loto mataanĩisye?
  • Loto anyuvie kũtũa Sotomo nĩkĩ?
  • Andũ ma Sotomo maĩ na mwĩkalĩle mwaũ?
  • Alaĩka elĩ maeleisye Loto ĩũlũ wa mũisyo mwaũ?
  • Mũka wa Loto atw’ĩkie kĩtuĩ kya mũnyũ nĩkĩ?
  • Nĩ ĩsomo yaũ tũĩmanyĩsya kumana na ũndũ ũla wamũkwatie mũka wa Loto?

Makũlyo ma kwongeleela

  • Soma Mwambĩlĩlyo 13:5-13.

    Nĩ ĩsomo yaũ tũĩmanyĩsya kuma kwa Avalaamu ĩũlũ wa ũvoo ũkony’e kũmina mathĩna katĩ wa andũ elĩ? (Mwa. 13:8, 9; Alo. 12:10; Avi. 2:3, 4)

  • Soma Mwambĩlĩlyo 18:20-33.

    Meko ma Yeova kwa Avalaamu matũĩkĩithasya ata kana Yeova na Yesũ makasila kwa ũlũngalu? (Mwa. 18:25, 26; Mt. 25:31-33)

  • Soma Mwambĩlĩlyo 19:1-29.

    Ũvoo ũũ wa Mbivilia wĩonany’a woni wa Ngai nĩ mwaũ ĩũlũ wa aũme ala mamanyanaa kĩĩmwĩĩ na ala angĩ? (Mwa. 19:5, 13; Ali. 20:13)

    Nĩ kĩvathũkany’o kyaũ tũkwona nthĩnĩ wa ũndũ Loto na Avalaamu meekie ĩũlũ wa mwolooto wa Ngai, na ũndũ ũsu ũtonya kũtũmanyĩsya kyaũ? (Mwa. 19:15, 16, 19, 20; 22:3)

  • Soma Luka 17:28-32.

    Mũka wa Loto aĩ na mwelekelo mwaũ wa ngoo ĩũlũ wa syĩndũ sya kĩmwĩĩ na ũndũ ũsu wĩna ũkany’o mwaũ kwitũ? (Lk. 12:15; 17:31, 32; Mt. 6:19-21, 25)

  • Soma 2 Vetelo 2:6-8.

    Kwa kũatĩĩa ngelekany’o ya Loto twaĩlĩtwe nĩkwĩthĩwa na woni mwaũ kwelekela andũ ala matamũkĩaa Ngai, ala mekalaa vakuvĩ naitũ? (Esek. 9:4; 1 Yoa. 2:15-17)