Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 13: Avalaamu—Mũnyanyae wa Ngai

Ngewa ya 13: Avalaamu—Mũnyanyae wa Ngai

VANDŨ vamwe vala andũ maendie kũtũa ĩtina wa kĩla Kĩw’ũ Kingĩ veetawa Ulu. Nĩvatw’ĩkie ndũa nene yĩ nguma na yĩ nyũmba nzeo mũno. Ĩndĩ andũ kũu mathaithaa ngai sya ũvũngũ. Ũu now’o mekaa nthĩnĩ wa Mbaviloni o na kw’o. Andũ ma Ulu na Mbaveli mayailyĩ ta Noa na mwana wake Semu, ala maendeeie na kũmũthũkũma Yeova.

Myaka 350 ĩtina wa kĩla kĩw’ũ kingĩ, Noa mũndũ wa mũĩkĩĩo nĩwakwie. Na o myaka ĩlĩ ĩtina wa ũu mũndũ ũũ ũkwona vaa visanĩ nĩwasyaiwe. Aĩ mũndũ wa mwanya mũno kwa Ngai. Syĩtwa yake eetawa Avalaamu. Atũaa na andũ make ndũanĩ ĩsu nene ya Ulu.

Avalaamu aisisya ndata

Mũthenya ũmwe Yeova nĩweeie Avalaamu: ‘Uma Ulu nthĩ yaku, na kwa ũko waku, ũthi nthĩ ĩla nĩkwony’a.’ Avalaamu nĩwamwĩwie Ngai na atia motanu ma mũsyĩ wa Ulu? Ĩĩ, nĩweekie ũu. Na nũndũ Avalaamu nĩwamwĩw’aa Ngai ĩvinda yonthe nĩwambĩĩe kwĩtwa mũnyanyae wa Ngai.

Amwe ma nyũmba ya Avalaamu nĩmaendie nake yĩla waumĩe ndũa ya Ulu. Tela ĩthe wake nĩwaendanisye nake. O na Loto mwana wa mwana-a-inyia. Na vate nzika Sala mũka wake nĩwaendie vamwe nake. Onthe nĩmesie kũvika vandũ veetawa Aalani, vala Tela wakw’ĩĩie. Maĩ vaasa vyũ na Ulu.

Ĩtina wa kavinda, Avalaamu na nyũmba yake nĩmaumie Aalani na mathi nthĩ ĩla yeetawa Kanaani. Vau Yeova nĩwaisye: ‘Nganenga ũsyao waku nthĩ ĩno.’ Avalaamu nĩwatũie Kanaani nake ekalaa maeemanĩ.

Ngai nĩwambĩĩie kũmũtetheesya Avalaamu nginya eethĩwa na ndĩthya nene sya malondu na indo ingĩ na athũkũmi maana maingĩ. Ĩndĩ we vamwe na Sala mayaĩ maakwata syana syoo ene.

Yĩla Avalaamu waĩ na ũkũũ wa myaka 99, Yeova nĩwamwĩie: ‘Ũtianĩo wakwa naku nĩ kana ũkeethĩwa wĩ ĩthe wa mbaĩ mbingĩ mũno.’ No ũu wesaa kwĩthĩwa ata, nũndũ Avalaamu na Sala maĩ akũũ vyũ ũndũ matatonya kũkwata mwana?

Mwambĩlĩlyo 11:27-32; 12:1-7; 17:1-8, 15-17; 18:9-19.



Makũlyo

  • Nĩ andũ ma mũthemba mwaũ mekalaa ndũanĩ ya Ulu?
  • Nũũ wĩ visanĩ ũũ, asyaiwe ĩndĩĩ, na atũaa va?
  • Ngai eeie Avalaamu eke ata?
  • Avalaamu eetiwe mũnyanyae wa Ngai nĩkĩ?
  • Naaũ maendie vamwe na Avalaamu yĩla waumie Ulu?
  • Ngai amwĩie Avalaamu ata yĩla wavikie nthĩ ya Kanaani?
  • Ngai amwathie Avalaamu kyaũ yĩla waĩ na ũkũũ wa myaka 99?

Makũlyo ma kwongeleela

  • Soma Mwambĩlĩlyo 11:27-32.

    Avalaamu na Loto maileny’e ata? (Mwa. 11:27)

    O na kau nĩ Tela ũwetawa tawe wathamĩĩisye mũsyĩ wake Kanaani, tũmanyaa ata kana nĩ Avalaamu wambĩlĩĩlye mũvango ũsu wa kũthama, na eekie ũu nĩkĩ? (Mwa. 11:31; Meko 7:2-4)

  • Soma Mwambĩlĩlyo 12:1-7.

    Yeova athanthaisye ata ũtianĩo wake na Avalaamu ĩtina wa Avalaamu kũvika nthĩ ya Kanaani? (Mwa. 12:7)

  • Soma Mwambĩlĩlyo 17:1-8, 15-17.

    Nĩ ũalyũku wĩva wa syĩtwa ũla Avalamu wakwatie yĩla waĩ na ũkũũ wa myaka 99, na nĩkĩ? (Mwa. 17:5)

    Nĩ moathimo meva ma ĩvinda yũkĩte ala Yeova wathie Sala? (Mwa. 17:15, 16)

  • Soma Mwambĩlĩlyo 18:9-19.

    Nthĩnĩ wa Mwambĩlĩlyo 18:19, aaĩthe ma andũ manengetwe wĩa mwaũ? (Kũt. 6:6, 7; Aev. 6:4)

    Nũndũ mwaũ wakwatie Sala wonanasya kana tũitonya kũvitha Ngai ũndũ? (Mwa. 18:12, 15; Sav. 44:21)