Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ĩvuku Yakwa ya Ngewa sya Mbivilia

Ngewa ya 12: Andũ Mayaka Mwako Mũtũlu wa Mũnyoolo

Ngewa ya 12: Andũ Mayaka Mwako Mũtũlu wa Mũnyoolo

MYAKA mingĩ nĩyavĩtie. Namo ana ma Noa meethĩwa na syana mbingĩ. Syana syoo nĩsyeanie nasyo syeethĩwa na syana syoo mbingĩ. O mĩtũkĩ nĩkweethĩiwe na andũ aingĩ ĩũlũ wa nthĩ.

Ũmwe wa andũ aa aĩ nzũkũlũ ya Noa weetawa Nimiloti. Aĩ mũndũ mũthũku wasyĩmaa na kũaa nyamũ na andũ. Na ĩngĩ Nimiloti nĩweetw’ĩkĩthisye mũsumbĩ ĩũlũ wa andũ ala angĩ onthe. Ngai ndaamwenda Nimiloti.

Andũ onthe ĩvinda yĩu maneenaa kĩthyomo o kĩmwe. Nimiloti endaa amekaly’e vandũ vamwe nĩ kana atonye kũmasumbĩka. We nĩwĩsĩ ũndũ weekie? Eeie andũ make ndũa nene na mwako mũtũlu wa mũnyoolo nthĩnĩ waw’o. Kwamasisye vaa visanĩ mayũmba mavali.

Yeova Ngai ndaaendeew’a nĩ mwako ũsu. Ngai endaa andũ manyaĩĩke na kũtũa kĩla vandũ ĩũlũ wa nthĩ. Ĩndĩ andũ asu masya: ‘Ũkai! Ekai twĩyakĩe ndũa na mwako mũtũlu wa mũnyoolo ũla mũthya waw’o ũtonya kũvika ĩtunĩ. Na tũkeethĩwa na nguma!’ Andũ asu mendaa metaĩĩe mo ene vandũ va kũmũtaĩĩa Ngai.

Kwoou ĩndĩ Ngai nĩwatumie andũ asu maeka kwaka mwako ũsu. We nĩwĩsĩ ũndũ weekie ũu? O vau kwa vau nĩwatumie andũ asu mambĩlĩĩlya kũneena ithyomo syĩ kĩvathũkany’o, vandũ va kĩthyomo kĩmwe. Ala maakaa mwako ũsu nĩmaekie kũeleanwa. Kĩu nĩkyo kĩtumi ndũa ĩsu yoo yeetiwe Mbaveli, kana Mbaviloni, ũalyũlo wayo nĩ “Kĩthokoany’o.”

Andũ asu nĩmambĩĩie kũthama Mbaveli. Ikundi sya andũ ala maneenaa kĩthyomo kĩmwe nĩsyaendie kũtũa vamwe kũndũ kũngĩ ĩũlũ wa nthĩ.

Mwambĩlĩlyo 10:1, 8-10; 11:1-9.

Andũ mayaka mwako mũnene wa mũnyoolo


Makũlyo

  • Nimiloti aĩ ũũ, na Ngai amwonaa ata?
  • Nthĩnĩ wa visa ũũ nĩkĩ andũ mekũmba mavali?
  • Nĩkĩ Yeova ũtaaendeew’a nĩ mwako ũsu?
  • Ngai aũngamisye ata wĩa wa mwako ũsu wa mũnyoolo?
  • Ndũa ĩsu yeetawa ata, ũalyũlo wa syĩtwa yĩu nĩ mwaũ?
  • Kweekĩkie ata ĩtina wa Ngai kũthokoany’a ithyomo syoo?

Makũlyo ma kwongeleela

  • Soma Mwambĩlĩlyo 10:1, 8-10.

    Nimiloti aĩ na mĩkĩle ya mũthemba mwaũ, na ũndũ ũsu wĩna ũkany’o mwaũ kwitũ? (Nth. 3:31)

  • Soma Mwambĩlĩlyo 11:1-9.

    Kĩeleelo kya mwako ũsu mũtũlu wa mũnyoolo kyaĩ kyaũ, na nĩkĩ wĩa ũsu ũtaĩ ũendeea? (Mwa. 11:4; Nth. 16:18; Yoa. 5:44)