Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 11 2015

 KYONGO KYA ĨTHANGŨ YA MBEE

Ngai Ethĩawa na Woni Mwaũ Ĩũlũ wa Kaũ?

Ngai Ethĩawa na Woni Mwaũ Ĩũlũ wa Kaũ?

We ũtonya kũsũngĩa ĩkũlyo yĩu ata? Andũ aingĩ masũanĩaa kana Ngai nĩwĩtĩkĩlanaa na kaũ. Masũanĩaa ũu nũndũ nĩmasomaa Mbivilianĩ kana Ngai nĩweeyĩaĩaa athũkũmi amwe make ma ĩvinda ya tene makokite. Angĩ namo nĩmesĩ kana Mwana wa Ngai, Yesũ, amanyĩisye aatĩĩi make kana nĩmaĩle kwenda amaitha moo. (Mathayo 5:43, 44) Kwoou maasyaa kana ve ĩvinda yavikie woni wa Ngai ĩũlũ wa kaũ waalyũka, na ũmũnthĩ Ngai ndendaa andũ mayũkita.

We wĩona ata? Ngai nĩwĩtĩkĩlanaa na makaũ ala mokitawa ũmũnthĩ? Ethĩwa nĩwĩtĩkĩlanaa namo, nĩ ngalĩko yĩva ũkwataa mbau? Kũkwata mosũngĩo ma makũlyo asu no kũũtetheesye ũkamanya woni waku ĩũlũ wa kaũ. Kwa ngelekany’o, twasye ve kaũ ũendeee vandũ na ũimanya kana Ngai nũkwĩtĩkĩlana na kaũ ũsu, o na nũkũkwata mbau ngalĩko ĩla we mwene wendeeaw’a nĩyo kaũnĩ ũsu, vate nzika no wĩw’e mũyo nũndũ wĩ na mũĩkĩĩo kana nĩmũũsinda. Nao wĩw’a ata ũkamanya kana Ngai akwete mbau amaitha maku? Vakethĩwa vailyĩ ũu, nĩvatonyeka ũkasũanĩa kũalyũla ũtwi waku.

Ve ũndũ ũngĩ wa vata mũno twaĩle kũũsũanĩa kwa ũliku. Kũmanya woni wa Ngai ĩũlũ wa kaũ no kũtume ũalyũla woni waku ĩũlũ wa Ngai. Ethĩwa wĩ katĩ wa andũ milioni mbingĩ ala maũmĩĩtw’e nĩ makaũ, vate nzika no wendeew’e nĩ kũmanya ũsũngĩo wa makũlyo aa: We Ngai ailyĩ ũndũ andũ amwe maasya kana nĩwendete kaũ na nĩwĩtĩkĩlaa andũ makwatwe nĩ mathĩna ala maumanaa na kaũ? We nũthĩnĩkaa ĩla andũ maendeee na kũvinyĩĩwa mavindanĩ ma kaũ?

No ũseng’e mũno kũmanya kana Mbivilia ĩsũngĩĩte makũlyo asu kĩvathũkany’o vyũ na woni wa andũ. O na ĩngĩ woni wa Ngai ĩũlũ wa kaũ ndwaalyũka. Ekai twone ũndũ Mbivilia yĩeleetye woni wa Ngai ĩũlũ wa kaũ ĩvindanĩ ya tene na ĩvinda yĩla Yesũ waĩ kũũ nthĩ. Ũu nũũtũtetheesya kũmanya woni wake ĩũlũ wa kaũ na tũimanya ethĩwa ĩvinda yũkĩte nĩkũkethĩwa na makaũ.