Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa10 2015

 KYONGO KYA ĨTHANGŨ YA MBEE | NĨKĨ ANDŨ MAĨLE KŨVOYA?

Nĩkĩ Andũ Mavoyaa?

Nĩkĩ Andũ Mavoyaa?

“Nĩnendete mũno kũtha kalata. O na nĩnavoyaa nĩ kana nĩsinde. Ĩndĩ ndyaaĩsa kũsũngĩwa.” —Samuel, * Kenya.

“Twĩ sukulu twavoyaa mboya sya kũtũngĩlĩĩla ila twamanyĩĩtw’e.”—Teresa, Philippines.

“Ĩla nĩ na mathĩna nĩnĩvoyaa. O na nĩnĩvoyaa nĩ kana nĩekewe naĩ syakwa, na ndyĩthĩwa nĩ Mũklĩsto mũseango.”—Magdalene, Ghana.

Maũndũ asu mawetwa nĩ Samuel, Teresa, na Magdalene meonany’a kana andũ methĩawa na itumi syĩ kĩvathũkany’o sya kũvoya, amwe me na itumi nzeo sya kũvoya kwĩ angĩ. Andũ amwe mavoyaa kuma ngoonĩ, namo angĩ mavoyaa nũndũ no kũvoyawa. Ĩndĩ o na ethĩwa mavoyaa mavĩte mũtiani, timũ yoo ĩsinde mathaũnĩ, Ngai atongoesye mũsyĩ woo nesa, kana methĩwe mavoyaa me o na itumi ingĩ, ũw’o nĩ kana andũ milioni mbingĩ nĩmonaa ve vata wa kũvoya. O na ĩngĩ, ũkunĩkĩli ũla wĩkĩtwe wĩonany’a kana andũ amwe mate ma ndĩni nĩmavoyaa mavinda maingĩ.

Yo we nũvoyaa? Na ethĩwa nũvoyaa-ĩ, ũvoyaa wĩ na kĩtumi kĩva? Wĩthĩwe nũvoyaa kana ndũvoyaa, no wĩkũlye: ‘Yo ve vata wa kũvoya? Mboya syakwa nĩsyĩthukĩĩaw’a?’ Mũandĩki ũmwe awetie mawoni make ĩũlũ wa mboya kwa kwasya kana, mboya ‘no ndawa ya kũtetheesya kĩlĩko kĩusye . . . o tondũ mũndũ ũneenaa na nyamũ yake ũĩthasya.’ O na matakĩtalĩ amwe nĩmethĩawa na mawoni ta asu nũndũ maasya kana mboya no “nzĩa ĩngĩ ya kwĩyĩiita.” Kwoou no twĩkũlye-ĩ, Andũ amwe ala mavoyaa mekaa ũu nũndũ no kũvoyawa-ĩ, kana kĩeleelo kyoo kya kũvoya kĩthĩawa no kũtetheesya kĩlĩko kĩusye?

Kĩvathũkany’o na ũu, Mbivilia nĩyonanĩtye kana mboya nĩyĩanĩasya ũndũ wa vata mũno vyũ eka o kũtetheesya kĩlĩko kĩusye. O na nĩtũmanyĩasya kana mboya nĩsyĩthukĩĩaw’a nesa twavoya maũndũ ala maĩle na kwa nzĩa ĩla yaĩle. Ndeto isu nĩ sya w’o? Ekai twone ũndũ Mbivilia ĩĩkĩĩthĩtye ũndũ ũsu.

^ kal. 3 Masyĩtwa amwe nĩ mavĩndũe.