MWOOLOTO WA MBIVILIA: Endeeai “kũekeanĩa ene kwa ene, ethĩwa mũndũ o na wĩva e na ũndũ na ũngĩ; o tondũ Mwĩaĩi wamũekeie, inyw’ĩ nenyu ĩkaai o ta ũu.”—Akolosai 3:13.

Ĩandĩko yĩu yĩtũmanyĩsya kyaũ? Mbivilia ĩelekanĩtye naĩ na ĩkoani, nakw’o kũekea kũelekanĩtw’e na kũĩva ĩkoani. (Luka 11:4) Ĩvuku yĩmwe yaĩtye kana Maandĩkonĩ, ndeto ya Kĩkiliki ĩla ĩalyũlĩtwe “ekea” yonanasya “kũekea mũndũ kĩndũ wĩĩmũtaĩte ũtakamũandũa ĩngĩ.” Kwoou ĩla twavanga kũekea mũndũ ũtũvĩtĩsye, tũyaĩle kũsũanĩa kana ve ũndũ waĩle kwĩka nĩ kana atũĩve nũndũ nĩtwamũekea. Kũekea kũyonanasya kana nĩtũkwĩtĩkĩlana na ũndũ mũthũku, kana nĩtũũvũthĩĩsya ĩkosa yĩla yeekwa. Vandũ va ũu, kwonanasya kana nĩtũekaa kũia ũthũku ngoonĩ o na ethĩwa twĩ na “ũndũ na [mũndũ] ũngĩ.”

Ũĩ ũsu no ũtũmĩke ũmũnthĩ? Ithyonthe nĩtũvĩtasya nũndũ twĩ ene naĩ. (Alomi 3:23) Kwoou, twĩthĩawa twatũmĩa ũĩ ũla wĩ Mbivilianĩ ĩla twaekea andũ ala angĩ, nũndũ ĩvinda yĩngĩ tũkeethĩwa tũyenda kũekewa. O na ĩngĩ, ĩla twaekea ala angĩ, nĩtũtethekaa. Tũtethekaa ata?

Nithyĩ tũũmĩaa ĩla twaendeea kũthata, twaia ũthũku ngoonĩ, na twalea kũekea. Maũndũ asu no matume twĩkala tũte na ũtanu, na tũyĩkalaa ta twĩ kyovonĩ. O na ĩngĩ, no matume tũkwatwa nĩ mowau mathũku. Ũvoo ũmwe waandĩkiwe nĩ Dr. Yoichi Chida, na mũsomi mũnene (Professor of Psychology) wĩtawa Andrew Steptoe, ĩkasetinĩ ya Journal of the American College of Cardiology, waisye kana, ‘Ũkunĩkĩli wa mĩtũkĩ wĩonany’a kana ũwau wa ngoo [coronary heart disease] no ũetwe nĩ kũthata na woo mwingĩ.’

Kwasũanĩa moathimo ala methĩawa vo ĩla twaekeanĩa. Ĩla twaekea ala angĩ kuma ngoonĩ, nĩvethĩawa mũuo na ngwatanĩo, na ũu nũsũvĩaa ũnyanya witũ vamwe namo. Na ũndũ ũla wa vata mũno nĩ kana nĩtwonanasya nesa vyũ kana nĩtũatĩĩaa ngelekany’o ya Ngai, ũla ũekeaa vyũ ala mamũvĩtĩsya na meelila, na nĩwendaa o naitũ tũekee vyũ ala matũvĩtĩsya.—Maliko 11:25; Aeveso 4:32; 5:1.