Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 8 2015

 KYONGO KYA ĨTHANGŨ YA MBEE | MŨNDŨ NO ETHĨWE THAYŨ ĨNGĨ ĨTINA WA KŨKW’A?

Kwĩthĩawa Ata Mũndũ Akw’a?

Kwĩthĩawa Ata Mũndũ Akw’a?

“Nyie nasũanĩaa kana kwĩ kũndũ kũtatũ mũndũ ũtonya kũthi akw’a, ĩtunĩ, ĩianĩ ya mwaki, kana tũalanĩ. Nĩneesĩ kana ndyaĩ mũndũ mũthũku mũno ũndũ nĩthi ĩianĩ ya mwaki, na kana ndyaĩ mũseo mũno ũndũ nĩthi ĩtunĩ. Ndyeesĩ nesa kĩla kĩendeeaa tũalanĩ. Na ndyaaona vandũ ĩandĩkĩtwe Mbivilianĩ, ĩndĩ vekaa o kũwetwa nĩ andũ.”—Lionel.

“Namanyĩĩtw’e kana andũ onthe maendaa ĩtunĩ ĩtina wa kũkw’a, ĩndĩ ndyaĩ naaĩkĩĩthw’a ũndũ ũsu nesa. Nasũanĩaa kana kĩkw’ũ nĩw’o mũthya wa maũndũ onthe, na vai wĩkwatyo ũngĩ mũndũ wĩthĩawa naw’o akw’a.”—Fernando.

We waaĩkũlya makũlyo aa: ‘Kwĩthĩawa ata ĩla mũndũ wakw’a? Mo andũ maitũ ala makwie me vandũ maendeee kũthĩnĩa? Yo tũkamona ĩngĩ? Tũtonya ata kũĩkĩĩa ũndũ ũsu?’ Kwasisya ũndũ Mbivilia ĩmanyĩasya ĩũlũ wa ũndũ ũsu. Ũndũ wa mbee, ekai twone ũndũ Mbivilia yĩeleetye kĩkw’ũ. Na ĩndĩ tũineenea wĩkwatyo ũla ũeleetw’e Ndetonĩ ya Ngai, Mbivilia.

 Ve ũndũ ala akw’ũ matonya kwĩka?

ŨNDŨ MBIVILIA YAĨTYE: ‘Nũndũ ala me thayũ mesĩ makakw’a; ĩndĩ ala akw’ũ matyĩsĩ ũndũ o na wĩva, o na mati na ĩtuvi ĩngĩ; nũndũ kũlilikanwa kwoo nĩkũlaa. O ũla kw’oko kwaku kwona wa kwĩka, ĩka na vinya waku, nũndũ kũti wĩa kana ũsũanĩo, kana ũmanyi, kana ũĩ, Seoli vala ũendete.’ *—Mũtavan’ya 9:5, 10.

Ndeto Seoli, kana mbũa nĩ vala akw’ũ methĩawa, ĩndĩ ti vandũ vana maendaa kwĩkala. Ndeto ĩsu ĩtũmĩĩtwe kwa nzĩa ya ngelekany’o kũelesya ũndũ akw’ũ methĩawa mailyĩ, mate ũndũ mesĩ kana vate ũndũ matonya kwĩka. Mũndũũme mũĩkĩĩku Yovu aĩ na woni mwaũ ĩũlũ wa Seoli? Nĩwaaisye malĩ yake yonthe na syana syake mũthenya ũmwe, na ĩndĩ akwatwa nĩ mĩimũ mĩthũku mũno mwĩĩnĩ wake w’onthe. Amwĩsũvie Ngai akĩmwĩa atĩĩ: “A! kethĩwa ũkambitha nthĩnĩ wa Seoli, kethĩwa ũkanzũvĩa na kĩmbithĩ.” (Yovu 1:13-19; 2:7; 14:13) Ndeto isu syĩonany’a nesa vyũ kana Yovu nĩweesĩ kana Seoli ti ĩia ya mwaki, vandũ vala mathĩna make makaingĩvĩĩa, ĩndĩ avonaa ta vandũ ũkathũmũĩa mathĩna make.

Ve nzĩa ĩngĩ ĩtonya kũtũtetheesya kũmanya ũndũ akw’ũ mailyĩ. No tũsome Mbivilianĩ ũvoo ĩũlũ wa andũ nyanya ala mathayũũkiw’e.—Sisya ĩsandũkũ “ Andũ Nyanya Mawetetwe Mbivilianĩ Ala Mathayũũkiw’e.”

Vaiĩ ũmwe katĩ wa asu nyanya waaweta kana ĩla waĩ mũkw’ũ, aĩ vandũ vaĩ ũtanu mwingĩ kana vandũ wathĩnĩaw’a. Takethĩwa andũ asu mathayũũkiw’e ve vandũ maĩ maendie ĩtina wa kũkw’a, yo tyo methĩwe matavisye andũ ĩũlũ wa vandũ vau? Na Ngai ndethĩwa aveveeie ũndũ ũsu ũandĩkwe Mbivilianĩ nĩ kana andũ onthe makasomaa? Vai ũndũ ta ũsu tũsomaa Mbivilianĩ. Vate nzika, andũ asu nyanya mayaĩ ũndũ maĩ maweta ĩũlũ wa ĩla maĩ akw’ũ. Nĩkĩ? Nũndũ vai ũndũ meesĩ, yaĩ ũndũ ũmwe na makomete too mũito vyũ. Mavinda angĩ, Mbivilia nĩtũmĩaa too kwa nzĩa ya ngelekany’o kũelesya ĩũlũ wa kĩkw’ũ. Kwa ngelekany’o, Mbivilia yaĩtye kana Ndaviti na Sitivini ‘nĩmakomie’ kĩkw’ũnĩ.—Meko ma Atũmwa 7:60; 13:36.

Kwoou, ve wĩkwatyo mwaũ kwondũ wa ala makwie? No maamũke kuma toonĩ wa kĩkw’ũ?

^ kal. 7 Ndeto ya Kĩevelania “Seoli” ĩla ĩtũmĩĩtwe ĩandĩkonĩ yĩu nĩ “mbũa.” Mbivilia ingĩ itũmĩĩte ndeto hell ĩandĩkonĩ yĩu, ĩndĩ ũmanyĩsyo wa kana ve vandũ akw’ũ mathĩnĩaw’a na mwaki ũyosanĩte na Maandĩko.