Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 7 2015

We Nĩwĩsĩ?

We Nĩwĩsĩ?

Mavia ma kũthia matũmĩawa ata ĩvinda ya tene?

Mavia ma kũthia nĩmatũmĩawa kũthia mũtu wa mĩkate. Vakuvĩ kĩla mũsyĩ, aka kana athũkũmi nĩmatũmĩaa mavia ma kũthia. Ĩvinda ya tene, andũ nĩmamanyĩĩte kwĩw’a wasya wa mavia me kũthia.—Kuma 11:5; Yelemia 25:10.

Mĩsolo na mavisa ma kwasa ma nthĩ ya Egypt nĩmonanĩtye ũndũ mũndũ wathiaa aitũmĩa ĩvia ya kũthia. Ũla ũkũthia ailĩĩlaa kĩla ũkũthia ĩvianĩ ya kũthiĩa, na aitulya ndu mbee wayo na aithia akwete na moko elĩ nthio kana ĩvia ya kũthia. Athiaa kwa kũsukuma nthio mbee na ĩtina nginya akamina kũthia. Kwosana na livoti ĩmwe, nthio yeethĩawa yĩ na kĩlo katĩ wa ilĩ nginya inya. Nthio yaĩ ĩtonya kũaa mũndũ akimĩtwe nayo.—Asili 9:50-54.

Kũthia kwaĩ ũndũ wa vata mũno nthĩnĩ wa mũsyĩ na kĩu nĩkyo kĩtumi Mbivilianĩ ve mwĩao wavatanĩte mũndũ ayosa ĩvia ya kũthia yĩthĩwe ngwatĩlĩlyo ayĩsa kũĩvwa kĩla ũtaanĩte. Ĩvuku ya Kũtũngĩlĩlwa Kwa Mĩao 24:6 yaĩtye: “Mũndũ ndakaose ĩvia ya ũthia kana nthio yayo yĩthĩwe ngwatĩlĩlyo; nũndũ ũu nĩ ta kwosa thayũ wa mũndũ wĩthĩwe ngwatĩlĩlyo.”

Ndeto “kĩthũinĩ” yonanasya kyaũ?

Mbivilia yaĩtye kana Yesũ ‘e kĩthũinĩ kya Asa.’ (Yoana 1:18) Ndeto isu syonanasya kana Yesũ nĩwĩtĩkĩlĩtwe nĩ Ngai, na nĩ mũnyanyae mũnene mũno wake. O na ĩngĩ, syonanasya kĩthĩo kĩla Ayuti meethĩawa nakyo ĩla me mesanĩ maiya.

Ĩvindanĩ ya Yesũ, Ayuti mekalaa ivĩlanĩ ite vandũ va kwaĩĩa ila syavangawa ithiũũkĩte mesa ya kũĩĩa. Ũla weethĩawa mesanĩ aiya ekalaa atambaaĩtye maaũ, kyongo kĩthengeee mesa, na etw’ĩĩkĩte na kĩkokoa kya kw’oko kwa aka kamũtonĩ. Ekala ũu, weethĩaa no atũmĩe kw’oko kwake kwa aũme. Nũndũ ala meethĩawa mailyĩ mesanĩ ya kũĩĩa meethĩawa meekete na ngalĩ ya kw’oko kwa aka, ĩvuku yĩmwe yaĩtye kana “kyongo kya mũndũ ũmwe kyeethĩawa kĩ vakuvĩ na kĩthũi kya ũla weethĩawa mathengeanĩe, na kĩu nĩkyo kyatumaa awetwa ta ‘wĩ kĩthũinĩ’ kya mũndũ ũla ũngĩ.”

Kwĩkala kĩthũinĩ kya mwene mũsyĩ kana mũndũ ũla ũthokanĩtye mbokanĩ yeethĩawa yĩ ndaĩa nene mũno. Kwoou, ĩvindanĩ ya Vasaka ya mũthya ĩla Yesũ waĩe vamwe na amanyĩw’a make, ‘mũmanyĩw’a ũla wendetwe nĩ Yesũ,’ ũla nĩ mũtũmwa Yoana, nĩwe waaĩĩe kĩthũinĩ kyake. Na kwoou Yoana aĩ atonya ‘kwaĩĩa kĩthũinĩ kya Yesũ’ nĩ kana amũkũlye ĩkũlyo.—Yoana 13:23-25; 21:20.