Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 7 2015

Yo Nĩ Ũndũ Ũtonyeka Kũmwendeesya Ngai?

Yo Nĩ Ũndũ Ũtonyeka Kũmwendeesya Ngai?

Waasoma ĩũlũ wa andũ amwe maeleetw’e Mbivilianĩ makathĩtwe mũno nginya ũkasũanĩa ũndũ ta ũũ: ‘Nyie ndyĩsa kwĩthĩwa nĩilyĩ tamo!’ No wasye, ‘Nyie ndi mũlũngalu na vate nzika mavinda onthe ndyĩkaa maũndũ ala maseo.’

Yovu “aĩ mwĩanĩu na mũlũngalu.” —Yovu 1:1, Maelesyo ma kwongeleela

Mbivilia yaĩtye ũũ ĩũlũ wa Yovu: “Aĩ mwĩanĩu na mũlũngalu.” (Yovu 1:1) Nake Loto etĩtwe “mũndũ mũlũngalu.” (2 Vetelo 2:8) Mbivilia yongeleele kwasya kana Ndaviti eekaa “ũla ũseo” methonĩ ma Ngai. (1 Asumbĩ 14:8) Ĩndĩ, ekai twĩmanyĩsye maũndũ maingangĩ ĩũlũ wa andũ asu mawetetwe Mbivilianĩ. Nĩtũkwĩmanyĩsya kana (1) nĩmavĩtasya, (2) no twĩmanyĩsye maũndũ maingĩ kumana na ngelekany’o yoo, na (3) andũ me na naĩ kana mate eanĩu no mamwendeesye Ngai.

NĨMAVĨTASYA

‘Ngai nĩwamũvĩtisye Loto, ũla waĩ mũlũngalu, wanyamaĩtw’e nĩ mwĩkalĩle wa mĩmeo mĩthũku ya ala athe.’—2 Vetelo 2:7

Yovu akwatiwe nĩ maũndũ maingĩ maĩ momũ. Ndaaelewa nesa nĩkĩ maũndũ asu mamũkwatĩte, na nũndũ wa ũu atw’a kana Ngai ndoonaa mũĩkĩĩo ũla waĩ naw’o. (Yovu 9:20-22) Yovu oonaa e mũlũngalu vyũ nginya weethĩa andũ ala angĩ meona ta ũkwasya we nĩ mũlũngalu kwĩ Ngai.—Yovu 32:1, 2; 35:1, 2.

Loto ndaaĩka ũtwi ũla waaĩlĩte na mĩtũkĩ, o na kau waĩ o ũtwi wa ĩmwe kwa ĩmwe na wĩ laisi. Athĩnĩkaa mũno nũndũ wa mwĩkalĩle mũthũku wa andũ ala mekalaa Sotomo na Ngomola, nginya “athĩn’ya ngoo yake ndũngalu.” (2 Vetelo 2:8) Ngai aisye kana nũkwananga ndũa isu nthũku na anenga Loto mwanya wa kũvonoka vamwe na mũsyĩ wake. No ũsũanĩe kana nũndũ Loto nĩwathĩnĩkaa mũno, nĩwe waaĩle kwĩthĩwa  e wa mbee kuma ndũanĩ isu. Ĩndĩ ũndũ wa ũsengy’a nĩ kana ndaaosa ĩtambya ya mĩtũkĩ. Alaĩka ala matũmĩtwe makamavonokye malasimĩkie kũmakwata moko na kũmaumya ndũanĩ ĩsu, na mamatwaa vandũ vate mũisyo.—Mwambĩlĩlyo 19:15, 16.

Ndaviti ‘nĩwamũvikĩlaa Ngai na ngoo yake yonthe, eke ũla Ngai woonaa wĩ ũseo w’oka.’—1 Asumbĩ 14:8

Ĩvindanĩ yĩmwe Ndaviti nĩwaemiwe nĩ kwĩsiĩĩa na kwoou eeka ũlaalai na kĩveti kya mũndũũme ũngĩ. Ũndũ wa kũmakya nĩ kana, nĩwoowaie mũũme wa kĩveti kĩu nĩ kana avithe naĩ yake. (2 Samueli, kĩlungu kya 11) Mbivilia yaĩtye kana ũndũ ũla Ndaviti weekie “nĩwamwĩw’ĩthisye Yeova woo.”—2 Samueli 11:27.

Yovu, Loto, na Ndaviti nĩmavĩtisye, na mavĩtyo amwe moo maĩ maito mũno. Ĩndĩ o tondũ tũkwĩsa kwona, nĩmeeyumĩtye kũmũthũkũma Ngai na ngoo yonthe, na kwĩthĩwa me ewi. O na nĩmeetĩkĩlaa mavĩtyo moo, na mayĩka moalyũku ala maĩlĩte. Na nũndũ wa ũu, Ngai nĩwendeeiw’e nĩmo, na Mbivilia ĩmetĩte aũme aĩkĩĩku.

TŨTONYA KWĨMANYĨSYA KYAŨ?

Nũndũ twĩ andũ me na naĩ, mavinda amwe nĩtũvĩtasya. (Alomi 3:23) Ĩndĩ ĩla twavĩtya nĩtwaĩle kwĩtĩkĩla mavĩtyo, na tũitata ũndũ tũtonya tũlũnge maũndũ.

Yovu, Loto, na Ndaviti meekie ata nĩ kana malũnge mavĩtyo moo? Yovu aĩ mũĩkĩĩku kuma ngoonĩ. Yovu nĩwalũngile mosũanĩo make na eetĩkĩla ĩvĩtyo yake ĩtina wa Ngai kũneena nake. (Yovu 42:6) Naw’o woni wa Loto ĩũlũ wa mwĩkalĩle mũthũku wa andũ ma Sotomo na Ngomola  woosanĩte nesa vyũ na ũndũ Ngai wonaa ũthũku. Ĩndĩ thĩna wake waĩ kũlea kwosa ĩtambya ya mĩtũkĩ. Ĩtina nĩwesie kuma ndũanĩ isu Ngai wavangĩte kũsyananga na avonoka ũsilĩlo wa Ngai. Nũndũ aĩ mwĩwi ndaasisya syĩndũ ila watiĩte ĩtina. O na kau Ndaviti nĩweekie naĩ ngito kwa kũtũla mwĩao wa Ngai, nĩwoonanisye kĩla kyaĩ ngoonĩ yake ĩla weetĩkĩlile mavĩtyo make, na eetya Ngai ũekeo.—Savuli 51.

Ũndũ Ngai woonaa aũme asu, kwĩtwony’a woni mũseo ũla wĩthĩawa naw’o kwa andũ me na naĩ. Ngai “nĩwĩsĩ wũmbe witũ; nũlilikanaa kana twĩ kĩtoo.” (Savuli 103:14) Kwoou, ethĩwa Ngai nĩwĩsĩ kana mavinda amwe nĩtũvĩtasya, endaa twĩke ata?

Ngai “nĩwĩsĩ wũmbe witũ; nũlilikanaa kana twĩ kĩtoo.”—Savuli 103:14

ŨNDŨ ANDŨ ME NA NAĨ MATONYA KŨMWENDEESYA NGAI

Ũtao ũla Ndaviti wanengie mwana wake Solomoni nũtũtetheeasya kũmanya ũndũ tũtonya kũmwendeesya Ngai. Amwĩie atĩĩ: “Naku, Solomoni mwana wakwa, mũmanye Ngai wa ĩthe waku, noimũthũkũma na ngoo mbĩanĩu.” (1 Mavinda 28:9) Ĩkũlyo nĩ, Ngoo mbĩanĩu nĩ kyaũ? Nĩ kũmwenda Ngai na kwĩthĩwa mũndũ atw’ĩte kwĩmanyĩsya kwenda kwake, na kwĩka kĩla weemanyĩsya. Ũu ti kwasya kana mũndũ ndatonya kwĩka naĩ, ĩndĩ nĩkwĩthĩwa na mea ma kũmũthũkũma Ngai wĩ mwĩwi na kwĩthĩwa wĩyũmbanĩtye kũlũngwa. Kũmwenda Ngai na kwĩthĩwa e mwĩwi nĩkw’o kwatumie Yovu awetwa ta “mwĩanĩu,” nake Loto awetwa ta “mũlũngalu,” na Ndaviti awetwa ta weekaa “ũla ũseo” methonĩ ma Ngai. Nĩmamwendeeisye Ngai o na kau onthe nĩmavĩtasya.

Mũndũ wĩ na ngoo mbĩanĩu nĩwĩthĩawa endete kwĩka kwenda kwa Ngai na kũmũthũkũma e mwĩwi

Kwoou, ĩla tweethĩwa na mosũanĩo mate maseo, twaneena ndeto iũtuma twĩw’a nthoni, kana tweeka maũndũ mate maseo, nĩ ũndũ wa vata kwosa vinya kumana na ngelekany’o isu twaneenea. Ngai nĩwĩsĩ kana ĩvindanĩ yĩĩ tũilea kwĩka naĩ. Ĩndĩ o na ũu wĩ o vo, nĩwendaa tũmwende na tũitata ũndũ tũtonya twĩthĩwe twĩ ewi. Tweethĩwa na ngoo mbĩanĩu kwa kũmwenda na kwĩthĩwa twĩ ewi, no twĩthĩwe na mũĩkĩĩo mũlũmu kana no tũmwendeesye.