Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 3 2015

 KYONGO KYA ĨTHANGŨ YA MBEE | YESŨ ATANGĨĨAA ANDŨ—KUMA KYAŨNĨ?

Nĩkĩ ve Vata wa Ũtangĩĩo?

Nĩkĩ ve Vata wa Ũtangĩĩo?

“Mũndũ, ũla ũsyaĩtwe nĩ mũndũ mũka, nĩ wa mĩthenya mĩvũthũ, na ausũĩte thĩna. Nĩwumĩlaa ta ĩlaa, na kũtilwa: nũsembaa ta muunyĩ, na ndekalaa.”—Yovu 14:1, 2.

Kuma ĩvinda ya tene andũ nĩmasũanĩaa ũndũ thayũ ũtonya kwĩthĩwa wĩ mũseo mayĩkala me na ũima wa mwĩĩ, na me ma mũika tene na tene. Ĩndĩ ũndũ wa kũmakya nĩ kana nĩtũkusaa. Kwoou, ndeto ila Yovu waneenie myaka mbee wa ngili itatũ mĩvĩtu nĩ sya w’o o na ũmũnthĩ.

Kĩla mũndũ ĩũlũ wa nthĩ nĩwĩthĩawa na wendi mwingĩ wa kwĩkala tene na tene. Mbivilia nĩyĩeleetye kana Ngai nĩwĩkĩĩte wendi wa kwĩkala tene na tene ngoonĩ sitũ, na nĩtwĩthĩawa na mea ma kwona ũndũ ũsu ũianĩa. (Mũtavan’ya 3:11) Ethĩwa ũu nĩw’o vailyĩ, we wĩona Ngai wĩ wendo ta ũtonya kwĩkĩa wendi ũtakeanĩa ngoonĩ sitũ? Ethĩwa ũsũngĩo waku nĩ aiee, wasũngĩa ũla w’o. Ndeto ya Ngai yĩtĩte kĩkw’ũ mũmaitha na ĩkathana kana ‘kĩkaanangwa.’—1 Akolintho 15:26.

Vai nzika kana kĩkw’ũ nĩ mũmaitha. Vaiĩ mũndũ wĩ kĩlĩko kĩseo wendeew’a nĩ kĩkw’ũ. Ĩla vaumĩla mũisyo nĩtũsembaa, tũkevitha, kana tũkakĩĩa vandũ vangĩ. Twawaa nĩtũmanthaa ũndũ tũtonya kũiitwa. O na ĩngĩ, nĩtũtataa ũndũ tũtonya kwĩsiĩanĩa na maũndũ ala matonya kũtuma tũkw’a.

Yo ve ũndũ ũtonya kũtuma tũĩkĩĩa kana mũmaitha ũsu wa tene akaanangwa? Ĩĩ, wĩ vo. Mũmbi witũ, Yeova Ngai, ndaaũmba andũ mekalae myaka mĩnini na ĩtina maikw’a. Kuma mwambĩlĩĩlyonĩ, kĩeleelo kyake kĩyaĩ andũ makusae. Kĩeleelo kyake kyaĩ andũ mekalae ĩũlũ wa nthĩ tene na tene, na ndalea kũkĩanĩsya.—Isaia 55:11.

Kwoou, kĩkw’ũ kĩkaanangwa ata? Mũndũ ethĩĩtwe aitata mũno kũsiĩĩa kĩkw’ũ, ĩndĩ nĩwaemiwe. O na kũvika ũmũnthĩ no ũtataa. Andũ ma saenzi nĩmaseũvĩtye ndawa sya kũsiĩĩa na kũiita mowau amwe. O na nĩmasomete ĩũlũ wa ũndũ mĩĩ ya syĩndũ yũmbĩtwe. O na ĩngĩ, andũ kũndũ kwingĩ nĩmekalaa thayũ mũnango mbee wa ũndũ andũ mekalaa myaka 100 mĩvĩtu. Ĩndĩ o na vailyĩ ũu, kĩkw’ũ kĩyaaĩsa kũthela. Andũ “onthe masyokaa ĩngĩ kĩtoonĩ” o tondũ Mbivilia yaĩtye.—Mũtavan’ya 3:20.

Ũndũ wa kũtanĩthya nĩ kana vai vata wa kwĩkwatya ũĩ na ũmanyi wa mũndũ ũtũvetangĩe thĩna ũsu wĩthĩĩtwe vo kwa ĩvinda ĩasa. Yeova Ngai nĩwĩkĩte mũvango wa kũtũtangĩĩa kuma kĩkw’ũnĩ, na Yesũ Klĩsto nĩwe ũkatũmĩwa kwĩanĩsya ũndũ ũsu.