Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 2 2015

 KYONGO KYA ĨTHANGŨ YA MBEE | ŨNDŨ ŨTONYA KŨTANĨA WĨA WAKU

Kũthũkũma Wĩa Mũmũ—nĩ Ũndũ Wavĩtiwe nĩ Ĩvinda?

Kũthũkũma Wĩa Mũmũ—nĩ Ũndũ Wavĩtiwe nĩ Ĩvinda?

Mũndũũme ũmwe wĩtawa Alex aendeee na kũlalamĩka ayumya makotoni ĩlolinĩ ya kambunĩ ĩla ũthũkũmaa. Eĩkũlya atĩĩ: ‘Yo nĩendeea kũthũkũma nginya ĩndĩĩ wĩa ũũ ũtesa kũndethya? Ngesa kũkwata wĩa ũtonya kũndethya ĩndĩĩ? Nĩthĩwa nĩendeee nesa takethĩwa ti lasima nĩthũkũme!’

O ta Alex, andũ aingĩ ũmũnthĩ mayendete kũthũkũma na kĩthito. Mũndũũme ũmwe ũthũkũmaa wĩa wa makanika aĩtye: “Andũ aingĩ monaa mataĩle kũthũkũma wĩa ‘mũmũ.’” Aendeee kwasya: “Andũ aingĩ me o wĩanĩ methĩawa maisũanĩa kana methũkũma wĩa ũla me naw’o meteele kũkwata ũngĩ mũseo.”

Nĩkĩ andũ aingĩ mew’aa mataĩle kũtethya wĩa mũmũ? Nĩmatonya kwĩthĩwa mew’aa ũu nũndũ wa ũvoo mwingĩ ũla makwataa isesenĩ sya maũvoo mavinda maingĩ, ũyonany’a kana thayũ ũla “mũseo” nĩ mũndũ kwĩkala e mwĩanĩe, na ate kũthũkũma wĩa mũmũ. Matthew, ũla ũtethasya wĩa wa kũseũvya na kũsũvĩa syĩndũ iikanangĩke, easya atĩĩ: “Andũ mesilasya kana mũndũ ũla ũtaendeee nesa nĩ ũla ũng’ang’anaa mũno aithũkũma nĩ kana eanĩsye mavata make.” Nake Shane, ũla ũthũkũmaa wĩa wa kũsũvĩa nyũmba, e na woni o ta ũsu. Easya atĩĩ: “Andũ nĩmaekie kũthũkũma wĩa wa ĩtukũ.”

Ĩndĩ o na ũu wĩ o vo, andũ aingĩ nĩmatanĩaa wĩa mũmũ. Daniel, ũla wĩ na myaka 25, na ũthũkũmaa wĩa wa myako easya ũũ: “No nasye kana wĩa mũmũ nũtetheeasya mũndũ aũtethya e na kĩeleelo kĩseo.” Nake Andre, ũla wĩ na myaka 23, nũkwĩtĩkĩlana na ũndũ ũsu. Aĩtye: “Nĩĩkĩĩaa kana ũtanu na wĩa nikonanĩtye.” Aendeee kwasya: “Ĩla mũndũ watethya wĩa mũnini kana ekala mana, ndesa kũkwata ũtanu!”

Nĩ kyaũ kĩtumĩte andũ ta Daniel na Andre, methĩwa na woni mũseo ĩũlũ wa wĩa? Kwa ũkuvĩ, matetheew’e nĩ myolooto ya Mbivilia. Ndeto ya Ngai ndyaĩtye andũ maikatethye wĩa mũmũ, ĩndĩ ĩmathangaasya matethye wĩa na kĩthito na mayĩthĩwa na wũmĩĩsyo. O na nĩwetete ũndũ ũngĩ eka o kũtwĩa tũthũkũme. Nĩyonanĩtye ũndũ tũtonya kũtanĩa wĩa.

Nĩ myolooto yĩva ya Mbivilia ĩtonya kũũtetheesya ũkethĩwa wĩ mwĩanĩe wĩanĩ waku? Twĩũkũlya ũsome kĩlungu kĩla kĩatĩĩe nũndũ nĩkyonanĩtye myolooto ĩsu.