Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Mwei wa 2 2015

 MBIVILIA NĨALYŨLAA ANDŨ

Nĩnendeeiw’e nĩ Mosũngĩo Maseo na me Ũtheinĩ ma Mbivilia

Nĩnendeeiw’e nĩ Mosũngĩo Maseo na me Ũtheinĩ ma Mbivilia
  • ASYAIWE MWAKA WA: 1948

  • NTHĨ ĨLA WUMĨTE: HUNGARY

  • ĨVINDA ĨVĨTU: AĨ NA WENDI WA KŨKWATA MOSŨNGĨO MA MAKŨLYO ALA MA VATA THAYŨNĨ

KWĨANA KWAKWA:

Nasyaĩwe mũsyĩ wa Székesfehérvár, nthĩ ya Hungary. Nĩ mũsyĩ wĩ isitolia nzeo ya myaka mbee wa 1,000. Ĩndĩ ũndũ wa kũmakya nĩ kana no nĩlilikanaa ũndũ kaũ wa kelĩ wa nthĩ yonthe waanangie nthĩ yitũ.

Nĩ mũnini naeiwe nĩ asyai ma inyia wakwa. Nĩmalilikanaa nesa vyũ, mũno mũno sũsũ wakwa Elisabeth. Nĩwandetheeisye neethĩwa na mũĩkĩĩo mũlũmu ĩũlũ wa Ngai. Kuma nĩ na myaka ĩtatũ, kĩla wĩoo twasyokeleelaa Mboya ya Mwĩaĩi. O na ũu wĩ o vo, ndyaeleawa nĩ kĩla mboya ĩsu yonanasya nginya nĩ myaka vakuvĩ 30.

Naeawa nĩ asyai ma inyia wakwa nũndũ asyai makwa mathũkũmaa kĩla ĩvinda me na mũvango wa kũmbany’a mbesa mathooe nyũmba nzeo ya kwĩkala. Ĩndĩ kĩla Wathanthatũ wa kelĩ wa mwei, nĩtwakomanaa ithyonthe tũkaya lĩu vamwe. Nĩnatanĩaa mavinda asu mũno.

Mwaka wa 1958, asyai makwa nĩmeanĩisye ũndũ mendaa na mathooa nyũmba yitũ twĩ atatũ. Nĩnatanĩie mũno kwĩkala vamwe na asyai makwa! Ĩndĩ ũtanu ũsu nĩwathelile ĩtina wa myei thanthatũ, ĩla ĩthe wakwa wakwie awaĩte kanza.

Natelemile mũno. Nĩlilikanaa ndivoya atĩĩ: “Ngai, nĩnakwĩsũvie ũsũvĩe ĩthe wakwa, na nĩngũmwenda. Nĩkĩ ũtaasũngĩa mboya syakwa?” Nendaa mũno kũmanya vala ĩthe wakwa waĩ. Neekũlasya atĩĩ: ‘Aendie ĩtunĩ? Akeethĩwa thayũ ĩngĩ?’ Neew’ĩaa syana ila ĩngĩ syaĩ na aaĩthe moo kĩwĩu.

Kwa ĩvinda ya myaka mingĩ, naendaa vala ĩthe wakwa wathikĩtwe vakuvĩ kĩla mũthenya. Natulasya ndu vu mbũanĩ na ndivoya atĩĩ: “Ngai, ethĩwa nĩvatonyeka nĩenda kũmanya vala ĩthe wakwa ũĩ.” O na nĩnavoyaa nĩ kana nĩelewe vata wa thayũ.

Nĩnatwie kwĩmanyĩsya kĩthyomo kya German nĩ na myaka 13. Nasũanĩaa no nĩkwate mosũngĩo ma makũlyo makwa mavukunĩ ala manene, na me maũndũ maingĩ maandĩkĩtwe kwa kĩthyomo kya German. Mwaka wa 1967, nĩnambĩĩie kũsomea mũsyĩ wa Jena, ũla ĩvindanĩ yĩu waĩ nthĩnĩ wa East Germany. Nasomaa mũno mavuku ma asomi ma German,  na mũno mũno ala maneeneaa ĩũlũ wa vala mũndũ waumie. O na kau nĩnasomie maũndũ ma kwendeesya, vaiĩ o na ũmwe waasũngĩa nesa makũlyo makwa. Ndyaaeka kũvoya nĩ kana ngwate mosũngĩo.

ŨNDŨ MBIVILIA YAALYŨLILE MWĨKALĨLE WAKWA:

Mwaka wa 1970, nĩnasyokie Hungary, vala nakomanie na Rose, ũla wesie kũtw’ĩka kĩveti kyakwa. Ĩvinda yĩu nthĩ ya Hungary yaũngamĩwe nĩ silikalĩ ya Communist. Ĩvinda ĩkuvĩ ĩtina wa kũtwaana, nĩtwakĩĩie nthĩ ya Austria. Kĩeleelo kitũ kyaĩ kwĩsa kũthamĩĩa Sydney, nthĩ ya Australia, vala vekalaa mũndũũme wasyaanĩw’e na inyia wakwa.

Ndyaaĩkala mũno ndakwatĩte wĩa Austria. Mũthenya ũmwe mũndũ twathũkũmaa nake nĩwandavisye kana no nĩkwate mosũngĩo ma makũlyo makwa onthe Mbivilianĩ. Nĩwanengie mavuku me kĩvathũkany’o maneenete ĩũlũ wa Mbivilia. Nasomie mavuku asu onthe, na nĩnendaa kwĩmanyĩsya mũnango. Kwoou, nĩnaandĩkĩie Ngũsĩ sya Yeova, ala maumĩthĩtye mavuku asu na nakũlya nĩtũmĩwe mavuku angĩ.

Mũthenya wa kũtanĩa mwaka witũ wa mbee wa mũtwaano, nĩtwathokeiwe nĩ mwana-a-asa wa mũika wa Austria. Nĩwambeteie mavuku ala neetĩtye, na eeyumya kwĩmanyĩsya Mbivilia vamwe nakwa. Tweemanyĩasya mavinda elĩ kwa kyumwa, nũndũ nĩnendeeaw’a nĩ kwĩmanyĩsya. Twatũmĩaa masaa ana kĩla ĩvinda!

Nĩnendeeiw’e mũno nĩ maũndũ ala Ngũsĩ syamanyĩasya kuma Mbivilianĩ. Naseng’ie mũno ĩla mambonisye ĩsyĩtwa ya Ngai, Yeova, Mbivilianĩ ya kĩthyomo kya Hungary. Kwa ĩvinda ya myaka 27 ĩla naendaa ĩkanisanĩ, ndyaĩ naaĩw’a ĩsyĩtwa ya Ngai yĩiwetwa mũthenya o na ũmwe. Nĩnendeeiw’e mũno nĩ mosũngĩo maseo na me ũtheinĩ ma makũlyo makwa. Kwa ngelekany’o, nĩneemanyĩisye kana akw’ũ mayĩthĩawa mesĩ ũndũ o na wĩva, no ũndũ ũmwe na makomete too mũito. (Mũtavan’ya 9:5, 10; Yoana 11:11-15) O na ĩngĩ, nĩneemanyĩisye kana Mbivilia nĩyathanĩte ĩũlũ wa nthĩ nzaũ, vala ‘kĩkw’ũ kĩtakethĩwa vo ĩngĩ.’ (Ũvuan’yo 21:3, 4) Nĩĩkwatya ngoona ĩthe wakwa ĩngĩ, nũndũ nthĩnĩ wa nthĩ nzaũ “kũkeethĩwa ũthayũũkyo.”—Meko ma Atũmwa 24:15.

Kĩveti kyakwa Rose nĩkyeeyumisye na ngoo yonthe kwĩmanyĩsya Mbivilia. Nĩtweekie maendeeo na mĩtũkĩ, na twamina kwĩmanyĩsya ĩvuku yĩla twasomaa kwa ĩvinda ya myei ĩlĩ! Nĩtwaendaa maũmbanonĩ onthe ala meekawa nĩ Ngũsĩ sya Yeova Nyũmbanĩ ya Ũsumbĩ. Nĩtwendeeiw’e mũno kwona wendo woo, ũndũ matetheanĩasya, na ũndũ maĩ na ngwatanĩo.—Yoana 13:34, 35.

Mwaka wa 1976, nĩ na kĩveti kyakwa, nĩtweetĩkĩlilw’e kwĩkala Australia. Tũtekwananga ĩvinda nĩtwamanthie Ngũsĩ sya Yeova. Ngũsĩ ila syaĩ kĩsionĩ kĩu nĩsyatumie twĩw’a twĩ eanĩe. Mwaka wa 1978, nĩw’o twatw’ĩkie Ngũsĩ.

MOATHIMO ALA NĨKWATĨTE:

Nĩnesie ũkwata mosũngĩo ma makũlyo ala manthĩnĩtye kwa ĩvinda ĩasa. Kwa kwĩthĩwa na ngwatanĩo nzeo na Yeova Ngai, nĩnakwatie Ĩthe ũla mũseo vyũ. (Yakovo 4:8) Na nĩ ũndũ wa vata mũno kwakwa kwĩthĩwa nĩ na wĩkwatyo wa kwona ĩthe wakwa ĩngĩ nthĩnĩ wa nthĩ nzaũ.—Yoana 5:28, 29.

Mwaka wa 1989, nĩ na Rose nĩtwasyokie Hungary nĩ kana tũkamanyĩsye anyanya maitũ na andũ ma mũsyĩ, o vamwe na andũ angĩ ĩũlũ wa maũndũ ala tweemanyĩĩtye. Nĩtwĩthĩĩtwe na kĩanda kya mwanya kya kwĩmanyĩsya Mbivilia na andũ maana maingĩ, na andũ 70 katĩ wa asu nĩ athũkũmi ma Yeova. Inyia wakwa nĩ ũmwe katĩ wa asu.

Navoyie kwa ĩvinda ya myaka 17 nĩ kana nĩkwate mosũngĩo ma makũlyo makwa. Na yu myaka ĩngĩ 39 nĩ mĩvĩtu na no nĩvoyaa. O yu ndonya kwasya: “Nĩ mũvea Ĩthe wakwa wa ĩtunĩ, nũndũ wa kũsũngĩa mboya ila navoyaa nĩ mũnini.”