Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

Nĩtwaĩle Kũvoya Yesũ?

Nĩtwaĩle Kũvoya Yesũ?

MŨNDŨŨME ũmwe ayĩka ũkunĩkĩli akũlilye andũ ma mũika mbee wa 800 kuma ndĩni syĩ kĩvathũkany’o kana nĩmaĩkĩĩaa kana Yesũ nũsũngĩaa mboya. Andũ ma mũika 60 katĩ wa kĩla 100 makũlilw’e, maisye nĩmaĩkĩĩaa kana Yesũ nũsũngĩaa mboya. Ĩndĩ, mwĩĩtu ũmwe avutie ĩsyĩtwa Yesũ na vandũ vayo aandĩka ĩsyĩtwa “Ngai.”

We wĩona ta twaĩle kũmũvoya Yesũ kana nĩ Ngai? * Nĩ kana tũkwate ũsũngĩo, ekai twambe kwona ũndũ Yesũ wamanyĩisye amanyĩw’a make mavoyae.

KĨLA YESŨ WAMANYĨISYE

Yesũ nĩwamanyĩisye na oonany’a nũũ twaĩle kũvoya.

Yesũ nĩwamũvoyaa ĩthe wake wa ĩtunĩ na kwa kwĩka ũu atwiĩie ngelekany’o nzeo ĩũlũ wa mboya

KĨLA YESŨ WAMANYĨISYE: Ũmwe wa amanyĩw’a ma Yesũ amwĩie atĩĩ, “Mwĩaĩi, tũmanyĩsye kũvoya,” Yesũ amũsũngĩa: “Mũkĩvoya aasyai atĩĩ, Asa.” (Luka 11:1, 2) Ĩngĩ, nthĩnĩ wa ũla Ũtavany’a wa Kĩĩmanĩ, Yesũ eeie ala mamwĩthukĩĩsye mavoyae. Ameie ũũ: ‘Voyaai Ĩthe wenyu.’ Asyokie amekĩa vinya akĩmea: “Ĩthe wenyu nĩwĩsĩ ila mwĩ na vata nasyo, mbee wa inyw’ĩ mũtanamũvoya.” (Mathayo 6:6, 8) Ũtukũ wa mũthya ĩla Yesũ waĩ kũũ nthĩ eeie amanyĩw’a make atĩĩ: “O ũla mũkavoya Asa syĩtwanĩ yakwa, akamũnenga.” (Yoana 16:23) Kwoou, Yesũ atũmanyĩisye tũmũvoyae Ĩthe wake o ũla nĩwe Ĩthe witũ, Yeova Ngai.—Yoana 20:17.

NGELEKANY’O YAKE: Yesũ nĩwavoyie o tondũ wamanyĩasya andũ meke ĩla wavoyie ayasya atĩĩ: “Nĩngũũkatha, Asa, Mwĩaĩi wa ĩtu na nthĩ.” (Luka 10:21) O na ĩvinda yĩngĩ, ‘Yesũ nĩwookĩlilye metho, na asya, Asa, nĩngũũtũngĩa mũvea nũndũ nĩwambĩw’a.’ (Yoana 11:41) Akilyĩ kũkw’a Yesũ avoyie ũũ: “Asa, veva wakwa nĩngũwia mokonĩ maku.” (Luka 23:46) Yesũ nĩwamũvoyaa Ĩthe wake wa ĩtunĩ ũla nĩwe “Mwĩaĩi wa ĩtu na nthĩ,” na kwa kwĩka ũu nĩwatwiĩie ngelekany’o nzeo. (Mathayo 11:25; 26:41, 42; 1 Yoana 2:6) Ũu nĩw’o amanyĩw’a make maeleiwe nĩ motao ala wamanengie?

AKLĨSTO MA ĨVINDA YA ATŨMWA MAVOYAA ŨŨ?

Syumwa nini ĩtina wa Yesũ kũsyoka ĩtunĩ, amanyĩw’a make nĩmambĩĩie kũthĩnw’a na kũtelemangw’a nĩ amaitha moo. (Meko ma Atũmwa 4:18) Vate nzika nĩmavoyie. Ĩkũlyo nĩ, Mo mavoyie ũũ? Mbivilia yaĩtye kana ‘mamũkĩlĩilye Ngai mawasya moo na ngoo ĩmwe,’ maimũvoya nĩ kana aendeee kũmatetheesya kwĩsĩla “syĩtwanĩ ya mũthũkũmi [wake] mũtheu Yesũ.” (Meko ma Atũmwa 4:24, 30) Kwoou, amanyĩw’a ma Yesũ nĩmaatĩĩie ũndũ wamamanyĩisye ĩũlũ wa mboya. Mamũvoyaa Ngai ĩndĩ ti Yesũ.

Ĩtina wa myaka kauta, mũtũmwa Vaulo nĩwaeleisye ũndũ we, na ala waĩ namo mavoyaa. Aimaandĩkĩa Aklĩsto aisye atĩĩ: “Nĩtũũtũngĩa Ngai mũvea, Ĩthe wa Mwĩaĩi waitũ Yesũ Klĩsto, tũkĩmũvoyea mavinda onthe.” (Akolosai 1:3) O na ĩngĩ, Vaulo nĩwaandĩkĩie Aklĩsto ala angĩ ĩũlũ wa ‘kũtũngĩaa Ngai Asa mũvea, mavinda onthe kwondũ wa maũndũ onthe, syĩtwanĩ ya Mwĩaĩi waitũ Yesũ  Klĩsto.’ (Aeveso 5:20) Ndeto isu syĩonany’a kana Vaulo nĩweekĩie ala angĩ vinya mavoyae ‘Ngai Asa kwondũ wa maũndũ onthe’ kwĩsĩla ĩsyĩtwanĩ ya Yesũ.—Akolosai 3:17.

O ta Aklĩsto ma ĩvinda ya atũmwa, no twonany’e kana nĩtũmwendete Yesũ kwa kũatĩĩa ũtao ũla waumisye ĩũlũ wa mboya. (Yoana 14:15) Ĩla twamũvoya Asa witũ ũla wĩ ĩtunĩ e weka tũkeethĩwa tũtonya kũelewa nesa ndeto ii syĩ ĩandĩkonĩ ya Savuli 116:1, 2: “Nĩnĩmwendaa Yeova, nĩkwĩthĩwa nĩwĩw’aa wasya wakwa . . . Kwondũ wa ũu ngamwĩkaĩlaa o yĩla nĩ thayũ.” *

^ kĩl. 3 Mbivilia yonanasya kana Ngai na Yesũ mayĩanene.

^ kĩl. 11 Nĩ kana Ngai etĩkĩle mboya sitũ no nginya tũtate ũndũ vatonyeka twĩkale kwosana na ũndũ wendete. Nĩ kana ũkwate ũvoo mwingangĩ sisya kĩlungu kya 17 kya ĩvuku Mbivilia Yo Ĩmanyĩasya Ata?