Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 6 2015

“Mwĩ na Vata wa Wũmĩĩsyo”

“Mwĩ na Vata wa Wũmĩĩsyo”

ANITA * amina kũvatiswa oou na kũtw’ĩka wa Ngũsĩ sya Yeova, mũũme nĩwambĩĩe kũmũvĩnga naĩ mũno. Easya ũũ: “Nĩwambatie kũthi maũmbanonĩ, o na nĩwambatie kũweta ĩsyĩtwa ya Ngai. Nakilasya natamũka Yeova oou akaimba na aitw’ĩka wa kĩlonzo kĩthei.”

Ũndũ ũngĩ waĩ kaũ kwa Anita waĩ kũmanyĩsya syana syake ĩũlũ wa Yeova. Easya: “Navatĩtwe vyũ kumũthaitha Yeova, nakwa nĩ o kwakwa. Namanyĩasya syana syakwa twĩvithĩte, na ndyaĩ nĩtonya kũthi nasyo maũmbanonĩ.”

O tondũ ngewa ĩsu ya Anita ĩkwonany’a, kũvĩngwa nĩ andũ ma mũsyĩ nĩkũtonya kũtata mũno mũĩkĩĩo wa Mũklĩsto. Maũndũ angĩ matonya kũtata mũno mũĩkĩĩo wa Mũklĩsto nĩ kũkwatwa nĩ mathĩna manene ma mwĩĩ, kũkw’ĩĩwa nĩ mwana kana ũla ũtwaanĩte nake, kana o mũndũ wa mũsyĩ kũmũtia Yeova. Kwoou kyo nĩ kyaũ kĩtonya kũmũnenga Mũklĩsto vinya wa kũmũthũkũma Yeova e mũĩkĩĩku?

We ũkakwatwa nĩ mathĩna ta asu mawetwa wĩka ata? Mũtũmwa Vaulo aisye atĩĩ: “Mwĩ na vata wa wũmĩĩsyo.” (Aevl. 10:36) Ĩndĩ ũtonya kwĩka ata nĩ kana ũmĩĩsye?

MŨVOYE YEOVA AŨTETHEESYE

Ũndũ ũmwe mũnene ũtonya kũtũnenga vinya wa kũmĩĩsya matatwa nĩ kũmũvoya Ngai atũtetheesye. Kwasũanĩa ngelekany’o ĩmwe. Mũthenya ũmwe kwĩ Wakwambĩlĩĩlya mawĩoo, Ana na mũsyĩ wake nĩmakwatiwe nĩ mũisyo mũna. Makwatie livoti kana mũũme wa Ana, ũla mekalanĩtye kwa ĩvinda ya myaka 30, nĩwakw’a. Ana easya: “Athi wĩanĩ ndaasyoka. Aikw’a aĩ o na myaka 52.”

Ana atethiw’e nĩ kyaũ? O na kau wĩa ũla wathũkũmaa ndwaaveta vyũ woo ũla weew’aa, nĩwamũtetheeisye nũndũ ndwanengae kĩlĩko kyake mwanya wa kũsũanĩa maũndũ angĩ. Ĩndĩ Ana asyokete akasya: “Nĩnamũtulũĩle Yeova ngoo yakwa na namwĩsũva andetheesye nũmĩanĩsye na wasyo ũsu mũnene nakwatie.” We Yeova nĩwamũsũngĩie? Ana nde na nzika kana nĩwasũngĩiwe. Easya: “Mũuo ũla Ngai wanengie nĩwatumie nĩusya na wandetheesya ndikese kũvũavũana. No Ngai e weka ũtonya kũnengane mũuo ta ũsu. Nĩnĩsĩ nesa kana Yeova akathayũũkya mũemewa.”—Avi. 4:6, 7.

We “ũla wĩw’aa mboya” nĩwathĩte athũkũmi make kana akamanengae kyonthe kĩla kĩtonya kũmatetheesya mamũthũkũmae me aĩkĩĩku. (Sav. 65:2) We ndũkwona kana watho ũsu nũtonya kũlũlũmĩlya mũĩkĩĩo waku? Na tyo ũkwona kana watho ũsu nũũtuma ũmanya kĩla kĩtonya kũũtetheesya o naku ũmĩĩsye?

MAŨMBANO NĨMATWĨKĨAA VINYA

Nzĩa ĩngĩ Yeova ũtũmĩaa kũnenga vinya andũ make nĩ kĩkundi kya Kĩklĩsto. Kwa ngelekany’o, ĩvinda yĩla kĩkundi kya Thesalonika kyathĩnĩtw’e mũno, Vaulo nĩwathangaaisye Aklĩsto ala maĩ kĩkundinĩ kĩu akĩmea: “Kiakian’yai, na kĩla mũndũ akyaka ũla ũngĩ, o ũndũ mwĩkaa.” (1 Ath. 2:14; 5:11) Nũndũ Aklĩsto ma Thesalonika maĩ na ngwatanĩo na nĩmendene, na ĩngĩ nĩmatethanasya, nĩmoomĩĩisye ĩvinda yĩu mathĩnaw’a mũno. Ngewa yoo nĩ ngelekany’o nzeo mũno kwitũ, na nĩtũmanyĩasya kĩndũ kĩngĩ kĩtonya kũtũtetheesya tũmĩĩsye.

Kwĩthĩwa na ngwatanĩo nzeo vamwe na Aklĩsto ala angĩ kĩkundinĩ no kũtume “kĩla ũmwe aka [ũla] ũngĩ.” (Alo. 14:19) Na mũno mũno, kwakana kwĩthĩawa kwĩ kwa vata mũno ĩla kwĩ mathĩna. Kwasũanĩa ĩũlũ wa Vaulo. Nĩwakwatiwe nĩ mathĩna maingĩ mũno, na Yeova nĩwamũnengie vinya wa kũmĩĩsya mathĩna asu. Mavinda amwe Ngai nĩwatũmĩaa ana-a-asa ma Vaulo kũmũkiakisya mũno. Kwa ngelekany’o, ĩla Vaulo watũmanaa ngethi kĩkundinĩ kya Kolosai, aisye ũũ ĩũlũ wa asu wakethasya: “Nĩmethĩĩtwe me ũtethyo mũnene kwakwa.” (Akol. 4:10, 11, The Holy Bible in Current Kikamba Language) Vate nzika, ana-a-asa asu nĩmamũkiakiisye Vaulo na mamwĩkĩa vinya ĩvindanĩ yĩla waĩ na thĩna nũndũ nĩmamwendete. Nĩvatonyeka o naku ũkethĩwa ũtethetw’e kwa nzĩa ta ĩsu nĩ ana-a-asa ala me kĩkundinĩ kyenyu.

 ATUMĨA NĨMATONYA KŨKWĨKĨA VINYA

Ngai nũtũmĩaa kĩkundi kya Kĩklĩsto kũtũnenga ũtethyo ũngĩ. Ũtethyo ũsu nĩ atumĩa ma kĩkundi. Atumĩa asu me na ũĩ mwingĩ na no methĩwe “ta vandũ va kwĩvitha kĩseve, na ta kwĩvitha kĩuutani, ta tũlũsĩ twa manzĩ vandũ vomũ, ta muunyĩ wa ĩvia ĩnene yĩ nthĩ yĩ mĩnoo.” (Isa. 32:2) Ũsu nĩ ũndũ mũseo ta kĩ! Nĩ mũvango ũtwonasya kana Yeova nũtwendete. Kwoou-ĩ, we waaĩsa kwona atumĩa nĩ kana makwĩkĩe vinya? Atumĩa nĩmatonya kũũkiakisya na makakwĩkĩa vinya nĩ kana ũendeee kũmĩĩsya.

Kũneena ũla w’o, atumĩa ti andũ mekaa syama. Asu nĩ andũ me na naĩ, na nĩ andũ ‘mailyĩ taitũ.’ (Meko 14:15) Ĩndĩ o na mailyĩ oou, mboya ila matonya kũvoya kwondũ witũ no itũtethye mũno. (Yak. 5:14, 15) Kwa ngelekany’o, ve mwana-a-asa ũmwe wĩ Italy wũmĩĩsye kwa myaka mingĩ ũwau mũthũku ũla ũmwonzetye malangũ (muscular dystrophy). Mwana-a-asa ũsu aĩtye ũũ ĩũlũ wa atumĩa: “Ana-a-asa asu nĩmambendete mũno na nĩmanthokeaa mavinda maingĩ, na kĩu nĩkĩtumĩte nũmĩĩsya.” We no wose ĩtambya ũkatũmĩa mũnango mũthĩnzĩo ũsu wa atumĩa Yeova ũtũnengete?

TŨNGA KĨLĨKO MAŨNDŨNĨ MA KĨ-VEVA

Ve maũndũ angĩ tũtonya kwĩka makatũtetheesya kũmĩĩsya. Ũmwe wa maũndũ asu nĩ kũtũnga kĩlĩko maũndũnĩ ma kĩ-veva. Kwoosa ngelekany’o ya mwana-a-asa wĩ na myaka 39 wĩtawa John. Ĩvinda yĩmwe eeiwe kana e na mũthemba mũna wa kanza ũtethĩawa na andũ aingĩ. John easya atĩĩ: “Noonaa ta ngũkengwa nũndũ naĩ mũnini mũno.” Ĩvinda yĩu mwanae aĩ na myaka o ĩtatũ. Easya: “Nũndũ wa ũu, kĩveti kyakwa nokyo kyaĩ kĩtonya kũea mwana witũ na kĩisyoka kĩnzũvĩe, na nokyo kyandũngaa sivitalĩ.” Ũiiti ũla John wanengawe (chemotherapy) wamũtiaa na mĩnoo mingĩ na ũitia wamũthokoany’a ĩvu nginya akambĩĩa kwĩw’a ngoo. Ĩndĩ mathĩna ma John mayaathelela vau. Ĩthe awaie weethĩa ndavĩta na nũndũ wa ũu nĩvendekaa mũndũ wa mũsyĩ amũsũvĩe.

John na andũ make meekie ata ĩvindanĩ yĩu yeetete ũu? John awetete atĩĩ: “O na kau nekalaa na mĩnoo, natataa ũndũ ndonya nyie na andũ makwa tũtũnge ilĩko sitũ maũndũnĩ ma kĩ-veva. Twaendaa maũmbanonĩ onthe, na kĩla kyumwa nĩtwatavanasya na tũkeka ũthaithi wa mũsyĩ, o na ĩla tũkwĩw’a vinya wa kwĩka ũu.” Ĩĩ nĩ w’o, John nĩwamanyie kana mũndũ enda kũmĩĩsya ĩtatwa o na yĩva no nginya atũnge kĩlĩko maũndũnĩ ma kĩ-veva. Na we John nĩwĩthĩwa na ũndũ ũtonya kũtavya mũndũ ũkwatĩtwe nĩ thĩna mũito? Ĩĩ, easya: “Kũtelema kũla kwingĩ kwathela, tũmesilya tũla tũtialaa tũminawa nĩ vinya ũla Yeova ũtũnengaa na wendo ũla ũtwonasya. Yeova nũtonya kũũnenga vinya, o tondũ ũnengete vinya.”

Tũi na nzika kana kwa vinya wa Ngai no tũmĩĩsye matatwa momũ kana o mathĩna maito, methĩwe matũkwatĩte ũmũnthĩ kana makatũkwata ũnĩ. Kwoou nĩtũendeee kũmũvoya Yeova atũtetheesye, na tũitata twĩthĩwe na ngwatanĩo nzeo vamwe na ana-a-asa ala angĩ kĩkundinĩ. O na ĩngĩ nĩtũtatei kwona atumĩa nĩ kana matwĩkĩe vinya, na tũitũnga ilĩko sitũ maũndũnĩ ma kĩ-veva. Tweeka maũndũ asu onthe tũkeethĩwa twaatĩĩa ndeto ii sya Vaulo: “Mwĩ na vata wa wũmĩĩsyo.”

^ kal. 2 Masyĩtwa amwe nĩ mavĩndũe.