Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 6 2015

“Ethĩwa Kingsley Nũtonya, o Nakwa Ndiemwa!”

“Ethĩwa Kingsley Nũtonya, o Nakwa Ndiemwa!”

ĨVINDA yĩmwe Kingsley nĩwaaĩwe kĩlungu kya kũsoma Mbivilia nthĩnĩ wa Sukulu ya Ũthũkũmi wa Kĩtheokulasi. Ũsu nĩw’o waĩ ũvoo wake wa mbee. E vau mbee, eeteelile nginya mũndũ amũtine kĩtuo nĩ kana ambĩĩe kũsoma. Atamũkie kĩla ndeto nesa ateũvĩtũũkany’a o na vanini. Ĩndĩ nĩwĩsĩ ũndũ? Ayumya ũvoo wake, ndaasisya Mbivilia. Nĩkĩ?

Kingsley aĩ mwana-a-asa wekalaa Sri Lanka, na ndoonaa nthĩ. O na ndeew’aa nthĩ nesa na aendaa na kasululu ka kũsukumwa. Ĩndĩ emanyĩisye ata ĩũlũ wa Yeova, na esie ata kũandĩkĩthw’a nthĩnĩ wa Sukulu ya Ũthũkũmi wa Kĩtheokulasi? Eka ngũelesye.

Ĩla nakomanie na Kingsley ya mbee, naseng’iw’e mũno nĩ wendi mwingĩ ũla waĩ naw’o wa kũmanya ũw’o ũla wĩ Mbivilianĩ. Nĩweemanyĩĩtye Mbivilia na Ngũsĩ ingĩ kauta, na ĩvuku yake ya Ujuzi Uongozao Kwenye Uhai Udumuo Milele, yĩla yaandĩkĩtwe na mũandĩko wa ala matonaa, yaĩ ĩtw’ĩkangu vyũ. * Nĩweetĩkĩlile nĩmũmanyĩsye Mbivilia, ĩndĩ vaĩ mathĩna elĩ.

Thĩna wa mbee, Kingsley ekalaa vala vasũvĩĩawa andũ akũũ na ala onzu. Nũndũ vandũ vau veethĩawa na kelele na Kingsley ndeew’aa nthĩ nesa, naĩ no nginya nalĩlĩke ĩla tũkwĩmanyĩsya. Naalĩlĩkaa ũkethĩa onthe vau nĩmekwĩw’a kĩla tũkwĩmanyĩsya kĩla kyumwa!

Thĩna wa kelĩ nĩ kana ĩla tũkwĩmanyĩsya, Kingsley aĩ atonya kũsoma na kũkwatya o kaĩndũ  kanini. Kwoou nĩ kana akwatye nesa, eeyũmbanasya nesa vyũ. Eekaa ũu kwa kũsoma ĩngĩ na ĩngĩ kĩla tũkwĩsa kwĩmanyĩsya, akasisya maandĩko Mbivilianĩ yake ya mũandĩko wa ala matonaa, na ĩndĩ aivanga kĩlĩkonĩ ũndũ ũkwĩsa kũsũngĩa makũlyo ala me ĩvukunĩ. Nzĩa ĩsu watũmĩaa yaĩ nzeo mũno. Ĩla tũkwĩmanyĩsya ekalaa nthĩ mũkekanĩ avĩlanĩtye maaũ, na ĩndĩ ew’ĩte mũyo mwingĩ aielesya na wasya mũtũlu kĩla wemanyĩsya, kavindanĩ kau o aendeee kũtinatina nthĩ. Ĩtina wa kavinda kanini, nĩtwambĩĩe kwĩmanyĩsya kelĩ kwa kyumwa, na kĩla ĩvinda tweemanyĩasya masaa elĩ!

ŨNDŨ WAVIKANGAA MAŨMBANONĨ NA ŨNDŨ WAAKAA ALA ANGĨ

Kingsley na Paul

Kingsley nĩwendaa kũthi maũmbanonĩ Nyũmbanĩ ya Ũsumbĩ, ĩndĩ kũvika vau kyaĩ kĩvalũa. Aĩ no nginya alĩsw’e kasululunĩ kake na ayĩsa kumw’a, na aisyoka alĩsw’e ngalĩnĩ na ayumw’a, na ĩndĩ ayĩsa kwambatw’a Nyũmbanĩ ya Ũsumbĩ. Ĩndĩ andũ aingĩ kĩkundinĩ nĩmaumanĩasya kũmũtetheesya, na nĩmatanĩaa mũno kwĩka ũu. Maũmbano maendeee, Kingsley athengeeasya kũtũ sivikanĩ nĩ kana ethukĩĩsye nesa. O na nĩwaumasya maelesyo!

Ĩtina wa Kingsley kwĩmanyĩsya kwa ĩvinda ĩna, nĩweeandĩkĩthisye nthĩnĩ wa Sukulu ya Ũthũkũmi wa Kĩtheokulasi. Syumwa ilĩ itiele nĩ kana athi akaumye ũvoo wake wa mbee wa kũsoma, nĩnamũkũlilye ethĩwa nĩwĩyũmbanĩtye. Anzũngĩie ate na nzika ambĩa, “Ĩĩ, Mwana-a-asa, nĩsomete mavinda ta 30.” Nĩnamũkathie nũndũ wa kĩthito kyake, na namwĩa nĩngwenda nĩmwĩthukĩĩsye aisoma. Nĩwavuie Mbivilia yake, atinĩĩsya syaa syake nthoonĩ sya kĩlungu kĩla waaĩwe, na ambĩĩa kũsoma. Ĩndĩ noonie syaa syake iteũvavata mathangũ ma ĩ Mbivilia ta tene. Nĩvo namanyie kaĩ eekĩĩte ndeto sya kĩlungu kĩu kyonthe kĩlĩkonĩ!

Namũsyaisye nĩseng’ete, methoi malovotete kũlovota. Nĩnamũkũlilye atonya kũlilikana nesa wĩana ũu ata, na asomete o mavinda 30. Nĩvo ĩndĩ wanzũngĩie, “Aiee, nĩnasomaa mavinda ta 30 kwa mũthenya.” Kingsley aminĩte mbee wa mwei mũima aisoma kĩtũngĩlĩĩlo kĩlungu kĩla waaĩwe, o ailyĩ ũla mũkekanĩ wake, nginya eekĩa ndeto syonthe kĩlĩkonĩ.

Na ĩndĩ mũthenya nĩwesie kũvika, na Kingsley aumya ũvoo wake Nyũmbanĩ ya Ũsumbĩ. Ĩla waminie, kĩkundi nĩkyakũnie mbĩ na mũyo mwingĩ mũno, o na andũ aingĩ nĩmaĩie moona ũndũ mũmanyĩw’a ũsu mweũ waĩ na kĩthito kĩana. Mũtavany’a ũmwe waĩ anaeka kumya maũvoo ma sukulu nũndũ wa wia nĩweeĩandĩkĩthisye ĩngĩ. Nĩkĩ? Aisye: “Ethĩwa Kingsley nũtonya, o nakwa ndiemwa!”

Kingsley emanyĩisye Mbivilia vandũ va myaka ĩtatũ, na ĩndĩ avatiswa Matukũ 6, Mwei wa 9, 2008, nĩ kana onany’e kana nĩwĩyumĩtye amũthũkũme Yeova. Kingsley aendeeie kwĩthĩwa e Ngũsĩ ndĩkĩĩku nginya ĩla wakwie kwĩ Matukũ 13, Mwei wa 5, 2014. Aikw’a nĩweesĩ kana akathayũũkw’a ekale Nthĩ Nzaũ, na ĩtina wa vau aiendeea kũmũthũkũma Yeova e na vinya mwingĩ na ate na thĩna o na ũmwe wa mwĩĩ. (Isa. 35:5, 6)—Ngewa ĩno ĩeleetw’e nĩ Paul McManus.

^ kal. 4 Ĩvuku yĩu yaumĩthiw’e mwaka wa 1995, ĩndĩ yu yĩitumbĩthaw’a.