Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 5 2015

Makũlyo Kuma kwa Asomi Maitũ

Makũlyo Kuma kwa Asomi Maitũ

Ngoki wa Makoki ũla ũwetetwe ĩvukunĩ ya Esekieli nũũ?

Maasya ũu nũndũ ĩvuku ya Ũvuan’yo yĩeleetye kana Satani, ũla nĩwe Ndevili, nĩwe mũtongoi wa ala makavithũkĩa andũ ma Ngai nthĩ yonthe. (Ũvu. 12:1-17) Kwoou tweesilasya kana Ngoki nĩ ĩsyĩtwa yĩngĩ Satani wĩtĩtwe nthĩnĩ wa wathani.

Ĩndĩ maelesyo asu mavuku maitũ maeleasya nĩmaumĩlilye makũlyo mana ma vata. Nĩkĩ? Kwasũanĩa ũndũ ũũ: Yeova eeie Ngoki atĩĩ aiweta ĩvinda yĩla ũ Ngoki ũkasindwa: “Ngakũnengane kwa nyũnyi mbai sya kĩla mũthemba, na kwa nyamũ sya kĩthekanĩ ũĩwe nĩsyo.” (Esek. 39:4) Na ĩndĩ Yeova ongela kwasya: “Na kũkethĩwa mũthenya ũsu, nganenga Ngoki vandũ va kũthika andũ nthĩ ya Isilaeli . . . Na ku nĩkw’o makenzĩa Ngoki nthĩ na wingĩ w’onthe wa andũ make.” (Esek. 39:11) Yu ĩkũlyo nĩ, Kyũmbe kya veva kĩtonya ata kũtw’ĩka lĩu kwa “nyũnyi mbai sya kĩla mũthemba, na kwa nyamũ sya kĩthekanĩ”? O na ĩngĩ, vatonyeka ata Satani akesa kũtwawa “vandũ va kũthika andũ” kũũ nthĩ? Lilikana Mbivilia yaĩtye nesa kana Satani akekw’a ĩimanĩ yĩte kĩtulu vandũ va myaka 1,000, ĩndĩ ti atĩ akaĩwa kana athikwe.—Ũvu. 20:1, 2.

Mbivilia yaĩtye kana ĩla myaka 1,000 yĩthela, Satani akathaw’a kuma yĩla ĩimanĩ yĩte kĩtulu, na kana “akauma akenge mbaĩ ila syĩ ikotonĩ inya sya nthĩ, Ngoki na Makoki, kũmomban’ya vamwe kaũnĩ.” (Ũvu. 20:8) Ĩndĩ ethĩwa Satani nĩwe ũ Ngoki, atonya kũkenga Ngoki ata? Kwoou, “Ngoki” ũla ũwetetwe ĩvukunĩ ya Esekieli na ya Ũvuan’yo ti Satani.

Kwoou-ĩ, we Ngoki wa Makoki nũũ? Nĩ kana tũkwate ũsũngĩo wa ĩkũlyo yĩu, twaĩle kũsisya Maandĩko nesa nĩ kana tũmanye nũũ ũla ũkavithũkĩa andũ ma Ngai. Mbivilia nĩwetete kana ve ĩvinda andũ ma Ngai makavithũkĩwa nĩ ‘Ngoki wa Makoki,’ mavithũkĩwe nĩ “mũsumbĩ wa ngalĩ ya ĩũlũ,” na “asumbĩ ma nthĩ.” (Esek. 38:2, 10-13; Nda. 11:40, 44, 45; Ũvu. 17:14; 19:19) Mo maandĩko asu meonany’a kana andũ ma Ngai makavithũkĩwa mavinda atatũ me kĩvathũkany’o? Ti lasima. Nĩvatonyeka ũkethĩa Mbivilia yĩkĩte kũtũmĩa masyĩtwa me kĩvathũkany’o ĩiweta ĩũlũ wa ĩvinda o yĩmwe yĩla andũ ma Ngai makavithũkĩwa. Nĩkĩ tũkwasya ũu? Nũndũ Maandĩko mawetete kana mbaĩ syonthe sya nthĩ ikooka vamwe ĩvinda yĩu nĩ kana ivithũkĩe andũ ma Ngai. Syamavithũkĩa nĩw’o kaũ wa Ali–Maketoni wĩambĩĩa.—Ũvu. 16:14, 16.

 Kũsũanĩa ĩũlũ wa maandĩko asu onthe mawetete kũvithũkĩwa kwa andũ ma Ngai nĩkũũtuma tũmanya kana Ngoki wa Makoki ti Satani, ĩndĩ nĩ mbaĩ ikethĩwa syĩ ngwatanĩo. Syo mbaĩ isu ikoka vamwe ikeethĩwa itongoew’e nĩ “mũsumbĩ wa ngalĩ ya ĩũlũ”? Tũyĩsa kwĩkinyĩa nthĩ tũkasya kana ũu nĩw’o vailyĩ. Ĩndĩ ũndũ ũsu nĩwosanĩte na ũndũ Yeova ũtavĩtye Ngoki. Amwĩĩte atĩĩ: ‘Ũkauma vandũ vaku kuma itulunĩ sya ngalĩ ya ĩũlũ, we, na ngo mbingĩ sya andũ vamwe naku, onthe makuĩtwe nĩ mbalasi nguthu nene na ita syĩ ũtonyi.’—Esek. 38:6, 15.

O ta ũu, mwathani Ndanieli, ũla waĩ kw’o ĩvinda ya Esekieli, aĩtye ũũ ĩũlũ wa mũsumbĩ wa ngalĩ ya ĩũlũ: “Maũvoo ala makauma wumĩlonĩ wa syũa na ala makauma ngalĩ ya ĩũlũ nĩmakamũthĩn’ya; nake nũkauma athi na ũthilĩku mũnene kwananga na kũmaveta vyũ aingĩ. Na nũkamba maeema ma nyũmba yake nene mbanakavye katĩ wa ũkanga na kĩla kĩĩma kĩseo kĩtheu; ĩndĩ nũkavika mũminũkĩlyo wake, na vati ũmwe ũkamũtethya.” (Nda. 11:44, 45) Maũndũ asu mawetetwe nĩmosanĩte vyũ na kĩla ĩvuku ya Esekieli yĩwetete ĩũlũ wa maũndũ ala Ngoki ũkeka.—Esek. 38:8-12, 16.

Nĩ kyaũ kĩkaatĩĩa ĩtina wa andũ ma Ngai kũvithũkĩwa? Ndanieli aĩtye atĩĩ: “Na ĩvinda yĩu Mikaeli [Yesũ Klĩsto] nũkaũngama [ĩvinda ya Ali–Maketoni], ũla mũnene wĩ mbee mũno ũsumbĩnĩ ũla ũũngamaa [kuma 1914] kwondũ wa ana ma andũ maku; na nĩkũkethĩwa ĩvinda ya thĩna [ũla thĩna mũnene], o tondũ ũtaaĩthĩwa kuma kweethĩwa mbaĩ kũvika ĩvinda o yĩu: Na ĩvinda yĩu, andũ maku nĩmakatangĩĩwa, kĩla ũmwe ũkoneka aandĩkĩtwe ĩvukunĩ.” (Nda. 12:1) Ũndũ ũsu Yesũ ũkeka atũmĩtwe nĩ Ngai nũsyokete ũkaelew’a ĩandĩkonĩ ya Ũvuan’yo 19:11-21.

Ĩndĩ nũũ ũla wĩtĩtwe “Ngoki na Makoki” ĩandĩkonĩ ya Ũvuan’yo 20:8? Ĩvinda yĩla andũ makethĩwa maitatwa ya mũthya ĩtina wa ĩla myaka 1,000, ala makaleana na Yeova makeethĩwa na veva wa ũaani ta ũla wa ila mbaĩ ikethĩwa inavithũkĩa andũ ma Ngai mũthyanĩ wa ũla thĩna mũnene, ila nĩsyo ‘Ngoki wa Makoki.’ Asu makavithũkĩa andũ ma Ngai mũthyanĩ wa ũla thĩna mũnene vamwe na ala makaleana na Yeova ĩvinda ya yĩla ĩtatwa ya mũthya makakwatwa no ũndũ ũmwe, naw’o nĩ kĩkw’ũ kya tene na tene! (Ũvu. 19:20, 21; 20:9) Kwoou, nĩ ũndũ waĩle kwasya kana “Ngoki na Makoki” nĩ andũ ala makaleana na Yeova mũthyanĩ wa ĩla Myaka Ngili.

Nũndũ ithyĩ nĩtwĩmanyĩasya Ndeto ya Ngai nesa vyũ, nĩtweteele na mea mũno twone o mĩtũkĩ nũũ ũla ũkatw’ĩka “mũsumbĩ wa ngalĩ ya ĩũlũ.” Ĩndĩ o na ethĩwa nũũ ũkatongoesya mbaĩ isu ikosana ivithũkĩe andũ ma Ngai, ve maũndũ elĩ ithyĩ tũte na nzika namo: (1) Ngoki wa Makoki vamwe na ita syake makasindwa na mayanangwa; na (2) Mũsumbĩ witũ, Yesũ Klĩsto, ũla ũsumbĩkĩte yu, akatangĩĩa andũ ma Ngai, na aimalikya nthĩ nzaũ vala andũ makekala na mũuo na me asũvĩĩku.—Ũvu. 7:14-17.