Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

Ũũ “Nĩw’o Wendeesye Kwaku”

Ũũ “Nĩw’o Wendeesye Kwaku”

Maũndũ asu nĩwamavithie andũ oĩ na ala me na ũmanyi, na wavuanĩsye twana tũnini.”LUKA 10:21.

1. Nĩ kyaũ kyatumie Yesũ “atana nthĩnĩ wa Veva Mũtheu”? (Sisya visa ĩthangũnĩ yĩĩ.)

KWA kũna visa Yesũ Klĩsto ‘atanĩte nthĩnĩ wa veva mũtheu.’ No kwĩthĩwa wasũanĩa aitheka na metho make mayonany’a ũtanu ũla waĩ naw’o. Kyo nĩ kyaũ kyatumie ethĩwa na ũtanu ũsu? Eethĩĩtwe atũmĩte amanyĩw’a 70 katĩ wa ala waĩ namo mathi makatavany’e ũvoo mũseo wa Ũsumbĩ wa Ngai. Aimatũma nĩwendaa kwĩsa kwona ũndũ mekwĩanĩsya wĩa ũsu. Nĩkĩ? Nũndũ ĩvinda yĩu kwaĩ na amaitha aingĩ na me vinya ma ũvoo mũseo. Amwe mamo maĩ aandĩki na Avalisi na maĩ asomu mũno na maĩ maũĩ. Nĩmatumie andũ aingĩ mavũthya Yesũ nũndũ mamwonaa e o vundi wa mbwaũ. O na nĩmavũthĩtye amanyĩw’a make nũndũ mamonaa ta andũ “matamanyĩĩtw’e, na mate na ũmanyi.” (Meko 4:13; Mko. 6:3) Ĩndĩ amanyĩw’a asu masyokie me atanu mũno. Nĩmatavanĩtye o na kau mavĩngĩtwe nginya makavĩngwa nĩ ndaimoni! Nĩ kyaũ kyatumie methĩwa me atanu na me na ũkũmbaũ?—Soma Luka 10:1, 17-21.

2. (a) Nĩ kwa nzĩa syĩva amanyĩw’a ma Yesũ mailyĩ ta syana? (b) Nĩ kyaũ kyatetheeisye aatĩĩi ma Klĩsto makwatye ũw’o ũla wĩ Mbivilianĩ?

2 Yesũ atavisye Yeova atĩĩ: “Nĩngũũtũngĩa mũvea, we Asa, Mwĩaĩi wa ĩtu na nthĩ, nĩkwĩthĩwa maũndũ asu nĩwamavithie ala me na ũĩ na ũmanyi, na watũvuanisye twana: ĩĩ, Asa, nĩkwĩthĩwa nĩw’o wendeesye kwaku.” (Mt. 11:25, 26) Ũu ti kwasya kana Yesũ  oonanasya amanyĩw’a make maĩ o syana. Vandũ va ũu nĩweesĩ kana moonekaa mailyĩ syana maelekanw’a na andũ ala maĩ na ũmanyi na asomu na meeyonaa me oĩ mũno. Ĩndĩ o na eka kyu, Yesũ nĩweeĩte amanyĩw’a make methĩwe andũ menyivĩtye na matonya kũmanyĩw’a ta syana nini. (Mt. 18:1-4) Matethekie ata nũndũ wa kwĩthĩwa menyivĩtye? Yeova nĩwamatetheeisye na veva mũtheu nĩ kana maelewe ũw’o ũla wĩ Mbivilianĩ, namo ala meeyonaa me oĩ na mamathekeeaa matiiwe kĩvindunĩ nũndũ wa ngũlũ syoo, na nũndũ matongoew’e nĩ Satani.

3. Twĩneenea kyaũ ĩsomonĩ yĩĩ?

3 Kwoou tũyaĩle kũsaanĩw’a ĩla twasoma kana Yesũ aĩ mũtanu. Eewie mũyo nũndũ wa kwona ũndũ Yeova wavuanisye momanyĩsyo maito ma Mbivilia kwa andũ ma mĩthemba yonthe ala maĩ na wĩnyivyo, ateũsisya kĩsomo kyoo kana inengo syoo. Nĩweewie mũyo nũndũ Ĩthe wake nĩwendeeaw’a nĩ nzĩa ĩsu ya kũmanyĩsya. We Yeova nĩwaalyũkile, na onanasya ata kana o na yu nĩwendeeaw’a nĩ nzĩa ĩsu ya kũmanyĩsya? Ũsũngĩo wa makũlyo asu nũtonya kũtuma o naitũ tũtana o tondũ Yesũ watanie.

KŨTETHEESYA KĨLA MŨNDŨ AELEWE NĨ MOMANYĨSYO MAITO

4. Nĩ kwa nzĩa syĩva ĩkaseti ya Mũsyaĩĩsya yĩla yĩ na kĩthyomo kĩ laisi yĩthĩĩtwe yĩilyĩ ta mũthĩnzĩo?

4 Myakanĩ ya mĩtũkĩ ũseũvyo wa Yeova wĩthĩĩtwe ũitũmanyĩsya mũno mũno kwa nzĩa yĩ laisi na ĩkũeleeka. Kwasũanĩa maũndũ aa atatũ. Ũndũ wa mbee nĩ kwambĩĩa kũtumbĩthw’a kwa ĩkaseti ya Mũsyaĩĩsya yĩ na kĩthyomo kĩ laisi. * Ĩkaseti yĩu yĩthĩĩtwe ta mũthĩnzĩo kwa ala matesĩ kĩthyomo kĩna nesa na ala matesĩ kũkĩsoma nesa. Andũ ala me mĩsyĩ nĩmesĩte kwĩthĩa kana syana syoo nieleawa ĩkaseti yĩu nesa. Na ũsu nĩ ũndũ wa vata mũno nũndũ ĩkaseti ya Mũsyaĩĩsya nĩyo nzĩa ĩla nene ya kũtũĩthya kĩ-veva. O na aingĩ nĩmaandĩkĩte valũa maitũnga mũvea kuma ngoonĩ nũndũ wa ĩkaseti yĩu yĩ na kĩthyomo kĩ laisi. Mwĩĩtu-a-asa ũmwe aandĩkie kana we nĩwaemawa nĩ kumya maelesyo ĩvinda ya Ĩsomo ya Mũsyaĩĩsya. Aisye, “Nekalaa vau o ta ĩvisa.” Ĩndĩ yu ti ta tene! Ĩla wambĩĩe kũsoma ĩkaseti yĩla yĩ na kĩthyomo kĩ laisi aandĩkie ũũ: “Yu nĩnumasya maelesyo mavinda maingĩ, o na ndyĩw’aa ndikĩa! Nĩngũmũtũngĩa Yeova mũvea vamwe nenyu.”

5. Nĩ moseo amwe meva me nthĩnĩ wa Biblia Takatifu—Tafsiri ya Ulimwengu Mpya ĩla yĩkĩtwe moalyũku?

5 Ũndũ wa kelĩ nĩ kumĩthw’a kwa Biblia Takatifu—Tafsiri ya Ulimwengu Mpya kwa kĩthyomo kya Kĩsũngũ. Mbivilia ĩsu yĩkĩtwe moalyũku yaumiw’e Matukũ 5, Mwei wa 10, 2013. * Maandĩko maingĩ Mbivilianĩ ĩsu me na ndeto nini ĩndĩ nieleetye maũndũ nesa na kwa nzĩa yĩ laisi. Kwa ngelekany’o, ĩandĩko ya Yovu 10:1 tene yĩnaĩ na ndeto 27 ĩndĩ yu yĩnatheeie nginya ndeto 19, nayo ĩandĩko ya Nthimo 8:6 yĩnaĩ na ndeto 20 ĩndĩ yu yĩnatheeie nginya ndeto 13. Mĩsoa ĩsu yelĩ nĩeleekaa nesanga Mbivilianĩ ĩsu nzaũ. O na mwana-a-asa ũmwe mwĩtĩkĩw’a mauta wĩthĩĩtwe e mũĩkĩĩku kwa myaka mingĩ anaisye ũũ: “Nĩnasomie ĩvuku ya Yovu Mbivilianĩ ĩla nzaũ na nĩneew’a ta ĩndĩ nayĩelewa ĩvinda ya mbee!” Andũ aingĩ nĩmaĩtye take.

6. We wĩw’aa ata nũndũ wa kũelewa nesanga ĩandĩko ya Mathayo 24:45-47?

6 Ũndũ wa katatũ, kwasũanĩa ũndũ ũmanyi witũ ũendeee kũkenũka. Kwa ngelekany’o,  nĩtwatanie mũno ĩla ĩkaseti ya Mũsyaĩĩsya ya 01/07/2013 yatũeleisye nesanga ĩũlũ wa ĩla “ngombo yĩ na kĩthito na mbũĩ.” (Mt. 24:45-47) Ĩkaseti yĩu yaeleisye kana ngombo yĩ na kĩthito nĩyo Nzama Ĩla Ĩtongoesye, namo ala ma “nyũmba [ya vwana]” nĩ onthe ala maĩthaw’a kĩ-veva, methĩwe nĩ etĩkĩw’a mauta kana nĩ “malondu angĩ.” (Yoa. 10:16) Twĩw’aa mũyo ta kĩ ĩla twamanyĩw’a maũndũ ta asu na twasyoka twamamanyĩsya ala eũ! Ve maũndũ angĩ mekwonany’a kana Yeova nĩwendeeaw’a nĩ nzĩa ya kũmanyĩsya ĩla yĩ laisi na ĩkũeleeka?

KŨELESYA NGEWA SYA MBIVILIA KWA NZĨA YĨ LAISI NA ĨKŨELEEKA

7, 8. Nengane ngelekany’o sya ngewa imwe syĩ Mbivilianĩ itonya kũelew’a ta wathani.

7 Ethwa wĩthĩĩtwe ũimũthũkũma Yeova kwa myaka mingĩ, no kwĩthwa wonete ũndũ kũendeee kwĩthĩwa na ũalyũku ĩũlũ wa ũndũ mavuku maitũ maeleasya ngewa mbingĩ ila syĩ Mbivilianĩ. Ũalyũku wĩva? Navu ĩtina mavuku maitũ moosaa ngewa yĩ Mbivilianĩ makamĩsianĩsya na ũndũ mũna wesie kwĩkĩka kana ũkesa kwĩkĩka na maisisya ũndũ ngewa ĩsu na ũndũ ũsu syosanĩte. Ngewa ĩsu ya Mbivilia yatalawa tayo kyuu kana wathani, naw’o ũndũ ũsu ũitalwa taw’o kĩla kya w’o. Mo Maandĩko nĩmatũnengete kĩtumi kya kũelesya ngewa sya Mbivilia kwa nzĩa ĩsu? Ĩĩ. Kwa ngelekany’o, Yesũ nĩwawetie ĩũlũ wa “kyama kya mwathani Yona.” (Soma Mathayo 12:39, 40.) Aeleisye kana ngewa ya Yona ĩla waĩ ĩvunĩ ya ĩkũyũ yaĩ wathani wa ũndũ we mwene ũkekala mbũanĩ, o ũndũ yĩla ĩvu ya ĩkũyũ yĩthĩwa yatw’ĩkie mbũa ya Yona ta keka Yeova ndaamũsũvĩa ndakakw’e.

8 Mbivilia yĩ na ngewa ingĩ mbeveee itonya kũelew’a ta wathani. Mũtũmwa Vaulo nĩwawetie imwe syasyo. Kwa ngelekany’o, mũamba ũla waĩ vo katĩ wa Avalaamu, Akali, na Sala no ũelew’e ta wathani ũkwonany’a mũamba ũla waĩ vo katĩ wa Yeova na mbaĩ ya Isilaeli, na ũla wĩ vo yu katĩ wa Yeova na kĩlungu kya ũseũvyo wake kya ĩtunĩ. (Aka. 4:22-26) O ta ũu, maũndũ ta yĩla ĩeema na ĩkalũ, Mũthenya wa Wĩw’anĩthyo, mũthembi mũnene, na maũndũ angĩ makonetye ĩla Mĩao ya Mose maĩ “kyuu kya syĩndũ nzeo ila ikoka.” (Aevl. 9:23-25; 10:1) Ĩla tweemanyĩsya ngewa ta isu sya Mbivilia, nĩtwĩw’aa twaakwa mũĩkĩĩo na tũisyenda mũno. Ĩndĩ ũu nĩ kwasya kana kĩla mũndũ ũwetetwe Mbivilianĩ, kana o kĩndũ o na kĩva kĩwetetwe vamwe na maũndũ onthe ala maaĩkĩka, nĩ wathani ũkonetye mũndũ mũna kana kĩndũ kĩna?

9. Tene mavuku maitũ maeleasya ata ngewa ya Navothi?

9 Tene ũu nĩw’o mavuku maitũ makothaa kũelesya ngewa sya Mbivilia. Kwasũanĩa ngelekany’o ya Navothi. Yeseveli, ũla waĩ mũka wa Mũsumbĩ Aavu na mũndũ mũka mwathe, nĩweekie mĩvango Navothi asikatwe mana na ayũawa vate kĩtumi nĩ kana mũũme ose mũũnda wake wa mĩsavivũ. (1 Asu. 21:1-16) Mwakanĩ wa 1932, ngewa ĩsu ya Navothi yaeleiw’e ta wathani. Kwatw’ĩkie Aavu na Yeseveli maelekanĩtye Satani na ũseũvyo wake, nake Navothi aelekanasya Yesũ, na ĩndĩ nakyo kĩkw’ũ kya Navothi kyaĩ wonany’o wa kĩkw’ũ kya Yesũ. Ĩndĩ ĩtina wa myaka ĩana ũndũ mũna, ĩvuku “Let Your Name Be Sanctified,” yĩla yaumĩthiw’e mwaka wa 1961, yaelekanilye Navothi na etĩkĩw’a mauta, na yaelekany’a Yeseveli na ndĩni ila syĩyĩtaa sya Kĩklĩsto. Kwoou kwosana na ĩvuku yĩu, kũthĩnw’a kwa Navothi nĩ Yeseveli kwaelekanilw’e na kũthĩnw’a kwa etĩkĩw’a mauta mĩthenyanĩ ya mũminũkĩlyo. Kwa myaka mingĩ andũ ma Ngai moonaa nzĩa ĩsu ya kũelesya ngewa sya Mbivilia ĩyaka mũĩkĩĩo. Nĩkĩ ĩndĩ kwĩthĩĩtwe na ũalyũku?

10. (a) Ngombo yĩ na kĩthito ĩtũmĩaa ũĩ ata ĩla ĩkũelesya ngewa imwe syĩ Mbivilianĩ? (b) Matukũ aa mavuku maitũ makothete kũelesya ngewa ata?

 10 O ũndũ myaka ĩvĩtĩte, now’o Yeova ũtetheetye ĩla “ngombo yĩ na kĩthito na mbũĩ” ĩendeee kũĩva. Nũndũ wa ũĩ ũsu, yĩthĩawa yĩsũvĩĩte mũno yatw’a kũelesya ngewa yĩ Mbivilianĩ ndĩkamĩelesye ta wathani vate na kĩtumi kĩseo kya Maandĩko. O na ĩngĩ, nĩvesĩte kũmanyĩka kana andũ aingĩ maieleawa nesa ngewa sya Mbivilia syaelew’a tondũ syaeleaw’a tene. Maũndũ ta nũũ ũelekanĩtye ũũ na nĩkĩ, nĩmatonya kũlanĩlya andũ, na me vinya kũlilikanwa kana kũtũmĩwa. Na ĩndĩ thĩna ũla mũnene vyũ nĩ kana, kũmanthĩthya wathani ngewanĩ sya Mbivilia nĩkũtonya kũtuma andũ matakwatya nesa ũndũ matonya kũtũmĩa ũvoo ũla wĩ ngewanĩ ĩsu, kana ũyĩthĩa kĩla mũndũ ũtonya kũsoma vau kĩkamũtethya thayũnĩ wake nĩkyaa vyũ. Nĩkyo kĩtumi ũmũnthĩ mavuku maitũ mũno mũno maeleasya ngewa sya Mbivilia kwa nzĩa yĩ laisi vyũ. Nũndũ wa ũu nĩtũeleawa nĩ kĩla tũtonya kwĩmanyĩsya ngewanĩ ĩsu kĩkaka mũĩkĩĩo witũ, kĩkatũtetheesya twĩthĩwe na wũmĩĩsyo, twĩyumye vyũ tũmũthũkũme Ngai, na tũielewa maũndũ angĩ ma vata. *

Ngelekany’o ya Navothi ĩtũmanyĩasya ũndũ wa vata mũno (Sisya kalungu ka 11)

11. (a) Yu tũeleawa ata ngewa ya Navothi, na nĩkĩ ngewa yake nĩtũkonetye? (b) Nĩkĩ matukũ aa mavuku maitũ maikothete kũelesya ngewa sya Mbivilia ta syuu? (Sisya “Makũlyo Kuma kwa Asomi Maitũ” ĩkasetinĩ yĩĩ.)

11 Kwoou yu tũeleawa ata ngewa ya Navothi? Tũmĩeleawa nesanga na kwa nzĩa yĩ laisangi. We ndaakw’a nĩ kana ngewa yake yĩĩsa kwoswa ta wathani ũkonetye Yesũ kana etĩkĩw’a mauta, ĩndĩ akwie nũndũ aĩ mũĩkĩĩku nginya ndatĩka ya mũthya. Alũmanisye na Mĩao ya Yeova o na ĩla anene mamũthĩnisye naĩ mũno vate ũndũ wĩkĩte. (Mot. 36:7; 1 Asu. 21:3) Nũndũ wa ũu, ngelekany’o yake nĩtũkonetye vyũ nĩkwĩthĩwa kĩla ũmwe witũ no athĩnw’e nũndũ wa kũlũmany’a na mĩao ya Yeova. (Soma 2 Timotheo 3:12.) Ti ũndũ wĩ vinya kwa Aklĩsto onthe kũkwatya mĩtũkĩ, kũlilikana, na kũtũmĩa ĩsomo ta yĩu yĩtonya kũlũlũmĩlya mũĩkĩĩo woo.

12. (a) Nata tũtaĩle kũtw’a ĩũlũ wa ngewa ila syĩ Mbivilianĩ? (b) Nĩkĩ no tũelewe o na maũndũ ala maito? (Sisya maelesyo ma kwongeleela.)

12 Ĩkũlyo nĩ, Maũndũ asu no matume twasya  kana ngewa sya Mbivilia ieleasya o ũndũ tũtonya kwĩkala na vai ũndũ ũngĩ mbee wa vau? Aiee. Ũmũnthĩ mavuku maitũ mũno mũno nĩmatonya kũtũmanyĩsya ũndũ ngewa ĩmwe ĩkũtũlilikany’a ĩũlũ wa ĩngĩ, kana makamĩtũmĩa ta ngelekany’o ya ũndũ mũna. Ĩndĩ ti laisi ũkethĩa maielesya ngewa mbingĩ sya Mbivilia ta wathani na ũyĩthĩa atĩ vai ũndũ ũngĩ ielew’a. Kwa ngelekany’o, no twasye kana ngewa ya Navothi ĩtũlilikanasya ĩũlũ wa ũĩkĩĩku wa Klĩsto na wa etĩkĩw’a mauta nũndũ ekalile e mũĩkĩĩku nginya ndatĩka ya mũthya o na kau nĩwathĩnaw’a. Ĩndĩ ngewa ĩsu ya Navothi no ĩtũlilikanasya ũĩkĩĩku wa ala “malondu angĩ” ma Mwĩaĩi. Ngai endete nzĩa ta ĩsu yĩ laisi na ĩkũeleeka ya kũmanyĩsya. *

KŨELESYA NGELEKANY’O SYA YESŨ KWA NZĨA YĨ LAISANGI

13. Nĩ maũndũ meva mekwonany’a kana matukũ aa tũeleasya ngelekany’o sya Yesũ kwa nzĩa yĩ laisi na ĩkũeleeka nesa?

13 Yesũ Klĩsto nĩwe Mwalimũ ũla mũnene waaĩkala kũũ nthĩ. Nĩwendete mũno kũtũmĩa ngelekany’o aimanyĩsya andũ. (Mt. 13:34) Ngelekany’o itumaa mũndũ akũna visa kĩlĩkonĩ na kyu kĩituma kĩlĩko kyake kyambĩĩa kũthũkũma. Nũndũ wa ũu kĩla wemanyĩsya nĩkĩkiitaa ngoo yake. Mo mavuku maitũ nĩmethĩwa matinĩte kũelesya ngelekany’o sya Yesũ kwa nzĩa yĩ laisi na ĩkũeleeka? Ũsũngĩo nĩ ĩĩ! Kwa ngelekany’o, tyo tweewie mũyo ĩla ĩkaseti ya Mũsyaĩĩsya (Kĩswaili) ya 15/07/2008 yatũeleisye nesanga ngelekany’o ya Yesũ ya ĩlawa, ya mbeke ya kalatali, na ya kĩtei kya makũyũ? Yu nĩtũeleetwe nesa kana ngelekany’o isu ikonetye Ũsumbĩ wa Ngai na ũndũ ũtetheetye andũ aingĩ ki maumanwe na nthĩ ĩĩ nthũku na maitw’ĩka aatĩĩi ma w’o ma Klĩsto.

14. (a) Tene tũnaeleasya ata ĩla ngelekany’o ya Mũsamalia mũseo? (b) Ngelekany’o ĩsu tũmĩeleawa ata matukũ aa?

14 Nao nata ngelekany’o imwe sya Yesũ ila syĩ na ũvoo mwingĩ? Imwe syasyo syĩ na ũvoo wĩvithanĩtye na no ielew’e ta wathani, nasyo ingĩ iwetete maũndũ tũtonya kũtũmĩa. Thĩna nĩ, tũtonya kũivathũkany’a ata? O ũndũ myaka ĩvĩtĩte, now’o tũmanyĩte ũndũ tũtonya kũivathũkany’a. Kwasũanĩa ũndũ tene tũnaeleasya ngelekany’o ya Yesũ ya ũla Mũsamalia mũseo. (Luka 10:30-37) Mwakanĩ wa 1924, ĩkaseti ya The Watch Tower yaisye kana Mũsamalia ũsu nĩ Yesũ, naw’o lelũ ũla waumĩte Yelusaleme ũtheeete Yeliko no ũndũ ũmwe na ũndũ mũndũ ũendeee naĩ kuma ĩla waleile kũmwĩw’a Ngai e mũũndanĩ wa Eteni. Ing’ei ila syaĩ lelũnĩ ũsu nasyo syaelekanilw’e na maviasala manene na atandĩthya me ĩtomo, nake mũthembi na Mũlivai matw’ĩka nĩ ndĩni ila syĩyĩtaa sya Kĩklĩsto. Ĩndĩ matukũ aa mavuku maitũ matũmĩaa ngelekany’o ĩsu kũlilikany’a Aklĩsto onthe kana mayaĩle kwĩthĩwa na kyende ĩla meũtetheesya ala me na vata, na mũno mũno maũndũnĩ ma kĩ-veva. Mwa tyo nginya twĩthĩwe tũtanaa mũno ĩla twoona Yeova aitũmanyĩsya kwa nzĩa tũtonya kũelewa?

15. Ĩsomo yĩla yĩatĩĩe yĩneeneete kyaũ?

15 Ĩsomo yĩla yĩatĩĩe nĩyĩeleetye ngelekany’o ĩngĩ ya Yesũ, nayo nĩ ĩla ya eĩtu ĩkũmi. (Mt. 25:1-13) Yesũ endaa aatĩĩi make ma ĩvinda ya mũminũkĩlyo maelewe ata ngelekany’o ĩsu yĩ na ũvoo wa vata? We nĩwĩthĩwa endaa maelewe kana kĩla mũndũ ũwetetwe vau, kana syĩndũ, kana maũndũ ala meekĩkie ĩ ngewanĩ nĩ wathani wĩ na ũvoo wĩvithanĩtye? Kana endaa ngelekany’o ĩsu ĩmamanyĩsye ũndũ matonya kwĩkala mĩthenyanĩ ya mũminũkĩlyo? No tũũmanya.

^ kal. 4 Ĩkaseti yĩla yĩ na kĩthyomo kĩ laisi yambĩĩe kumĩthw’a kwa kĩthyomo kya Kĩsũngũ Mwei wa 7, 2011. Kuma ĩvinda yĩu, ĩkaseti yĩu yĩ na kĩthyomo kĩ laisi nĩyumĩthĩtw’e kwa ithyomo ingĩ ite mbingĩ.

^ kal. 5 Mĩvango nĩendeee kwĩkwa nĩ kana Mbivilia ĩsu yĩkĩtwe moalyũku yumĩthw’e kwa ithyomo ingĩ.

^ kal. 10 Kwa ngelekany’o, ĩvuku Igeni Imani Yao nĩyĩeleetye mũno ĩũlũ wa andũ 14 mawetetwe Mbivilianĩ. Ĩndĩ vandũ va kũelesya ngewa syoo ta wathani, yĩeleetye mũno mũno ũndũ tũtonya kũatĩĩa ngelekany’o syoo.

^ kal. 12 Vate nzika, Ndeto ya Ngai nĩyĩthĩawa na maũndũ matonya kwoneka “me vinya kũmanya,” ta amwe maandĩkiwe nĩ Vaulo. O na ũu wĩ o vo, onthe ala maandĩkie Mbivilia manengetwe veva mũtheu. Veva ũsu now’o ũtetheeasya Aklĩsto ma w’o ũmũnthĩ maelewe ũw’o ũla wĩ Mbivilianĩ, o na “maũndũ maliku ma Ngai.”—2 Vet. 3:16, 17; 1 Ako. 2:10.