Nũũlilikana ĩvinda wavalũkile wĩ kana kanini? Nĩvatonyeka ũkethĩa waũmĩie kw’oko kana mau. Nũlilikene ũndũ inyia waku waũkiakiisye waũmĩa? No kwĩthĩwa athambisye vala vaĩ kĩtau na akwova. O na kau nĩwaĩie, nĩweewie nesa ĩla inyia waku waũtavisye ndeto nzeo na aũkumbatĩa. Waĩ ũndũ wĩ laisi mũno kũkwata ũkiakisyo ĩvindanĩ yĩu waĩ mũnini.

Ĩndĩ o ũndũ tũendeee na kũkũa, now’o maũndũ maendeeaa kwĩthĩwa me momũ. Mathĩna maendeeaa na kwingĩva na ũyĩthĩa nĩ vinya kũkwata ũkiakisyo. Na ũndũ wa kũmakya nĩ kana o na kau asyai maitũ no matũkumbatĩe ĩla twakwatwa nĩ mathĩna, nĩ vinya kũmina mathĩna asu. Kwasũanĩa ngelekany’o ii.

  • Ĩla mũndũ wavutwa wĩa, aũmĩaa mũno. Kwa ngelekany’o, Julian aĩtye kana ĩla wavutiwe, akwatiwe nĩ kĩmako kingĩ mũno. Eekũlasya-ĩ, ‘Ngasũvĩaa andũ makwa ata? Ĩtina wa kũthũkũmana na kambunĩ ĩsu ĩvinda yĩasavĩte ũu, monie ndesa kũmatethya?’

  • Nĩvatonyeka ũkethĩwa wĩ na kĩmako nũndũ mũtwaano waku nũnaanangĩkie. Mũndũ mũka wĩtawa Raquel aĩtye atĩĩ: “Naĩ na kĩmako kingĩ mũno vyũ ĩla natiiwe nĩ mũemewa myei 18 mĩvĩtu. Neew’aa ngoo yakwa ta ĩtilanĩtw’e ilungu ilĩ.” Aendeee na kwasya atĩĩ: “Woo ũla naĩ naw’o waĩ mwingĩ mũno vyũ, o na nĩwatumaa nĩtelema.”

  • O na nĩvatonyeka ũkethĩwa ũwaĩte mũno na wonaa ũwau ũsu ta ũtesa kũvoa. No vethĩwe ve mavinda wĩw’aa o tondũ Yovu weew’aa ĩla waisye atĩĩ: “Nĩngũthĩtha thayũ wakwa; ndikwenda kwĩkala thayũ ĩndĩ yonthe.” (Yovu 7:16) O na nĩvatonyeka ũkethĩwa wĩw’aa ta mũndũũme wĩtawa Luis, ũla wĩ na myaka 80 na kĩndũ. Aĩtye atĩĩ: “Ve mavinda amwe nĩw’aa naĩle o kũkw’a.”

  • Kana no wĩthĩwe wendaa kũkiakiw’a nũndũ nĩwakw’ĩĩwe nĩ mũndũ wendete. Mũndũũme wĩtawa Robert aĩtye atĩĩ: “Ĩla mwanawa wakw’ĩĩe ndekenĩ ĩla yavalũkile, ya mbee ndyaĩkĩĩaa. Ĩtina wa ĩvinda neewie naũmĩa mũno ngoonĩ. Woo ta ũsu neewie ũelekanĩtw’e Mbivilianĩ na ũvyũ ũkũtonya ngoo.”—Luka 2:35.

Robert, Luis, Raquel, na Julian nĩmakwatie ũkiakisyo, o na kau nĩmakwatĩtwe nĩ maũndũ maito mũno. Nĩmakwatie ũkiakisyo kuma kwa Ngai Mwene Vinya W’onthe, ũla nĩwe ũtonya kũtũkiakisya nesa kwĩ mũndũ o na wĩva. Atũkiakiasya ata? We no aũkiakisye ũndũ wakiakiisye andũ asu twoona?