Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Na. 5 2016

 KYONGO KYA ĨTHANGŨ YA MBEE | NĨ VA ŨTONYA KŨKWATA ŨKIAKISYO?

Ũndũ Tũtonya Kũkwata Ũkiakisyo Ĩla twĩ na Thĩna

Ũndũ Tũtonya Kũkwata Ũkiakisyo Ĩla twĩ na Thĩna

Andũ makwatawa nĩ mathĩna me kĩvathũkany’o. Ũw’o nĩ kana tũyĩsa kũelesya mathĩna onthe ala makwataa andũ nthĩnĩ wa kĩlungu kĩĩ, ĩndĩ ekai tũneenee kwa ũliku ngelekany’o inya ila tũwetie mwambĩĩonĩ wa ĩkaseti yĩĩ. Sisya wone ũndũ andũ amwe makwatĩtwe nĩ mathĩna me kĩvathũkany’o, na ũndũ Ngai wamakiakiisye.

ĨLA WAVUTWA KANA WAMANTHA WĨA WAA

“Nĩneemanyĩisye kana ndyaĩle kũsakũaa wĩa, na nĩtwaekie kũthooa syĩndũ ite sya lasima.”—Jonathan

Mũndũũme wĩtawa Seth * aĩtye atĩĩ: “Nĩ na kĩveti kyakwa nĩtwavutiwe wĩa ĩvinda yĩmwe.” Ongeleele kwasya atĩĩ: “Kwa myaka ĩlĩ, twatetheeaw’a nĩ andũ ala angĩ na kũthũkũma ivalũa. Na nũndũ wa mathĩna asu, kĩveti kyakwa Priscilla, nĩkyakwatiwe nĩ kĩmako kingĩ mũno na kyeew’aa kĩkw’ĩte ngoo vyũ, nakwa naĩ neemenie vyũ.”

“Nĩ kyaũ kyatũtetheeisye kũmĩĩsya? Kĩla ĩvinda Priscilla nĩwalilikanaa ndeto sya Yesũ ila syĩ ĩvukunĩ ya Mathayo 6:34. Ĩandĩkonĩ yĩu Yesũ oonanasya kana tũyaĩle kwĩmakĩa ũndũ wa ũnĩ, nũndũ ũnĩ ũkeethĩwa na mawĩmakĩo maw’o. Kũvoya kuma ngoonĩ nĩkwamũtetheeisye Priscilla aendeee kwĩyũmĩĩsya. Nakwa nĩnakwatie ũkiakisyo kuma ĩandĩkonĩ ya Savuli 55:22. O ta mũandĩki ũsu wa Savuli, nĩnamwaũĩie Yeova mathĩna makwa na kwa w’o nĩwandetheeisye. O na kau yu nĩnakwatie wĩa, nĩtũtataa mũno tũikethĩwe na malĩ mbingĩ, o tondũ Yesũ waumisye ũtao ĩandĩkonĩ ya Mathayo 6:20-22. Na ũndũ ũla wa vata mũno nĩ kana nĩtũmũthengeee Yeova kwĩ ũndũ vailyĩ mbeenĩ, na ngwatanĩo yakwa na kĩveti kyakwa nĩ ndũmu.”

Mũndũũme ũmwe wĩtawa Jonathan aĩtye atĩĩ: “Naseng’aa tũkeeka ata ĩtina wa kũthelelwa na kũvinga viasala yitũ.” Aendeee kwasya atĩĩ: “Nũndũ wa mathĩna ma mbesa ala makwatie nthĩ yitũ, mbesa ila twathũkũmĩe myaka 20 syanyw’ie kĩw’ũ. Nĩ na kĩveti kyakwa twambĩĩie kũemanĩwa mbesa. Tũyaĩ tũtonya kũtũmĩa kaati yitũ ya kũthooa syĩndũ nũndũ twoona ta ĩtetĩkĩlwa.”

Jonathan aielesya kĩla kyamatetheeisye aĩtye atĩĩ: “Ndeto ya Ngai na veva wake nĩsyatũtetheeisye kwĩka motwi maseo. Nĩneemanyĩisye kana ndyaĩle kũsakũaa wĩa, na nĩtwaekie kũthooa syĩndũ ite sya lasima. Na nũndũ twĩ Ngũsĩ sya Yeova, nĩtwatethaw’a nĩ ala  angĩ tũthaithaa ĩmwe. Nĩmatumie tũeka kwĩvũthya na nĩmatũtetheeasya mavindanĩ ala tũtaĩ mbee na ĩtina.”

ĨLA ANDŨ MATWAANĨTE MATAANĨSYA

Mũndũ mũka ũmwe wĩtawa Raquel aĩtye atĩĩ: “Naũmĩie ngoo mũno ĩla mũemewa wandiie.” Aendeee na kwasya atĩĩ: “Nĩnakwatiwe nĩ kyeva kingĩ mũno. Ĩndĩ nĩnamũthengeeie Ngai, na angiakisya. Ĩla namũvoya Ngai kĩla mũthenya new’aa mũuo wake wasũvĩa ngoo yakwa, na ndyĩw’a ngoo yakwa yausya.”

Aĩtye ũũ aielesya kĩla kyamũtethisye: “Mbivilia nĩyandetheeisye naeka kwĩthĩwa na ũthatu ngoonĩ, na kwĩw’a ndyenda kwĩyĩĩvanĩsya. Nĩnatetheeiw’e nĩ ndeto ii sya mũtũmwa Vaulo syĩ ĩandĩkonĩ ya Alomi 12:21: ‘Mũikakĩlw’e vinya nĩ ũthũku, ĩndĩ kĩlyai ũthũku vinya na ũseo.’”

“Ve ĩvinda mũndũ wĩthĩawa aĩle kwĩtĩkĩla ‘kwasya’ kĩla waĩ nakyo. . . . Yu nĩ na mĩvango ĩngĩ nĩvangĩĩe kwĩanĩsya.”—Raquel

Aendeee na kwasya: “Ve mũnyanya wambonisye ũndũ ndonya kũeka kwĩmakĩa na ndiendeea na maũndũ ala makwa. Ambonisye ĩandĩko ya Mũtavan’ya 3:6 na andavya kana ve ĩvinda mũndũ wĩthĩawa aĩle kwĩtĩkĩla ‘kwasya’ kĩla waĩ nakyo. Ũtao ũsu waĩ mũito ĩndĩ nĩwambaĩle. Yu nĩ na mĩvango ĩngĩ nĩvangĩĩe kwĩanĩsya.”

Mũndũ mũka wĩtawa Elizabeth aĩtye atĩĩ: “Ĩla andũ matwaanĩte mathasya mũtwaano, mũndũ ũla watiwa nĩwendaa kũkiakiw’a.” Aendeee na kwasya atĩĩ: “Naĩ na mũnyanyawa wandetheeasya kĩla ĩvinda. Nĩwaĩaa nakwa, akangiakisya, na nĩwatumaa nĩw’a nĩ wa vata vandũ va kwĩthĩwa nĩmenete. Nĩnĩsĩ nesa vyũ kana Yeova atũmĩie mũnyanyawa ũsu kũndetheesya nĩw’e nesa.”

ĨLA TWAWAA KANA TWAKŨA

“Ĩla namũvoya Ngai, nĩnĩw’aa veva wake wambĩkĩa vinya.”—Luis

Mũndũũme wĩtawa Luis, ũla ũwetiwe kĩlungunĩ kya mbee, ethĩawa na ũwau wa ngoo, na ve mavinda elĩ waĩ vakuvĩ vyũ kũkw’a. Yu ekalaa ekĩĩtwe nzeve masaa 16 kwa mũthenya. Aĩtye atĩĩ: “Nĩnĩmũvoyaa Yeova kĩla ĩvinda.” Aendeee na kwasya atĩĩ: “Na ĩla namũvoya Ngai, nĩnĩw’aa veva wake wambĩkĩa vinya. Mboya nĩtumaa nĩendeea kwĩyũmĩĩsya nũndũ nĩnĩmũĩkĩĩaa Ngai na nĩnĩsĩ nesa kana nũnthĩnĩkĩaa.”

Nake Petra, ũla wĩ na myaka 80 na kĩndũ aĩtye atĩĩ: “Nĩnĩw’aa ndyenda mũno kũtethya maũndũ maingĩ, ĩndĩ vaitonyeka.” Aendeee na kwasya: “Ti ũndũ wĩ laisi kwona nĩendeee na kũthela vinya. Nĩw’aa nĩ mũnou vyũ na nĩkalaw’a nĩ ndawa. Mavinda maingĩ nĩnĩsũanĩaa ũndũ Yesũ weeie Ĩthe wake kana ethĩwa nĩvatonyeka amũvetangĩe thĩna ũla waĩ mbee wake.  O ũndũ Yeova wamũnengie Yesũ vinya eyũmĩĩsye, now’o ũnengae vinya nĩyũmĩĩsye. Ĩla navoya kĩla mũthenya nĩw’aa nakwata vinya. Nĩnĩw’aa kavaanga ĩtina wa kũneena na Ngai.”—Mathayo 26:39.

Julian, ũla wĩthĩĩtwe na ũwau wa kũanda na kũma kwa mamutha ma mwĩĩ (multiple sclerosis) kwa ĩvinda ya myaka vakuvĩ 30 ew’aa o ta Petra. Aĩtye atĩĩ: “Naĩ wĩanĩ mũseo mũno ĩndĩ yu vai ũndũ nĩyĩka nũndũ nĩthĩawa kĩvĩlanĩ kya kũsukumwa. Ĩndĩ o na ũu wĩ o vo, nĩnĩw’aa nĩ mwĩanĩe nũndũ nĩnĩyumĩtye kũtetheesya andũ angĩ. Kũtetheesya ala angĩ nĩkũolangaa mathĩna makwa, na Yeova nĩwĩanĩasya watho wake wa kũmbĩkĩa vinya ĩla nĩ na mathĩna. O ta mũtũmwa Vaulo no nasye kana vate nzika: ‘Nĩndonya maũndũ onthe nthĩnĩ wake ũla ũndonyethasya.’”—Avilivi 4:13.

ĨLA TWAKW’ĨĨWA

Antonio aililikana maũndũ ala meekĩkie aĩtye atĩĩ: “Ndyaaĩkĩĩa ĩla neewie kana ĩthe wakwa nũkongiwe nĩ ngalĩ akw’a.” Aendeee kwasya: “Noonie ũndũ ũsu ũtaaĩle kwĩkĩka nũndũ ĩthe wakwa akongiwe esĩle ũtee wa nzĩa. Ĩndĩ ndyaĩ ũndũ naĩ nĩka. Ekalile sivitalĩ mĩthenya ĩtano ate kwĩyĩw’a ayĩsa kũkw’a. No natataa ndikaĩe mami ambene, ĩndĩ ĩla nĩ weka naĩaa mũno vyũ, na ndyĩkũlya, ‘Nĩkĩ? nĩkĩ ũndũ ũũ wĩthĩiwe?’”

Antonio ayĩelesya kĩla kyamũtetheeisye aĩtye atĩĩ: “Mavindanĩ asu onthe naĩ na kyeva kingĩ ndyaaeka kũmũvoya Yeova andetheesye nĩyũmĩĩsye na ndyĩthĩwa na mũuo. Na o ũndũ ĩvinda yaendeee na kũvĩta now’o naendeee kũkwata mũuo wa kĩlĩko. Nĩnalilikanile kana Mbivilia yaĩtye kana vai mũndũ ũtakwatwa nĩ ‘ĩvuso’ kana ũndũ ũtataĩĩwe. Nũndũ Ngai ndesa kũkengana, nĩnĩsĩ nesa ki kana ngoona ĩthe wakwa ũthayũũkyonĩ.”—Mũtavan’ya 9:11; Yoana 11:25; Tito 1:2.

“O na kau kĩmwana kitũ nĩkyakw’ĩĩe mũisyonĩ ũsu wa ndeke, nĩtũlilikanaa maũndũ maingĩ maseo ala tweekaa ĩmwe.”—Robert

O nake Robert, ũla ũwetiwe kĩlungunĩ kya mbee, e o na mawoni ta ma Antonio. Aĩtye atĩĩ: “Nĩ na kĩveti kyakwa, nĩtweethĩiwe na mũuo wa kĩlĩko ũla ũwetetwe ĩvukunĩ ya Avilivi 4:6, 7. Twakwatie mũuo ũsu ĩla twavoyie Yeova. Mũuo ũsu nĩwatumie tũtavya atangaasi ma maũvoo ĩũlũ wa wĩkwatyo wa ũthayũũkyo ũla twĩ naw’o. O na kau kĩmwana kitũ nĩkyakw’ĩĩe mũisyonĩ ũsu wa ndeke, nĩtũlilikanaa maũndũ maingĩ maseo ala tweekaa ĩmwe. Maũndũ asu maseo nĩmo tũtataa kũsũanĩaa mũno.”

Aendeee na kwasya atĩĩ: “Ĩla Ngũsĩ ila ingĩ syoonie tũielesya ĩũlũ wa mũĩkĩĩo witũ nthĩnĩ wa televiseni tũuĩtye, twameie kana vate nzika ũndũ ũsu wĩkĩkie nũndũ wa mboya mbingĩ ila syaumiw’e kwondũ witũ. Kwa w’o nĩnĩsĩ nesa vyũ kana Yeova atũmĩie Ngũsĩ isu kũtũtetheesya nũndũ nĩmatũtũmĩaa mesengyi mbingĩ sya kũtwĩkĩa vinya.”

O tondũ ngelekany’o isu syĩkwonany’a, Ngai no akiakisye andũ me na mathĩna me kĩvathũkany’o. Nao nata ĩũlũ waku, nũkwona ta ũtonya kũũkiakisya? O na wakwatwa nĩ thĩna ũilyĩ ata, no ũkwate ũkiakisyo mavindanĩ asu wĩ na thĩna. * Kwoou Yeova no aũtetheesye nũndũ nĩwe “Ngai wa ũkiakisyo w’onthe.”—2 Akolintho 1:3.

^ kal. 5 Masyĩtwa amwe kĩlungunĩ kĩĩ nĩ mavĩndũe.

^ kal. 23 Ethĩwa no wende kũtetheew’a ũmũthengeee Ngai na ũikwata ũkiakisyo, neena na ũmwe wa Ngũsĩ sya Yeova kĩsionĩ kyenyu kana ũandĩkĩe ovisi wa ũvonge ũla wĩ vakuvĩ.